သျှမ်းပြည် မူဆယ်မြို့နယ် ၁၀၅ မိုင် ကုန်သွယ်ရေးဇုန်အနီးရှိ စစ်ဘေးရှောင်များကို ကူညီပံ့ပိုးမှုအဖြစ် ရက္ခိုင့်တပ်တော် AA က ဆန်ဝေငှပေးခဲ့ကြောင်း သတင်းသိရသည်။

ဇန်နဝါရီလ ၁၆ ရက် နေ့လည် (၁)နာရီခွဲခန့်မှ စတင်၍ ညနေ (၆)နာရီခန့်အထိ မူဆယ်မြို့နယ် ၁၀၅ မိုင် ကုန်သွယ်ရေးဇုံ အနီးတဝိုက်ရှိ စစ်ဘေးရှောင်ပြည်သူများကို ကူညီပံ့ပိုးမှုအဖြစ် ညီနောင်မဟာမိတ် (၃)ဖွဲ့၏ တပ်ဖွဲ့ဝင် ရက္ခိုင့်တပ်တော် AA က ဆန်ပေးဝေခဲ့ကြောင်း ယနေ့ (ဇန်နဝါရီလ ၁၈)တွင် ထုတ်ပြန်သည်။

ညီနောင်မဟာမိတ် ၃ ဖွဲ့အနေဖြင့် စစ်ဘေးဒဏ်နှင့်အတူ စားဝတ်နေရေး အခက်အခဲ ကြုံတွေ့နေရသော ပြည်သူများနှင့် တသွေးတသားတည်း ရှိနေပြီး မည်သည့်ဒေသသို့ ရောက်ရှိပါစေ လူမျိုးဘာသာမရွေး ခွဲခြားစိတ်မရှိဘဲ အတူရပ်တည်နေကြောင်း ထုတ်ပြန်ချက်ထဲတွင် ဆိုထားသည်။

မြန်မာ-တရုတ်နယ်စပ် မူဆယ်မြို့နယ်ရှိ စစ်ကောင်စီလက်အောက်ခံ ၁၀၅ မိုင် ဗျူဟာကုန်းကို ပြီးခဲ့သည့် ဒီဇင်ဘာလ ၁၅ ရက်နေ့က ညီနောင်မဟာမိတ် ၃ ဖွဲ့မှ တိုက်ခိုက်သိမ်းပိုက်ခဲ့ပြီး ၁၀၅ မိုင် စစ်တပ်ဗျူဟာကုန်းတွင် AA အလံလွှင့်ထူပြီး သိမ်းပိုက်ရရှိခဲ့သည့် တင့်ကားဖြင့် အောင်ပွဲခံနေပုံကို AA စစ်ဦးစီးချုပ်က လူမှုကွန်ယက်တွင် ထုတ်ပြန်ခဲ့သည်။

အလားတူ မူဆယ်မြို့နယ်အတွင်း ကျင်စန်းကျော့ နယ်စပ်ဂိတ်ကိုလည်း နိုဝင်ဘာလ ၂၅ ရက်နေ့က ကိုးကန့်တပ်ဖွဲ့ MNDAA မှ ထိန်းချုပ်ထားနိုင်ခဲ့သည်။

“အဲ့ဘက်မှာက ဖုန်းလိုင်းမရဘူး ဖြစ်နေတာ။ TNLA နဲ့ MNDAA က မူဆယ် ၁၀၅ မိုင်မှာ ဘယ်သူထိုင်မလဲဆိုတာ အချေအတင် ဖြစ်နေတယ်လို့တော့ ကြားတယ်။ အခုတော့ AA နဲ့ PDF တပ်တွေ စခန်းထိုင်ထားတယ်”ဟု မူဆယ်မြို့မှ အမည်မဖော်လိုသူ ကုန်သည်တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ကူမင်းမြို့၌ တတိယအကြိမ် တွေ့ဆုံဆွေးနွေးခဲ့ပြီးသည်။

ထိုဆွေးနွေးပြီးနောက် ဇန်နဝါရီလ ၁၁ ရက်တွင် ဟိုင်ဂင်သဘောတူညီချက်ကို ရရှိခဲ့ပြီး သျှမ်းမြောက်တွင် ယာယီအပစ်အခတ် ရပ်စဲထားသော်လည်း ရက္ခိုင့်တပ်တော် AA လှုပ်ရှားနေသည့် ရခိုင်ပြည်နယ်တွင် စစ်ကောင်စီတပ်နှင့် တိုက်ပွဲဆက်လက်ပြင်းထန်နေသည်။