သျှမ်းပြည်မြောက်ပိုင်း လားရှိုးခရိုင် မိုင်းရယ်မြို့တွင်း အခွန််ကောက်ခံမှု၊ လူထုစုဆောင်းမှု နှင့် ပတ်သက်ပြီး လူထုနှင့်တွေ့ဆုံစဉ် မန်ပန်ဌာနေ ပြည်သူ့စစ် အကြီးအကဲ တဦးက ခရီးသွားလာပြည်သူများအား တားဆီး စစ်ဆေးဖို့ ရပ်တန့်ပေးခြင်းမပြုလျှင် ပစ်သတ်ခွင့်ရှိသည်ဟု ပြောသည်။
အောက်တိုဘာလ ၃၀ ရက်နေ့က လားရှိုးခရိုင် အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်းထံ မိုင်းရယ်မြို့နယ် ဟိုယအုပ်စုဒေသခံများက စာရေးသားပေးပို့တိုင်ကြားလာရာ ထိုသို့ပါရှိကြောင်းသိရသည်။
“စက်တင်ဘာလ ၁၅ ရက်နေ့ တုန်းက ဟိုယအုပ်စု ဘုန်းကြီးကျောင်းမှာ လူထုနဲ့တွေ့ဆုံပြီး မန်ပန်ဌာနေပြည် သူ့စစ်ရဲ့ ဟိုယအုပ်စုကအကြီးအကဲ ဗိုလ်ကြီးစိုင်းသန်းက ပြောတာ။ တားလို့ မရပ်ရင်ပစ်သတ်ခွင့်ရှိ တယ်ဆိုပြီးတော့ လက်လွတ်စပယ်မပြောသင့်ဘူး။ အဲဒီမှာ လူထုနဲ့မတွေ့ခင် ၂ ရက်က စက်တင်ဘာလ ၁၃ ရက်နေ့တုန်းက အုပ်စုထဲမှာ အသုဘရှိတယ်။အဲဒီမှာ သွားကူပြီး ည ၉ နာရီလောက်မှာ အိမ်ပြန်လာတဲ့ ရွာသား လူငယ် ၂ ယောက်ကို ဟိုယအုပ်စုအထက်တန်းကျောင်းရှေ့မှာ လုံခြုံရေးတာဝန်ယူနေတဲ့ မန့်ပန်ဌာနေပြည်သူ့စစ်က တားတာ။ ရွာသား ၂ ယောက်က ဆိုင်ကယ်ချက်ချင်းမရပ်နိုင်တဲ့အပေါ် ပြည်သူ့စစ်က သေနတ်ပစ်ခြိမ်း ခြောက်တယ်။ လူကိုမထိပေမယ့် ဆိုင်ကယ်ကိုတော့ထိသွားတယ်။ လူထိရင်လည်း သေနိုင်တဲ့အနေအထား ရှိတယ်။ အဲဒီအတွက် လူထုလုံခြုံရေးကိုစိတ်ပူပန်မိတယ်။ ဒီဟာက မဖြစ်သင့်ဘူး။ ဒါကြောင့်ထပ်မဖြစ်အောင်စီစစ်ပေးဖို့ပြည်သူ့စစ်ခေါင်းဆောင်ထံကို ကျနော်တို့ အကူအညီတောင်း ဆွေးနွေးရပါလိမ့်မယ်။
ဒေသခံလူငယ် ၂ ဦးအား ရွာလယ်တွင်ပင် ပြည်သူ့စစ်တပ်ဖွဲ့က သေနတ်ပစ်ခြိမ်းခြောက်သည့်အပေါ် ဒေသခံများစိုးရိမ်ထိတ်လန့်ရသည့်အပြင် ပြည်သူ့စစ်ခေါင်းဆောင် စိုင်းသန်း ရွာသားများနှင့်တွေ့ဆုံကာ ထိုသို့ထပ်မံပြောကြားသဖြင့် လုံခြုံရေးအတွက်ပိုမိုစိုးရိမ်နေကြောင်းသိရသည်။
“ကျနော်တို့မှာ လုံခြုံရေးအတွက် တာဝန်ရှိတယ်။ မဟုတ်တာတွေလုပ်ရင် ကျနော်တို့မှာ တာဝန်ရှိတယ်။ တားလို့မရပ်ရင် ပစ်ဖို့ အထက်က ညွှန်ကြားထားပြီးသား ”- ဟု နမ့်ပေါင်တိုက်နယ် အတွင်း တာဝန်ကျသည့် ပြည်သူ့စစ်ရဲဘော် အိုက်ပန်း ကလည်းပြောသည်။
“ကလေးတွေမှားရင်လည်း အဲလိုသေနတ်ပစ်ခြိမ်းခြောက်တာတော့မလုပ်သင့်ဘူး။အသက်အန္တရာယ်နဲ့နီးတယ်။ ကလေးမိဘတွေ သို့မဟုတ်ရပ်ရွာလူကြီးတွေနဲ့တွေ့ဆုံပြီး ငြိမ်းချမ်းတဲ့နည်းနဲ့ဖြေရှင်းသင့်တယ်လို့မြင်ပါတယ်”- ဟု စိုင်းဝမ်းလျန်းခမ်းကပြောသည်။
စစ်အစိုးရ မှ လူမှုထူးချွန်ဆု အပ်နှင်းထားသည့် တန့်ယန်းမြို့နယ် အခြေစိုက် ဗိုလ်မွန်းဦးဆောင်သည့် မန်ပန်ဌာနေပြည်သူ့စစ်၏ ဒေသတွင်းအကြီးအကဲများသည် လားရှိုးမြို့နယ်၊ မိုင်းရယ်မြို့နယ်၊ တန့်ယန်းမြို့နယ် အတွင်း ကျေးလက်ဒေသခံလူထုထံမှ လုပ်အားပေးများတောင်းခံခြင်း၊ ရံပုံငွေများကောက်ခံခြင်း၊ တပ်သားသစ်များကောက်ယူခြင်း ပြုလုပ်သည့် နှစ်ဦးပိုင်းကလည်း သျှမ်းပြည်နယ်လွှတ်တော်တွင် တင်ပြဆွေးနွေးမှုများရှိသည်။
