လောက်ကိုင်တွင် လက်နက်ချ ခဲ့သည့် ဗိုလ်မှူးချုပ် ၆ ဦးအနက် ၃ သေဒဏ် ၃ ဦး တစ်သက်တကျွန်း စစ်ကောင်စီ အမိန့်ချ

သျှမ်း လောက်ကိုင် ဒကစတပ် ကိုးကန့်တပ် MNDAA ထံ လက်နက်ချခဲ့သည့် ဗိုလ်မှူးချုပ် ၆ ဦးကို အမိန့်မနာခံမှု၊ ပုန်ကန်မှုများ အပါအဝင် အခြား စွပ်စွဲချက်များဖြင့် နေပြည်တော် စစ်ခုံရုံးကသေဒဏ်နှင့် တသက်တကျွန်းပြစ်ဒဏ်များ ချမှတ်ခဲ့ဖြစ်ကြောင်း နေပြည်တော် စစ်ဘက်သတင်းရင်းမြစ်က ယနေ့ (ဇန်နဝါရီလ ၂၂ ရက်) တွင်ပြောသည်။

ဇန်နဝါရီလ ၄ ရက်နေ့နှင့် ဇန်နဝါရီလ ၅ ရက်တွင် လက်နက်ချခဲ့သည့် လောက်ကိုင် ဒေသကွပ်ကဲမှု စစ်ဌာနချုပ်(ဒကစ)မှ ဗိုလ်မှူးချုပ် ၆ ဦးဖြစ်သည့် ဒကစ (လောက်ကိုင်) ဒေသကွပ်ကဲရေးမှူး ဗိုလ်မှူးချုပ် မိုးကျော်သူ၊ ကိုးကန့်ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ ခေတ္တဥက္ကဋ္ဌ ဗိုလ်မှူးချုပ် ထွန်းထွန်းမြင့်၊ တပ်မ (၅၅) တပ်မမှူး ဗိုလ်မှူးချုပ် ဇော်မျိုးဝင်း၊ အမှတ် (၁၂) စစစ်ဆင်ရေးကွပ်ကဲရေးမှူး ဗိုလ်မှူးချုပ် အောင်ဇော်လင်း (သေဆုံးဟု MNDAA က ကြေညာခံရသူ)၊ အမှတ် (၁၄) စစ်ဆင်ရေးကွပ်ကဲရေးမှူး ဗိုလ်မှူးချုပ် အေးမင်းဦး၊ အမှတ် (၁၆) စစ်ဆင်ရေးကွပ်ကဲရေးမှူး ဗိုလ်မှူးချုပ် သော်ဇင်ဦး တို့ကို လားရှိုးမှ နေပြည်တော်သို့ ခေါ်ယူပြီး စစ်ခုံရုံးဖွဲ့ စစ်ဆေးကာ ပြစ်ဒဏ်များ ချမှတ်ခဲ့ခြင်း ဖြစ်သည်ဟု စစ်ရေးသတင်းရင်းမြစ်က ဆိုသည်။

“ခုရက်ပိုင်း အမိန့်ချတာပါ၊ ၃ ဦးက သေဒဏ်၊ ၃ ဦးက တစ်သက်တကျွန်း၊ နာမည် အတိအကျရရင် ထပ်ပြောပါ့မယ်” ဟု သတင်းရင်းမြစ်က ရှင်းပြသည်။

အမှတ် (၁၂) စစစ်ဆင်ရေးကွပ်ကဲရေးမှူး ဗိုလ်မှူးချုပ် အောင်ဇော်လင်း (သေဆုံးဟု MNDAA က ကြေညာခံရသူ) လည်း စစ်ခုံရုံးတင် စစ်ဆေးခံနေရပြီး ၎င်း၏ ကံကြမ္မာကိုမူ မသိရှိရသေးကြောင်း ဆိုသည်။

နေပြည်တော် စစ်ရုံး၏ သဘောတူညီမှုဖြင့် လက်နက်ချခဲ့သည့် ဗိုလ်မှူးချုပ် ၆ ဦးကို ယခုကဲ့သို့ ပြင်းထန်သည့် ပြစ်ဒဏ်များ ချမှတ်ခဲ့မှုကြောင့် တပ်တွင်း ဝေဖန်မှုများစွာ ပေါ်ပေါက်နေသည်ဟု သတင်းရင်းမြစ်က ဆက်ပြောသည်။

ယင်းသမိုင်းဝင် လူ ၄၀၀၀ ကျော် လက်လက်ချမှုကြောင့်စစ်တပ်၏ လက်နက်ခဲယမ်း ယာဉ်ယန္တရား အများအပြား ဆုံးရှုံးခဲ့ရပြီး ကိုးကန့် ခေါင်းဆောင်များနှင့် လက်နက်ချ ဗိုလ်မှူးချုပ် ၆ ဦး ထမင်းလက်ဆုံစားခဲ့သဖြင့် စစ်ခေါင်းဆောင် မင်းအောင်လှိုင် အကြီးအကျယ် ဒေါသပေါက်ကွဲခဲ့သည်ဟု သိရသည်။