ပင်လောင်းမြို့နယ် ဆောင်းပြောင်းဂိတ်တွင် စစ်ကောင်စီက စစ်ဆေးရေး တင်းကြပ်နေပြီး ငွေကြေး အမြောက်အမြားတောင်းခံနေကြောင်း စုံစမ်းသိရသည်။
ပင်လောင်းမြို့နယ် ဆောင်းပြောင်းကျေးရွာရှိ စစ်ကောင်စီစစ်ဆေးရေးဂိတ်သည် ဖြတ်သန်းသွားလာသော ပြည်သူများကို ယခုဇန်နဝါရီလ နောက်ဆုံးပတ်အတွင်းတွင် စစ်ဆေးမှုများ တင်ကြပ်နေပြီး၊ ငွေကြေးကောက်ခံ မှုများလည်း ပြုလုပ်နေကြောင်း ဒေသခံများက သျှမ်းသံတော်ဆင့်ကိုပြောသည်။
“ဆောင်းပြောင်းဂိတ်က စစ်ကောင်စီတွေကိုလည်း ပေးရတာပဲ။ လွိုင်ကော်ထိ ပစ္စည်းတွေသွားတင်ရင် ၃ ဂိတ်ရှိတယ်။တစ်ဂိတ်ကို ၅သောင်းပေးရတယ်။”ဟု ကိုယ်တိုင်ကြုံတွေ့ရသည့်အမျိုးသားတစ်ဦးက သျှမ်းသံတော်ဆင့်ကို ပြောသည်။
ဆောင်းပြောင်းဂိတ်ကို ည ၆ နာရီထိသာ ဖြတ်သန်းသွားလာခွင့်ပြုပြီး၊ နေ့စဥ်နှင့်အမျှ စစ်ဆေးမှု တင်းကြပ်နေကြောင်း ဒေသခံအမျိုးသမီးတစ်ဦးကပြောသည်။
“စစ်တာကတော့ ရှိတယ်။ရှုပ်ရင် စစ်ဆေးတာကြမ်းတယ်။တခါတလေလည်းစစ်တယ် တခါတလေလည်း မစစ်ဘူး။ညတွေပေးမဖြတ်တာက “၁၁.၁၁”စတဲ့ နောက်မှာ ပေးမဖြတ်ဘူး။ပြီးတော့ ပိုပြီး စစ်ဆေးရေးတွေ တင်းကြပ်တယ်။” ဟု ဒေသခံအမျိုးသမီးတစ်ဦးက ပြောသည်။
ပင်လောင်းမြို့နယ် စစ်ရှောင်စခန်းများတွင် စစ်ရှောင်ဦးရေ ၃ သောင်းခန့်ရှိပြီး အများစုသည် သက်ကြီးရွယ်အို နှင့် ကလေးငယ် အများဆုံးဖြစ်သည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် ၂၀၂၃ နိုဝင်ဘာလ ၁၅ ရက်မှထွက်ပြေးလာပြီး၊ လက်ရှိတွင် သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေးနှင့် ဆီဆိုင် ဒေသများတွင် ကရင်နီပြည်မှ အရေးပေါ် တိမ်းရှောင်လာပြီး ဘုန်းကြီးကျောင်းများနှင့် ဆွေမျိုးအိမ်များသို့ စစ်ဘေးရှောင်နေကြပြီး စားဝတ်နေရေး နှင့် အနွေးထည်များ လိုအပ်နေကြောင်း သိရသည်။
