သျှမ်းပြည် သိန္နီမြို့နယ် ကျေးရွာအုပ်ချုပ်ရေးမှူးကို ကိုးကန့်တပ်မတော် ( MNDAA) မှခေါ်ယူစစ်ဆေးပြီး ရိုက်နှက်ကာ အလောင်းကို ပြန်ပို့ခဲ့ကြောင်း စုံစမ်းသိရသည်။

သိန္နီမြို့နယ် မိုင်းလီကျေးရွာ အုပ်ချုပ်ရေးမှူးကို ဇန်ဝါရီလ ၂၀ ရက် နံနက် ၇ နာရီဝန်းကျင်တွင် MNDAAမှ လာရောက် ခေါ်ယူ စစ်ဆေးခဲ့ပြီး ရိုက်နှက်ထားသည့် ဒဏ်ရာ ဒဏ်ချက်ဖြင့် ညနေ ၃ နာရီဝန်းကျင်တွင် အလောင်း ပြန်လာပို့ခဲ့ကြောင်း ဒေသခံများက သျှမ်းသံတော်ဆင့်ကိုပြောသည်။

“MNDAA ကလူတွေနဲ့ အရင်က ကျေးရွာအုပ်ချုပ်ရေးမှူးလည်းပါတယ်။ လာခေါ်တုန်းကတော့ ကောင်းကောင်း လာခေါ်သွားတာပဲ။ လာပို့တုန်းကတော့ သူ့ကိုစစ်ဆေးတာ သွေးတိုးပြီး သေသွားတယ်လို့ပဲပြောတယ်။ သေချာကြည့်လိုက်တော့ ရိုက်ထားတဲ့ ဒဏ်ရာတွေနဲ့ ညိုမဲနေတာပဲ။ ဘာကြောင်း ကြောင့် မသိဘဲ ဘာလို့အဲ့လိုလုပ်လည်း ဆိုတာ ဘယ်သူမှ မသိရသေးဘူး”ဟု ဒေသခံ အမျိုးသားတစ်ဦးက ပြောသည်။

ထိုရိုက်နှက်ခံရ၍ သေဆုံးသွားသော အမျိုးသားသည် စိုင်းဘဌေး ဖြစ်ကြောင်း သိရသည်။

၂၀၂၃ ခုနစ်ဒီဇင်ဘာလ ၁၆ ရက် တွင် သိန္နီမြို့နယ်အတွင်းရှိ စယ်အူနှင့် နမ့်စလပ်ကျေးရွာအုပ်စုများမှ ရွာသူကြီးများကို ကိုးကန့်တပ်ဖွဲ့ (MNDAA)က ဆင့်ခေါ်ပြီး ၎င်းတို့၏ အုပ်ချုပ်ရေးယန္တရား လည်ပတ်နိုင်ရန် အရေးကြီးအချက် ၆ ချက် ပြောဆိုခဲ့သည်။

ထိုအချက်များမှာ ကိုးကန့်တပ်ဖွဲ့ထံ ဆရာဝန် နှင့် ဆရာ/ ဆရာမ စာရင်းပေးပို့ရန်၊ ကိုးကန့်စစ်သားများ ပြည်သူများကို အနိုင်ကျင့်လျှင် တိုင်ကြားရန်၊ ကိုးကန့်တပ် က ဦးဆောင်ပြီး ကူးသန်းရောင်းဝယ်ရေး အဆင်ပြေရန် လုပ်ဆောင်ပေးမည်။ ကိုးကန့်တပ် ထိန်းချုပ်နယ်မြေထဲ အခြားတပ်များက ဆက်ကြေးလာကောက်လျှင် လုံးဝ မထည့်ရန်၊ အင်တာနက်သုံးသည့် လူစာရင်းပေးရန် နှင့် မူးယစ်ဆေးဝါး၊ယာဘ သုံးသည့်သူများကို ဖမ်းမိလျှင် ပြန်မလွှတ်ပေးဘဲ စစ်သားစုဆောင်းခံရမည် ဟုအမိန့်ပေးညွှန်ကြားခဲ့သည်