သျှမ်းပြည် လားရှိုးမြို့နယ်အတွင်းရှိ စစ်ကောင်စီတပ်မှ ညီနောင်မဟာမိတ်တပ်များ ထိန်းချုပ်ထားသည့် မြို့နယ်များသို့ ရိက္ခာနှင့်ဆေးဝါးများ မရောက်နိုင်ရန် လမ်းကြောင်းဖြတ်တောက်နေကြောင်း စုံစမ်းသိရသည်။
ဇန်နဝါရီလ တတိယပတ်မှ စတင်ပြီး လားရှိုးမြို့ရှိ စစ်ကောင်စီတပ်သည် ညီနောင်မဟာမိတ်တပ်များ သိမ်းပိုက်ထိန်းချုပ်ထားသည့် မြို့နယ်များအတွင်း ဖြတ်သန်းပြေးဆွဲနေသော ခရီးသည်တင်ယာဉ်များကို တင်းတင်းကျပ်ကျပ် စစ်ဆေးလာပြီး သွားလာနေသည့်လမ်းကြောင်းများကို လိုက်လံပိတ်ပင်ခြင်းနှင့် မိုင်းထောင်ခြင်းများ ပြုလုပ်နေကြောင်း လားရှိုး-မူဆယ် ခရီးစဉ် ပြေးဆွဲနေသည့် ကားသမားများက ပြောသည်။
“လမ်းမကြီးတွေပေါ်က တံတားတွေ ကျိုးကုန်တော့ သွားမရတော့ တောလမ်းကနေ ဖြတ်လမ်းရှာကြရတယ်။ အဲ့ဖြတ်လမ်းတွေကိုလည်း စစ်ကောင်စီတပ်က လိုက်ပိတ်နေတာ။ အခု အီနိုင်းကွင်းလမ်းကိုလည်း ထပ်ပိတ်ထားတော့ တော်တော်လေး အခက်အခဲဖြစ်တယ်။ လမ်းဘေးတွေမှာလည်း စစ်ကောင်စီတပ်က မိုင်းထောင်ထားတာရှိတယ်”ဟု မူဆယ်-လားရှိုး ခရီးစဉ်ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် လားရှိုး-မူဆယ် ခရီးစဉ်ကို ညီနောင်မဟာမိတ် ၃ ဖွဲ့မှ တအာင်း(ပလောင်)တပ်ဖွဲ့ TNLA သိမ်းပိုက်ထိန်းချုပ်ထားသည့် နမ့်ခမ်း၊ မန်တုံနှင့် နမ္မတူမြို့နယ်များအတွင်းရှိ တောလမ်းများမှ ဖြတ်သန်းသွားလာနေရသည်။
၎င်းလမ်းကြောင်းတလျှောက် ပြေးဆွဲနေသည့် ခရီးသည်တင်ယာဉ်များကိုလည်း နှစ်ဘက်တပ်ဖွဲ့များမှ တင်းတင်းကျပ်ကျပ် စစ်ဆေးမှုများ ရှိနေပြီး ဇန်နဝါရီလ တတိယပတ်မှ စတင်၍ လားရှိုး စစ်ကောင်စီတပ်မှ အီနိုင်းကွင်းလမ်းကို ဖြတ်သန်းသွားလာခွင့် ပိတ်ပင်လိုက်ကြောင်း လားရှိုးဒေသခံများထံမှသိရသည်။
“ဒီလမ်းကို ဘာကြောင့် စစ်ကောင်စီက ပိတ်လည်းဆိုရင် အဲ့ဘက်တကြောမှာရှိတဲ့ ညီနောင်မဟာမိတ်တပ်တွေကို ရိက္ခာဖြတ်ချင်တာ။ နမ္မတူ၊ မန်တုံ၊ နမ့်ခမ်းပေါ့။ ဘာကိုပိတ်ချင်တာလည်းဆိုတော့ သူတို့စစ်သားတွေသုံးတဲ့ ဆေးဝါးတွေပေါ့၊ ကြာရှည်ခံတဲ့ စားနပ်ရိက္ခာတွေပေါ့။ အဓိက ပိတ်ဆို့ချင်တာကတော့ ဓာတ်ဆီ၊ ဒီဇယ်ဆီ ဒီဟာပေါ့”ဟု လားရှိုးမြို့မှ အသက်(၅၀)ကျော်အရွယ်ရှိ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုး-နမ္မတူ လမ်းမကြီးပေါ်ရှိ အီနိုင်းတံတားကို စစ်ကောင်စီတပ်မှ ဒီဇင်ဘာလ ၃၁ ရက်တွင် ဗုံးဖောက်ခွဲဖျက်စီးခဲ့ပြီး ဇန်နဝါရီလ ၁၁ ရက် ညပိုင်းကလည်း လားရှိုးမြို့နယ် နားကွမ်းလုံရွာမှ တံတားတစ်စင်းကို ထပ်မံဖျက်စီးခဲ့ကြောင်း လားရှိုးမြို့ဒေသခံများထံမှ သိရသည်။
“ကုန်ကုန်ပြောရရင် ဒီဟာက ဖြတ်လေးဖြတ် ပုံစံထဲကို ဝင်သွားပြီ။ မြို့ကို သိမ်းလို့တော့ ရမယ်၊ နေလို့မရအောင် စားနပ်ရိက္ခာ ဖြတ်ပစ်မယ်ဆိုတဲ့ ပုံစံမျိုးကို သွားနေတာ။ နောက်ဆက်တွဲရလဒ်က ပြည်သူတွေပဲ ထိခိုက်တယ်ဆိုတာ ဘယ်ဘက်ကမှ မစဉ်းစားပေးကြဘူး။ နမ္မတူက နမ့်ဆန်က ပြည်သူတွေ ငတ်တော့မယ်လို့ သူတို့မစဉ်းစားဘူး။ အဓိက သူတို့ရန်သူ ငတ်ဖို့ပဲ လုပ်နေကြတာ”ဟု မူဆယ်-လားရှိုး ခရီးစဉ်ပြေးဆွဲနေသည့် ၎င်းကားသမားက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ၁၃ ရက်ကလည်း ကျောက်မဲမြို့နယ်မှ အသက်(၃၀)ဝန်းကျင် အမျိုးသားတစ်ဦးကို ညီနောင်မဟာမိတ်တပ်များအတွက် ရိက္ခာဝယ်ပေးသူဟု စွပ်စွဲကာ စစ်ကောင်စီတပ်မှ ဖမ်းဆီးခေါ်ဆောင်သွားခဲ့ပြီး ယနေ့အထိ ပြန်လည်လွတ်မြောက်လာခြင်း မရှိသေးကြောင်း ကျောက်မဲဒေသခံများမှ သိရသည်။
Leave a Comments