သျှမ်းပြည် အထူးဒေသ(၁)တွင် ကိုးကန့်တပ်ဖွဲ့ MNDAA က လက်နက်ခဲယမ်း ထိန်းချုပ်မှုနှင့် မြေယာငှားရမ်းရောင်းဝယ်မှုတို့နှင့် ပတ်သက်ပြီး စည်းကမ်းသတ်မှတ်ချက်များ ထုတ်ပြန်လာသည်။

ကိုးကန့်တပ်ဖွဲ့ MNDAA က သျှမ်းပြည် အထူး‌ဒေသ(၁)အဖြစ် သတ်မှတ်ထားသည့် လွတ်မြောက်ဒေသများတွင် ပုဂ္ဂလိကပိုင် လက်နက်ကိုင်ဆောင်မှုနှင့် ရောင်းဝယ်မှုများကို ဥပဒေနှင့်အညီ တားမြစ်ကြောင်း အထူးဒေသ(၁) စစ်ရေးအုပ်ချုပ်မှုကော်မတီမှ ဇန်နဝါရီလ ၂၁ ရက် နေ့စွဲဖြင့် လက်နက်ခဲယမ်းထိန်းသိမ်းရေး စည်းကမ်းချက်များ ထုတ်ပြန်လာခဲ့သည်။

ထုတ်ပြန်ချက်တွင် စစ်ကောင်စီလက်အောက်ခံ ကိုးကန့်ရုပ်သေးအဖွဲ့ အုပ်ချုပ်စဉ်အချိန်က ထုတ်ပေးထားသော လက်နက်ခဲယမ်းများကို ကိုးကန့်တပ်ဖွဲ့ MNDAA ထံ ဖေဖော်ဝါရီလ ၅ ရက်နေ့မတိုင်ခင် လာရောက်အပ်နှံရမည်ဖြစ်ပြီး သတ်မှတ်ကာလအတွင်း လာရောက်အပ်နှံခြင်း မရှိပါက ဖုံးဝှက်ထားသော လက်နက်ခဲယမ်းအဖြစ် သတ်မှတ်ပြီး အရေးယူခံရမည်ဟု ပါရှိသည်။

ထို့အပြင် အထူးဒေသ(၁) အတွင်းရှိ စစ်သားနှင့်အရပ်သား အချင်းချင်းကြား လက်နက်ခဲယမ်း ရောင်းဝယ်ခြင်းကို တွေ့ရှိပါက ပြင်းပြင်းထန်ထန် အရေးယူသွားမည်ဖြစ်ကြောင်းလည်း သတိပေးထားသည်။

အလားတူ ကိုးကန့်အထူးဒေသ(၁) အပြည့်အဝ ပြန်လည်မထူထောင်ခင်အချိန်တွင် မြေယာရောင်းဝယ်ခြင်း ဟိုတယ်လွှဲပြောင်းခြင်းများကို ရပ်ဆိုင်းထားရန်၊ သက်ဆိုင်ရာဌာန၏ ခွင့်ပြုချက်မရှိဘဲ အိမ်ဆောက်ခြင်း၊ မြေယာနှင့် မော်တော်ယာဉ်များကို ရောင်းဝယ်ခြင်းနှင့် လွှဲပြောင်းခြင်းများ ပြုလုပ်ပါက တရားမဝင် လုပ်ဆောင်ချက်များအဖြစ် မှတ်ယူမည်ဖြစ်ကြောင်း ဇန်နဝါရီ ၁၉ ရက် နေ့စွဲဖြင့် စစ်ရေးအုပ်ချုပ်မှုကော်မတီမှ ထုတ်ပြန်ထားသည်။

လောက်ကိုင်ဒေသ တိုက်ပွဲများအတွင်း စစ်ကောင်စီတပ် စခန်းများမှ သိမ်းဆည်း ရမိထားသည့် လက်နက်ခဲယမ်းများကို စနစ်တကျ ပြန်အသုံးချရန် စစ်ကောင်စီ တပ်စခန်းတခုကို ကိုးကန့်တပ်ခေါင်းဆောင် ဦးဖုန်တဲရင် သွားရောက်စစ်ဆေးစဉ် မှာကြားနေသည့် ရုပ်သံကို ဇန်နဝါရီ ၁၈ ရက်တွင် တရုတ်လူမှုကွန်ရက်များတွင် ဖော်ပြခဲ့သည်။

ပြီးခဲ့သည့် ဇန်နဝါရီလ ၁၆ ရက်နေ့ကလည်း ကိုးကန့်တပ်ဖွဲ့ MNDAA ၏ အုပ်ချုပ်ရေးတာဝန်ရှိသူများမှ ကွတ်ခိုင်မြို့နယ် တာမိုးညဲမြို့တွင် ဒေသခံပြည်သူများနှင့် တွေ့ဆုံဆွေးနွေးခဲ့ကာ ဒေသအတွင်း ပျက်စီးသွားသည့် လမ်းနှင့် လျှပ်စစ်မီးများ ပြန်လည်ပြုပြင်ပေးပြီး စားနပ်ရိက္ခာများလည်း ထောက်ပံ့ပေးခဲ့သည်ဟု တာမိုးညဲဒေသခံများထံမှ သိရသည်။

ကိုးကန့်တပ်ဖွဲ့ MNDAA ၏ အထူးဒေသ(၁) အုပ်ချုပ်ရေးနယ်မြေများအဖြစ် ကိုးကန့်ခရိုင်၊ မုံးကိုးခရိုင်၊ သိန္နီခရိုင်နှင့် ကွတ်ခိုင်ခရိုင်ဟူ၍ ခရိုင်(၄)ခုဖြင့် ဖွဲ့စည်းထားကြောင်း MNDAA ပြောရေးဆိုခွင့်ရှိသူ လီကျားဝင်းက သျှမ်းသံတော်ဆင့်ကို နိုဝင်ဘာလအတွင်းက ဖြေကြားထားသည်။