သျှမ်းပြည် သီပေါမြို့နယ်ရှိ “၁၀၂၇ စစ်ဆင်ရေး”အတွင်း ဖျက်ဆီးခံခဲ့ရသည့် တံတားများကို ပြန်လည်ပြုပြင်နိုင်ခြင်း မရှိသေးကြောင်း စုံစမ်းသိရသည်။
သီပေါမြို့နယ်အတွင်း နိုဝင်ဘာလ ၁၂ ရက်က ဗုံးခွဲဖျက်ဆီးခံခဲ့ရသည့် ကျောက်မဲ-သီပေါအကြားရှိ ကျင်သီတံတားနှင့် ဒီဇင်ဘာလ ၁ ရက်က စစ်ကောင်စီတပ်နှင့် TNLA တပ်ဖွဲ့တို့၏ နှစ်ဘက်တိုက်ပွဲအကြား အလုံးစုံဖျက်စီးခံခဲ့ရသည့် သီပေါ-လားရှိုးအကြားရှိ စဉ့်အင်တံတားတို့အား လက်ရှိအချိန်အထိ ပြန်လည်ပြုပြင်နိုင်ခြင်း မရှိသေးကြောင်း သီပေါဒေသခံများက ပြောသည်။
“အခုထိ ကျင်သီတံတားက ပြန်မပြင်ရသေးပါဘူး။ ညီနောင်မဟာမိတ်နဲ့ စစ်ကောင်စီတို့ သဘောတူညီမှု မရသေးဘူးလို့လဲ ကြားတယ်။ သူတို့နှစ်ဘက် သဘောတူညီမှု ရရင်တော့ သီပေါမြို့က ကုမ္ပဏီတစ်ခုက တာဝန်ယူပြီးတော့ ပြန်ဆောက်ပေးမယ်လို့ ပြောနေကြတယ်။ အခုအခြေအနေနဲ့တော့ မလွယ်သေးဘူး”ဟု သီပေါမြို့မှ ကုန်သည်တစ်ဦးက သျှမ်းသံတော်ဆင့်ကို ပြောသည်။
ယမန်နေ့ (ဇန်နဝါရီလ ၁၈ ရက်)က သီပေါမြို့နယ်ရှိ AAA ကုမ္ပဏီမှ ဖျက်ဆီးခံရသည့် ကျင်သီတံတားပေါ်သို့ ကျောက်မီးသွေးများ လာရောက်သွန်ချခဲ့ပြီး မြေကော်ကား(ဘက်ဟိုး)ဖြင့် ကျောက်မဲဘက်ခြမ်းရှိ ကားပေါ်သို့ ပြန်လည်ကဲ့ယူခဲ့ရာ ဒေသခံပြည်သူများမှာ ကျင်သီတံတား ပြန်လည်ပြုပြင်နေသည်ဟု ထင်ယောင်ထင်မှား ဖြစ်ခဲ့ကြောင်း သီပေါဒေသခံများက ပြောသည်။
လက်ရှိတွင် ကျောက်မဲနှင့် လားရှိုးအကြားရှိ ပြည်ထောင်စုလမ်းမကြီးပေါ်မှ ယာဉ်ကြီးယာဉ်ငယ်များ သွားလာ၍ မရသေးဘဲ မန္တလေးဘက်မှလာသော ယာဉ်များသည် နောင်ချိုမြို့မှတဆင့် ရပ်စောက်-ကျောက်ဂူ-နမ့်လန်-မိုင်းရယ်လမ်းပိုင်းဖြင့် လားရှိုးမြို့သို့ ခရီးဝေးဆက်လက်ထွက်ခွာရကြောင်း မန္တလေး-လားရှိုးခရီးစဉ် ပြေးဆွဲနေသည့် ယာဉ်မောင်းများထံမှ သိရသည်။
“အခုက အသွားအလာ အရမ်းခက်ခဲတယ်။ ခရီးသည်တွေကော ကားသမားတွေကော အကုန်လုံးအခက်အခဲဖြစ်တာ။ ပုံမှန် လားရှိုး-မန္တလေးခရီးကို လေးငါးနာရီ မောင်းရတဲ့ခရီး အခုက တကွေ့တပတ်ကြီး သွားရတော့ တချို့ ဆေးကုရမယ့် လူနာတွေဆို တော်တော်လေး ဒုက္ခရောက်ရတယ်။ တံတားပြန်ပြင်ပေးဖို့တော့ မျှော်လင့်ရတာပေါ့”ဟု မန္တလေး-လားရှိုးခရီးစဉ် ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကို ပြောသည်။
ထို့အပြင် မန္တလေးဘက်မှလာသော ယာဉ်ငယ်များအနေဖြင့် ကျောက်မဲမြို့နယ်အတွင်းရှိ နောင်ပိန်ဂုတ်တွင်း-ပုံဝိုး-ခန့်ခဲ-တာလုံ-နားမခေါ်လမ်းပိုင်းပေါ်မှ နမ္မတူမြစ်ကို ဇက်ရေယာဉ်ဖြင့် ဖြတ်ကူးပြီး နမ့်လန်မြို့မှတဆင့် မိုင်းရယ်နှင့် လားရှိုးမြို့များသို့ ဆက်လက်သွားရောက်နိုင်ကြောင်း ၎င်းကားသမားက ဆက်ပြောသည်။
လက်ရှိတွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ကူမင်းမြို့၌ တတိယအကြိမ် တွေ့ဆုံဆွေးနွေးပြီးနောက် ဇန်နဝါရီလ ၁၂ ရက်တွင် ဟိုင်ဂင်သဘောတူညီချက်ကို ရရှိခဲ့ပြီး သျှမ်းမြောက်တွင် ယာယီအပစ်အခတ် ရပ်စဲထားသည်။
ထိုအတောအတွင်း စစ်ကောင်စီနှင့် တရုတ်နိုင်ငံတို့သည် နှစ်ဘက်စလုံးက စစ်ရေးပြင်းထန်နယ်မြေရှိ နယ်စပ်ကုန်သွယ်ရေးလမ်းကြောင်း ပြန်လည်စတင်လိုကြောင်း သိရှိရပြီး တရုတ်နိုင်ငံမှ ယူနန်ပြည်နယ် ကုန်သည်ကြီးများအသင်းကလည်း ယူနန်ပြည်နယ် အစိုးရကို ဖိအားပေးနေသည်ဟု စီးပွားရေးသတင်းရင်းမြစ်များထံမှ သိရသည်။
