သျှမ်းပြည် လားရှိုးမြို့တွင် စစ်ကောင်စီလက်အောက်ခံ တပ်နှင့်ရဲ ပူးပေါင်းအဖွဲ့က အမျိုးသမီး ၂ ဦး အပါအဝင် လူငယ် ၃ ဦးကို ဖမ်းဆီးခေါ်ဆောင်သွားခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၂၄ ရက်) ည ၈ နာရီမှ ၁၁ နာရီခန့်အတွင်း လားရှိုးမြို့ စစ်ကောင်စီလက်အောက်ခံ တပ်နှင့်ရဲ ပူးပေါင်းအဖွဲ့များက ရပ်ကွက်(၁၂) ကောင်းခါးရှိ ပြည်သူနေအိမ်များကို ဧည့်စာရင်း ရှောင်တခင် ဝင်ရောက်စစ်ဆေးပြီး အမျိုးသမီး ၂ ဦးအပါအဝင် လူငယ် ၃ ဦးကို ဖမ်းဆီးခေါ်ဆောင်သွားကြောင်း လားရှိုးဒေသခံများက ပြောသည်။
“ရပ်ကွက် ၁၂ ကောင်းခါးမှာ မနေ့ညက စစ်ကားတွေ လာရပ်ပြီးတော့ လမ်းကြားထဲ တရုတ်ရပ်ကွက်ကို ဝင်စစ်တာ။ ကောင်လေးတစ်ယောက်ပါသွားတယ်။
သူကတော့ ဖုန်းထဲမှာ သေနတ်ပုံတွေ့တာပြောတယ်။ နောက်တစ်အိမ်က တရုတ်မိန်းကလေး ၂ ယောက်ကိုလည်း ဖမ်းသွားတယ်။ သူတို့ကတော့ ပြည်သူ့စစ် ယူနီဖောင်း တွေ့တယ်လို့ ပြောတာပေါ့”ဟု လားရှိုးမြို့မှ ဖြစ်စဉ်သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (ဇန်နဝါရီ ၂၄)ရက် ညတွင် စစ်ကောင်စီ ပူးပေါင်းအဖွဲ့ဝင် အင်အား ၅၀ ခန့်သည် လားရှိုးမြို့ ရပ်ကွက်(၁၂) ကောင်းခါးရှိ ပြည်သူနေအိမ်များသို့ ဝင်ရောက်စစ်ဆေးခဲ့ပြီး အသက် ၂၅ နှစ်အရွယ်ခန့်ရှိ စိုင်းလောဝ်တိုင်း နှင့် အခြားအမျိုးသမီး ၂ ဦးတို့ကို လားရှိုးမြို့ အမှတ်(၂) မြို့မ ရဲစခန်းသို့ ဖမ်းဆီးခေါ်ဆောင်သွားခဲ့သည်ဟု လားရှိုးဒေသခံများထံမှ သိရသည်။
“အခုက တိုင်းရုံးထဲကကော ရဲနဲ့ကော အဖွဲ့ပေါင်းစုံ လာဖမ်းသွားတာဆိုတော့ စစ်မေးပြီးမှပဲ အာမခံနဲ့ လွတ်ပေးမလားဆိုတာ ပြောနိုင်မယ်ထင်တယ်”ဟု လားရှိုးမြို့မှ ၎င်းဒေသခံအမျိုးသမီးတစ်ဦးက သျှမ်းသံတော်ဆင့်ကို ဆက်ပြောသည်။
လက်ရှိတွင် လားရှိုးမြို့ပေါ် ရပ်ကွက်(၁၂)ခုရှိ ပြည်သူနေအိမ်များကို စစ်ကောင်စီလက်အောက်ခံ တပ်နှင့်ရဲ ပူးပေါင်းအဖွဲ့များက မာရှယ်လောကြေညာထားသည့် ည ၆ နာရီနောက်ပိုင်းတွင် ဧည့်စာရင်းကို ရှောင်တခင် ဝင်ရောက်စစ်ဆေးပြီး တင်းတင်းကျပ်ကျပ် စစ်မေးနေခြင်းကြောင့် စိုးရိမ်ထိတ်လန့်နေရကြောင်း လားရှိုးဒေသခံများက ပြောသည်။
“ဒီလိုမျိုး အိမ်တိုင်းကို ဝင်စစ်ရင်တော့ စိတ်ပူရတယ်။ သူတို့ဖမ်းချင်ရင် တနည်းမဟုတ် တနည်းနဲ့ အကြောင်းရှာပြီး အရေးယူမှာပဲဆိုတော့လေ။ အဓိကတော့ လူငယ်များတဲ့အိမ်ဆိုရင် ပိုစိတ်ပူရတယ်။ ကိုယ်က ရိုးရိုးသားသား ဘာမှမလုပ်ရင်တောင်မှ သူတို့က အပြစ်ရှာချင်တာမျိုးဆို သတိထားရမှာ”ဟု လားရှိုးမြို့မှ အသက်(၅၀)ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ဇန်နဝါရီလ ၂၂ ရက် ညပိုင်းတွင် လားရှိုးမြို့ အရှေ့မြောက်တိုင်း စစ်ဌာနချုပ်တွင် လုံခြုံရေးကင်းစောင့်နေသည့် စစ်ကောင်စီတပ်သားအချင်းချင်း ပစ်ခတ်မှု ဖြစ်ပွားခဲ့ရာ ၂ ဦးသေဆုံးခဲ့ပြီး ၁ ဦးဒဏ်ရာရရှိခဲ့သည်ဟု စစ်ရေးသတင်းရင်းမြစ်ထံမှ သိရသည်။
အလားတူ ဇန်နဝါရီလ ၁၆ ရက်ကလည်း ည ၇ နာရီဝန်းကျင်တွင် လားရှိုးမြို့နယ် ပန်နားကျေးရွာ အုပ်စု ဝိန်းစုံရွာနေ အမျိုးသားတစ်ဦးသည် မီးသွေးသွားရောင်းပြီး အလောတကြီးအိမ်ပြန်လာစဉ် AD ဂိတ်တွင်ရှိသည့် စစ်ကောင်စီ တပ်သားက သေနတ်ဖြင့်ပစ်ခတ်ခဲ့၍ ထိုနေရာ၌ ပွဲချင်းပြီး သေဆုံးသွားခဲ့ကြောင်း လားရှိုးဒေသခံများက ပြောသည်။
Leave a Comments