သျှမ်းပြည် နမ့်ခမ်းမြို့နယ် တွင် ယနေ့ (ဇန်နဝါရီ ၂၁)ရက် နေ့လည်ပိုင်းတွင် စစ်ကောင်စီမှ လေကြောင်းဖြင့် ဗုံးကြဲတိုက်ခိုက်သဖြင့် ဒေသခံ (၂)ဦးထိခိုက်ဒဏ်ရာရရှိသည့်အပြင် နေအိမ်များလည်း ပျက်စီးမှုရှိကြောင်း စုံစမ်းသိရသည်။
နမ့်ခမ်းမြို့နယ် နောင်မလုံ ကျေးရွာ (ဇန်နဝါရီလ ၂၁ ရက်) နေ့လည် ၁၂ ကျော်တွင် စစ်ကောင်စီမှ လေကြောင်းဖြင့် ဗုံးကြဲမှုကြောင့် ဒေသခံ အမျိုးသားတစ်ဦးနှင့် အမျိုးသမီးတစ်ဦး ထိခိုက်ဒဏ်ရာရရှိခဲ့ပြီး နေအိမ်များလည်း ပျက်စီးမှုရှိခဲ့ကြောင်း နမ့်ခမ်းဒေသခံများပြောပြချက်အရသိရသည်။
” အိမ်တွေ လည်းထိတယ်၊အိမ်ရှင် နှစ်ယောက်လည်းထိသွားတယ်။နမ့်ခမ်းမှာတိုက်ပွဲတော့မရှိဘူး။လေယာဉ် နဲ့ဗုံးလာကြဲသွားတာ။ တခြားနေရာ တွေလည်း ဗုံးတွေကြဲသွားတယ်။”ဟု နမ့်ခမ်းမြို့ အသက် ၄၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုထိခိုက်ဒဏ်ရာရရှိသော အမျိုးသားသည် အသက် ၅၁ အရွယ်ရှိ စိုင်းထွန်းလှ နှင့် အသက် ၄၃ နှစ်အရွယ် နန်းခမ်းအောင် တို့ဖြစ်ကြောင်းသိရသည်။
အလားတူ နမ်းခမ်းမြို့နယ် နယ်မြေထိစပ်နေသည့် ကချင်ပြည် မန်စီမြို့နယ်၊ မန်ဝိန်းကြီရွာ တွင်လည်း စစ်ကောင်စီနှင့် ကချင်လွတ်မြောက်ရေးတပ်မတော် KIA တို့တိုက်ပွဲများပြင်ထန်ခဲ့ပြီး စစ်ကောင်စီမှ လေကြောင်းဖြင့် ပစ်ခတ်တိုက်ခိုက်မှုကြောင့် ပြည်သူနေအိမ်များ ပျက်စီးမှုရှိခဲ့ကြောင်း ဒေသခံများက သျှမ်းသံတော်ဆင့်ကိုပြောသည်။
“ကချင်စစ်သားတွေကလည်း လက်နက်ကြီး လက်နက်ငယ်တွေနဲ့ စစ်ကောင်စီတွေကို ဝင်ပစ်တာ၊ စစ်ကောင်စီတွေကလည်း လေကြောင်းတွေနဲ့ ပြန်ပစ်တော့ ပြည်သူတွေကိုလည်းထိတယ် နေအိမ် တွေကိုလည်းထိတယ်။ လက်နက်သံတွေကလည်း မနက်ကတည်းက ကြားနေရတာပဲ”ဟုတ် ဒေသခံအမျိုးသားတစ်ဦးက ပြောသည်။
ကချင်ပြည်နယ်၊ မန်စီမြို့ နယ် မန်ဝိန်းကြီးရွာ စခန်း စစ်ကောင်စီတပ်စခန်းခမရ (၄၂၄) ကို ကချင်လွတ်မြောက်ရေးတပ်မတော် KIA က ယနေ့ (ဇန်နဝါရိလ ၂၁)နံနက်တွင် တိုက်ခိုက်သိမ်းခဲ့ကြောင်း သိရသည်။
Leave a Comments