သျှမ်းပြည် မိုးမိတ်မြို့ရှိ စစ်ကောင်စီတပ်စခန်း၊ ရဲစခန်းများအား ကချင်လွတ်လပ်ရေးတပ်ဖွဲ့ KIA၊ PDF ပူးပေါင်းတပ်ဖွဲ့တို့ သိမ်းပိုက်ထားနိုင်ပြီဖြစ်ကြောင်း စုံစမ်းသိရသည်။

ပြီးခဲ့တဲ့ (ဇန်နဝါရီလ ၁၈ ရက်)မှစပြီး မိုးမိတ်မြို့ရှိ စစ်ကောင်စီ တပ်စခန်း၊ ရဲစခန်းများအား ကချင်လွတ်လပ်ရေးတပ်ဖွဲ့ KIA မှ ဦးဆောင်ပြီး မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)နှင့် ပြည်သူ့ကာကွယ်ရေးတပ်ဖွဲ့ PDF တို့ ပူးပေါင်းတိုက်ခိုက်ခဲ့ရာ မြို့မရဲစခန်းအပါအဝင် တပ်စခန်းအချို့ကို ယမန်နေ့ (ဇန်နဝါရီလ ၂၁ ရက်)က သိမ်းပိုက်နိုင်ခဲ့ကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူ က သျှမ်းသံတော်ဆင့်ကိုပြောသည်။

“မနေ့ကတော့ မိုးမိတ်တပ်စခန်းတွေကို သိမ်းတယ်ဆိုတဲ့သတင်း ကျနော်တို့ ရထားပါတယ်။ ဒါပေမယ့် အောက်ခြေအချက်အလက် ပြည့်ပြည့်စုံစုံကတော့ ဘာမှမရသေးဘူး။ အဲ့ဖက်မှာ ကျနော်တို့လည်း ဖုန်းလိုင်းအဆက်အသွယ် အခက်ခဲအများကြီးရှိနေလို့လေ။ မြို့မစခန်းတို့၊ တပ်စခန်းတို့ သိမ်းလို့ရပြီဆိုတဲ့သတင်းလောက်ပဲ ကျနော်တို့ ကြားသိရပါတယ်” ဟု ဗိုလ်မှူးကြီးနော်ဘူက ပြောသည်။

သျှမ်းသံတော်ဆင့်မှ မိုးမိတ်မြို့ကို တော်လှန်းရေးတပ်ဖွဲ့များက အလုံးစုံထိန်းချုပ်နိုင်ခြင်း ရှိ၊ မရှိ မေးမြန်းခဲ့ရာမှာလည်း စစ်ကောင်စီ၏ တပ်စခန်း၊ ရဲစခန်းများကို နေရာယူထားသည့် အခြေအနေသာ ရှိသေးကြောင်း ဆက်ပြောသည်။

စစ်ကောင်စီ၏ ဝါဒဖြန့်တယ်ရီဂရမ်ချယ်နယ်များမှ မိုးမိတ်မြို့မရဲစခန်းနှင့် တပ်စခန်းများကို KIA နှင့် PDF တို့ လာရောက်တိုက်ခဲ့၍ လေကြောင်းဖြင့် ပစ်ကူခဲ့ကြောင်း ရေးသားဖော်ပြထားသည်။

မိုးမိတ်မြို့နယ်တွင် ခြေလျင်တပ်ရင်း ခလရ (၂၂၃)၊ ခလရ (၂၇၆) တပ်ရင်း၊ မြောက်ပိုင်းတိုင်း စစ်ဌာနချုပ် လက်အောက်ခံ ခြေမြန်တပ်ရင် ခမရ ( ၃၄၈) တို့အပြင် ဗန်းမော်အခြေစိုက် အမှတ် ၂၁ စစ်ဆင်ရေး ကွပ်ကွဲမှူဌာနချုပ် ဗျူဟာတစ်ခု တည်ရှိသည်။

