သျှမ်းပြည် မြောက်ပိုင်း သီပေါမြို့နယ် တုံစင့်ကျေးရွာနှင့် ကုံးစုံရွာကြားရှိ တောလမ်းတစ်ခုတွင် ယမန်နေ့ ( ဇန်နဝါရီ ၂၃)ရက် တွင် အရပ်သား ၂ဦး မြေမြုပ်မိုင်းနင်းမိခဲ့ကြောင်း စုံစမ်းသိရသည်။
အဆိုပါ မြေမြုပ်မိုင်းနင်းမိသည့် အရပ်သား ၂ဦးသည် အမျိုးသား တစ်ဦး နှင့် အမျိုးသမီး တစ်ဦးဖြစ်သည်။
“အမျိုးသားတစ်ယောက်တော့ ခြေပြတ်သွားတယ်။ ပြီးခဲ့တဲ့ ရက်ပိုင်းကလည်း ဒီနားတဝိုက်မှာ အစာရှာစားနေတဲ့ ခွေး ၄ ကောင်လည်း မိုင်းနင်းမိပြီး ၄ ကောင်စလုံးသေသွားသေးတယ်။ အဲ့မှာက စစ်ကောင်စီ ခလရ-၂၃ နဲ့ နီးတယ်။ အခု ဒဏ်ရာရတဲ့ အမျိုးသား ၁ ကိုတော့ မန္တလေးဆေးရုံ ပို့ထားတယ်” ဟု ၎င်းဒေသခံတစ်ဦးက ပြောသည်။
သီပေါမြို့နယ်တွင် ယခုဇန်နဝါရီလ တစ်လအတွင်း မြေမြုပ်မိုင်းကြောင့် ထိခိုက်ဒဏ်ရာရသူ မကြာခဏ ကြားနေရကြောင်း ၎င်းကဆိုသည်။ ပြီးခဲ့သည့် ဇန်နဝါရီလ ၂၂ ရက်တွင် နမ္မတူ-သီပေါကြားရှိ မိုးတေတံတားအနီးတွင် ပစ္စည်းတင်ဆောင်လာသည့် ကားတစ်စီးမိုင်းတက်ဖိမိပြီး ပေါက်ကွဲရာ ယာဉ်မောင်း အမျိုးသား ၁ ဦး ဒဏ်ရာရှိခဲ့သည်။
သျှမ်းမြောက်ဒေသတွင် “၁၀၂၇ စစ်ဆင်ရေး” တိုက်ပွဲဖော်ဆောင်လာပြီးနောက် ၃ လနီးပါးအကြာ မြေမြုပ်မိုင်း နင်းမိသူများ နေ့စဉ်နီးပါးလိုပင် ရှိလာသည်။
ပြီးခဲ့သည့် ၂၀၂၃ အောက်တိုဘာလ နောက်ဆုံးပတ်မှစ၍ ယနေ့ (ဇန်နဝါရီလ ၂၄ ရက်) ရက်ထိ သျှမ်းမြောက်ဒေ မူဆယ်၊ နမ့်ခမ်း၊ သီပေါ၊ လားရှိုး၊ ကွတ်ခိုင် စသည့်ဖြင့် မြို့နယ်ပေါင်း ၁၀ ခုတွင် မြေမြုပ်မိုင်းနင်မိ၍ သေဆုံးသူ ၂ ဦးရှိပြီး ထိခိုက်ဒဏ်ရာရသူ စုစုပေါင်း ၂၅ ဦးအထိ ရှိလာကြောင်း သျှမ်းသံတော်ဆင့်မှ သီခြားကောက်ယူ ထားသောမှတ်တမ်းစာရင်းအရ သိရသည်။
ထိုထဲမှ သေဆုံးသူ ၂ ဦးသည် နမ့်ခမ်းမြို့မှ အမျိုးသမီး ၁ ဦးနှင့် ကျောက်မဲမြို့မှ အမျိုးသား ၁ ဦးဖြစ်သည်။
စစ်ကောင်စီနှင့် ညီနောင်မဟာမိတ်သုံးဖွဲ့တို့ တိုက်ပွဲဖြစ်ပွားရာဒေသတွင်း မြန်မာ-တရုတ်နယ်စပ်ဒေသ မူဆယ်မြို့နယ်တွင် မြေမြုပ်မိုင်းမိသူအများဆုံးဖြစ်ပြီး ထိခိုက်ဒဏ်ရာရသူ စုစုပေါင်း ၇ ဦးအထိရှိသည်။
မြေမြုပ်မိုင်းနင်းသူများသည် မိုင်းခွဲဖျက်စီးခံရသော တံတားပေါ်သို့ ဖြတ်သန်းသွားလာခြင်းအပါအဝင် လမ်မပေါ်၊ ခြံဝန်းနှင့် စစ်တပ်စခန်းအနီးသို့ ဖြတ်လျှောက်သွားလာခြင်းကြောင့် မိုင်းနင်းမိခြင်း ဖြစ်သည်။
“ဖြစ်နိုင်ရင်တော့ တိုက်ပွဲဖြစ်တဲ့နေရာတွေ၊ စစ်သားတွေ သွားလာလှုပ်ရှားတဲ့နေရာတွေ မသွားရင်တော့ သင့်တော်တယ်။ အရေးကြီးကိစ္စရှိလို့ သွားရင်တစ်ပါး အဲ့မှာသက်ဆိုင်ရာ အုပ်ချုပ်ရေးမှူးတွေကို အကြောင်းကြားပြးမှ သွားသင့်တယ်။ မိုင်းက ဘယ်မှာမြုပ်ထားမှန်းလည်း မသိတော့ သတိထားရတယ်။ လယ်ယာသွားလုပ်တဲ့ကျနော်တို့အတွက် အန္တရာယ်များတယ်။ လက်နက်ကိုင်အနေနဲ့လည်း မိုင်းတွေကို အသုံးမပြုဖို့ တောင်းဆိုချင်တယ်။” ဟု သီပေါမြို့ ဒေသခံတစ်ဦးက တောင်းဆိုထားသည်။
စစ်တပ်အာဏာသိမ်းပြီးနောက်ပိုင်း မြန်မာတစ်ဝှမ်း နေပြည်တော်မှလွဲ၍ တိုင်းနှင့်ပြည်နယ် အသီးသီးတွင် မြေမြုပ်မိုင်းနှင့် ပေါက်ကွဲတတ်သော စစ်အကြွန်းအကျန်များကြောင့် ထိခိုက်ဒဏ်ရာရသူ သိသိသာသာတိုးလာနေပြီး မြို့နယ်ပေါင်းတစ်ဝက်ကျော်မှာ မြေမြုပ်မိုင်းအန္တရာယ် ကျရောက်နေပြီဖြစ်ကြောင်း မြေမြုပ်မိုင်း စောင့်ကြည့်လေ့လာအဖွဲ့Landmine & Cluster Munition Monitor မှ ပြောဆိုထားသည်။
Leave a Comments