သျှမ်းပြည် မဘိမ်းမြို့နယ်ကို ကချင်လွတ်လပ်ရေး တပ်မတော် KIA နှင့် မဟာမိတ် ပူးပေါင်းတပ်ဖွဲ့တို့က တိုက်ခိုက် ထိန်းချုပ်ထားကြောင်း စုံစမ်းသိရသည်။
ဇန်နဝါရီလ ၂၁ ရက်တွင် မဘိမ်းမြို့မှ ရဲစခန်းသည် လက်နက်ချ အညံ့ခံလိုက်သလို စစ်ကောင်စီ၏ လက်အောက်ခံ ကင်းတပ်စခန်း နှင့် စခန်းကုန်းကိုလည်း KIA နှင့် မဟာမိတ် ပူးပေါင်း တပ်ဖွဲ့တို့က တိုက်ခိုက် သိမ်းပိုက်နိုင်ခဲ့ကြောင်း ဒေသအတွင်း သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
“တိုက်ပွဲဖြစ်တာက မနေ့တစ်နေ့ (ဇန်နဝါရီလ ၂၀) က စတာပေါ့။ KIA နဲ့ မဟာမိတ်တပ်တွေ စပြီး စစ်ကောင်စီ တပ်ကို တိုက်ခိုက်ခဲ့တာ၊ စစ်ကောင်စီကလည်း လေယာဥ်နဲ့ ဗုံးတွေကြဲချတယ်။ မြို့ထဲကနေ လက်နက်ကြီးနဲ့ လှမ်းပစ်တယ်။ ဒါပေမဲ့ မြေပြင်မှာ KIA က အသာစီးရနေတော့ မနေ့ကပွဲ တပ်တွေအကုန်ကျပြီး ရဲစခန်းလည်း လက်နက်ချ အညံ့ခံလိုက်တယ်” ဟု ဒေသအတွင်း သတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။
အာဏာသိမ်း စစ်ကောင်စီ နှင့် KIA မဟာမိတ် ပူးပေါင်းတပ်ဖွဲ့တို့၏ မဘိမ်းမြို့နယ်အတွင်း တိုက်ပွဲ ပြင်းထန်မှုကြောင့် အရပ်သားနေအိမ် အဆောက်အအုံများ ထိခိုက်ပျက်စီးမှု ရှိသည့် အပြင် အရပ်သား ထိခိုက်သေဆုံးမှုလည်း ရှိနေကြောင်း သိရသည်။
“စစ်ကောင်စီ ကျဆုံးမှုလည်း များတယ်။ ပြည်သူ ထိခိုက်သေဆုံးမှုလည်း ရှိတယ်။ စစ်ကောင်စီ လေယာဥ်နဲ့ ဗုံးကြဲလို့ နေအိမ် ၂ လုံး ထိတယ်။ ပြီးတော့ ဘယ်အဖွဲ့ကလက်နက်ကြီးလဲ မသိဘူး ၊ နောက်ထပ် အိမ်တစ်လုံးလည်း ပျက်စီးတယ်။ အခုတော့ တိုက်ပွဲငြိမ်ပြီး မြို့ကို KIA က ထိန်းချုပ်ထားတာ” ဟု အထက်ပါ သတင်းရင်းမြစ်က သျှမ်းသံတော်ဆင့်ကို ဆက်ဆိုသည်။
မဘိမ်းမြို့ကို ကချင်လွတ်လပ်ရေး တပ်မတော် KIA မှ တိုက်ခိုက် သိမ်းပိုက်နိုင်ခြင်း နှင့် ပတ်သက်ပြီး တပ်ဖွဲ့၏ ပြောရေးဆိုခွင့် ဖြစ်သူ ဗိုလ်မှူးကြီး နော်ဘူက “မဘိမ်းမြို့ကို ကျနော်တို့ KIA တို့ AA တို့ PDF ၊ KPDF တွေ အားလုံးဝိုင်းပြီးမှ တိုက်တာ ရဲစခန်းရော နောက် သူတို့ စစ်တပ်စခန်းတွေရော အကုန်လုံး သိမ်းလို့ရပြီတဲ့။ အဲဒီလောက်ပဲကျနော်တို့ ကြားပါတယ်” ဟု မီဒီယာများကို ဖြေကြားထားသည်ကိုလည်း တွေ့ရသည်။
ထို့အပြင် KIA တပ်ဖွဲ့ အနေဖြင့် မိုးမိတ်မြို့နယ်ရှိ စစ်ကောင်စီ တပ်စခန်းကိုလည်း ထိုးစစ်ဆင် တိုက်ခိုက်နေလျက်ရှိသည့် အကြောင်း သိရသည်။
Leave a Comments