မြန်မာ-တရုတ်နယ်စပ် သျှမ်းပြည် မူဆယ်မြို့နယ် နှင့် နမ့်ခမ်းမြို့နယ် တို့မှ ပွဲစားဖြင့် နိုင်ငံကူး လက်မှတ်၊ စာအုပ်အနီ လုပ်သူများ၏ မှတ်ပုံတင် နှင့် စာရွက် စာတမ်းများ စွန့်ပစ်ခံရကြောင်း စုံစမ်းသိရသည်။

တရုတ်နိုင်ငံကူး ယာယီလက်မှတ် စာအုပ်နီကို ပွဲစားဖြင့် လုပ်ဆောင်နေကြသည့် မူဆယ်မြို့၊ နမ့်ခမ်းမြို့တို့မှ ဒေသခံများ သည် ပွဲစား၏ တာဝန်ယူမှု၊ တာဝန်ခံမှု မရှိသည့်အတွက်ကြောင့် ရွှေနန်းတော်ဂိတ်၊ အလယ်ပေါက်၌ မှတ်ပုံတင် နှင့် စာရွက်စာတမ်းများ စွန့်ပစ်ခံနေရကြောင်း သိရသည်။

“လူကိုယ်တိုင် သွားလုပ်ဖို့ အဆင်မပြေကြလို့၊ တချို့က မအားလို့၊ တချို့က စကားအခက်အခဲရှိလို့ ပွဲစားနဲ့ လုပ်ကြတဲ့ သူတွေပေါ့။ ရွှေနန်းတော် ခရီးသွားလာရေး ဌာန ဟောင်း အရှေ့တည့်တည့် ၊ အလယ်ဂိတ်ပေါက် တွေမှာ သူတို့ မှတ်ပုံတွေ နဲ့ ညှပ်ထားတဲ့ စာရွက်စာတမ်း အထောက်အထားတွေ ပြန့်ကျဲနေတာပဲ” ဟု မြင်တွေ့ ရသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ထို့အပြင် ပွဲစားခအတွက် ပေးဆောင်ရသည့် အခကြေးငွေများသည် မြန်မာငွေကျပ် တစ်သိန်း နှင့် အထက် ရှိခဲ့သော်လည်း လက်ရှိ အချိန်၌ ပိုက်ဆံ ဆုံးရှုံးရသည့်အပြင်၊ အချို့သူများက မှတ်ပုံတင်များပါ ပျောက်ဆုံးနေ ကြကြောင်းလည်း သိရသည်။

“ပွဲစားက လုပ်ပေးမယ်ဆိုပြီးတော့ ငွေယူသွားပြီး ပြီးဆုံးသည်အထိ၊ ရသည်အထိ မလုပ်ပေးဘူးလေ။ အခု ပွဲစားက ထွက်ပြေးသွားပြီ။ ပွဲစားနဲ့ စာအုပ်လုပ်ထားတဲ့ သူတွေက ကိုယ့်မှတ်ပုံတင် နဲ့ စာရွက်စာတမ်းတွေကို ကိုဘ်တိုင် သွားရှာယူခဲ့ရကြတာ။ တချို့က ပြန်ရပေမဲ့ တချို့က ပျောက်နေတယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။

ယင်းကဲ့သို့ ပွဲစားများ၏ တာဝန်ယူမှု တာဝန်ခံမှု မရှိ၊ အခကြေးငွေ ယူပြီး ထွက်ပြေး သွားမှုကြောင့် ပျောက်ဆုံး သွားသည့် မှတ်ပုံတင်များ ပြန်လည်ရရှိရေး၊ ဆုံးရှုံးသော ငွေကြေးများ ပြန်လည်ရရှိရေး တို့အတွက် သက်ဆိုင်ရာ တာဝန်ရှိသူများမှ အရေးယူ ဆောင်ရွက်ပေးစေလိုကြောင်းလည်း ဒေသခံများက တောင်းဆိုနေကြသည်။

ထို့အပြင် ဇန်နဝါရီလ ၂ ရက်နေ့၌လည်း မူဆယ်မြို့ရှိ မြန်မာ-တရုတ်နယ်စပ် နန်းတော်ဂိတ်တွင် လူဝင်မှုကြီးကြပ်ရေး ဌာန လဝက အရာရှိများ သည် နယ်စပ်သွားလာခွင့်လက်မှတ် စာအုပ်များမကျန်ရှိတော့ဟု အကြောင်းပြကာ စာအုပ် မလုပ်ပေးတော့ကြောင်း ကြေငြာခဲ့သော်လည်း ပွဲစားအဆက်အသွယ်များမှတဆင့် ဈေးအဆမတန် တောင်းပြီး ခိုးကြောင်ခိုးဝှက် ပြုလုပ် ပေးနေသည်ဟု မူဆယ်ဒေသခံများက ပြောသည်။

ယခုလို မူဆယ်မြို့မှ လဝကအရာရှိများက နယ်စပ်ဖြတ်သန်းခွင့်လက်မှတ် စာအုပ်ကို ဈေးအဆမတန် တောင်းပြီး ပြုလုပ်နေရခြင်းကြောင့် တရုတ်နိုင်ငံသို့ သွားရောက်ပြီး ကုန်ပစ္စည်းဝယ်ယူ တင်သွင်းနေသည့် ဒေသခံများမှာ အခက်အခဲဖြစ်ကာ ဒေသခံပြည်သူများလည်း ကုန်ဈေးနှုန်းမြင့်မားမှုကို ကြုံတွေ့နေရကြောင်း လည်း သိရသည်။