ယင်းကဲ့သို့ မိုးမိတ်မြို့ တိုက်ပွဲအခြေအနေနှင့် ပတ်သက်၍ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) ၏ ပြန်ကြားရေးတာဝန်ခံ ရဲဘော်ကို အာကာ ကို သျှမ်းသံတော်ဆင့်မှမေးမြန်းရာမှာ “လောလောဆယ် ကျနော်ဖြေပေးလို့မရသေးဘူး” ဟု ဖြေကြားထားသည်။

လက်ရှိတွင် မိုးမိတ်မြို့တွင်း တိုက်ပွဲကြောင့် ထွက်ပြေးတိမ်းရှောင်ရသည့် စစ်ဘေးရှောင်များ ရှိသကဲ့သို့ မြို့အဝင်၊ အထွက် ပိတ်ဆို့မှုကြောင့် တိုက်ပွဲကြား ပိတ်မိနေသူများလည်း ရှိနေဆဲပင် ဖြစ်သည်။

ထွက်ပြေးတိမ်ရှောင်နေရသူ ဒေသခံတစ်ဦးက “ကျနော်တို့ ထွက်ပြေးနေရတာ တစ်ပတ်လောက် ရှိတော့မယ်။ အခုမြို့ထဲမှာ ပိတ်မိနေသူများတယ်။ ထွက်လာလို့မရတဲ့သူတွေ များတယ်။ ဖုန်းလည်း ဆက်သွယ်လို့မရဘူး။ ဖုန်းလိုင်းပိတ်ထားတယ်။ လမ်းတွေပိတ်ထားတယ်”ဟု ၎င်းကပြောသည်။

ထိုကဲ့သို့ တိုက်ပွဲကြား ပြည်သူပိတ်မိနေချိန် စစ်ကောင်စီ လေကြောင်းဖြင့် ဗုံးကြဲတိုက်ခိုက်မှုကြောင့် မိုးမိတ်ဈေးမီးလောင်တစ်ခုလုံး (ဇန်နဝါရီလ ၁၉ ရက်) ည၌ မီးလောင်သွားသည်။

အလားတူ မိုးမိတ်မြို့နယ်ရှိ စစ်ကောင်စီ (၅) မိုင်တပ်စခန်းမှနေ၍ လက်နက်ကြီးဖြင့် ပစ်ခတ်မှုကြောင့် ၈ မိုင်ရှိ ပိန်ပြစ်ရွာသို့ ကျရောက်ပေါက်ကွဲပြီး ပြည်သူ ၂ ဦး သေဆုံး၊ ၂ ဦးဒဏ်ရာရကာ နေအိမ် ၄ လုံးပျက်စီးခဲ့ကြောင်း TNLAက ထုတ်ပြန်ထားသည်။

ထို့အပြင် မိုးကုတ်နှင့် မိုးမိတ်ကြားရှိ တအာင်းတပ်ဖွဲ့ TNLA ရှိရာ (၈) မိုင်သို့ စစ်ကောင်စီက လာရောက်ထိုးစစ်ဆင်တိုက်ခိုက်ခဲ့သဖြင့် နှစ်ဖက်တပ်ဖွဲ့အကြား တိုက်ပွဲဖြစ်ပြီး စစ်ကောင်စီ၏ လက်နက် ၃ လက်သိမ်းဆည်းရမိကြောင်း ယနေ့ (ဇန်နဝါရီလ ၂၂ ရက်)က TNLA ထုတ်ပြန်ထားသည်။

ထို့အတူ မံစီမြို့နယ် မန်ဝန်းကြီးရှိ စစ်ကောင်စီတပ်စခန်းများကိုလည်း ကချင်လွတ်လပ်ရေးတပ်ဖွဲ့ KIA နှင့် ပူးပေါင်းတပ်ဖွဲ့ PDF တို့ ဝင်တိုက်ခိုက်ခဲ့၍ ယမန်နေ့ (ဇန်နဝါရီလ ၂၁ ရက်)တွင် သိမ်းပိုက်နိုင်ခဲ့ပြီး အဆိုပါ တပ်စခန်းမှ စစ်ကောင်စီတပ်သား အင်အား ၂၀၀ ခန့် လက်နက်ချအညံ့ခံခဲ့ကြောင်း သိရသည်။