သျှမ်းပြည် ကွတ်ခိုင်မြို့နယ် နမ့်ဖတ်ကာကျေးရွာတွင် စစ်ကောင်စီနှင့် ကချင်လွတ်မြောက်ရေးတပ်မတော် (KIA) တို့၏ နှစ်ဘက်တိုက်ပွဲ ၃ ပတ်ကျော်အတွင်း အရပ်သား ၁၀ ဦးထက်မနည်း ထိခိုက်သေဆုံးခဲ့ကြောင်း စုံစမ်းသိရသည်။
ဒီဇင်ဘာလ နောက်ဆုံးပတ်မှ စတင်ပြီး ယနေ့ (ဇန်နဝါရီလ ၁၈ ရက်)အထိ ကွတ်ခိုင်မြို့နယ် နမ့်ဖတ်ကာအခြေစိုက် စစ်ကောင်စီတပ် ခလရ-၁၂၃ ကို ကချင်လွတ်မြောက်ရေးတပ်မတော် (KIA) မှ ထိုးစစ်ဆင် တိုက်ခိုက်နေပြီး နှစ်ဘက်ထိတွေ့တိုက်ပွဲ ပြင်းထန်ခဲ့သည့် ၃ ပတ်တာကာလအတွင်း လက်နက်ကြီးနှင့် လေကြောင်းတိုက်ခိုက်မှုများကြောင့် အရပ်သား ၁၀ ဦးထက်မနည်း သေဆုံးခဲ့ပြီး အများအပြား ထိခိုက်ဒဏ်ရာရရှိခဲ့ကြောင်း နမ့်ဖတ်ကာဒေသခံများက ပြောသည်။
“နမ့်ဖတ်ကာမှာ သေဆုံးတာ ၉ယောက်လောက်ရှိပြီ။ ဒဏ်ရာရသူကတော့ ဘယ်လောက်လဲတော့ မသိသေးဘူး။ အများအားဖြင့် မရှောင်ဘဲနဲ့ ကျန်ခဲ့တဲ့လူတွေ အိမ်စောင့်တွေ ထိတာ”ဟု နမ့်ဖတ်ကာရွာမှ ထွက်ပြေးတိမ်းရှောင်နေရသည့် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထိုထဲမှ နမ့်ဖတ်ကာကျေးရွာ ရပ်ကွက် ၂ တွင် နေထိုင်သည့် အသက် ၃၀ ဝန်းကျင်ရှိ အိုက်ဆမ် နှင့် ခယ်မ တို့သည် ရွာ၌ မနေရဲသဖြင့် ထွက်ပြေးတိမ်းရှောင်နေချိန် ပစ်သတ်ခံခဲ့ရသည်။
ဇန်နဝါရီလ ၁၆ ရက်တွင်လည်း နမ့်ဖတ်ကာကျေးရွာကို လာရောက်တိုက်ခိုက်သည့် စစ်ကောင်စီတပ် ဂျက်ဖိုက်တာ တိုက်လေယာဉ်မှ ဗုံးကြဲတိုက်ခိုက်မှုကြောင့် အရပ်သားထိခိုက်သေဆုံးပြီး နေအိမ်အများအပြား ပျက်စီးဆုံးရှုံးခဲ့ကာ ၎င်းတိုက်လေယာဉ်ကို KIA တပ်ဖွဲ့မှ မနော်ယာန်အနီး ပစ်ချနိုင်ခဲ့သည်ဟု နမ့်ဖတ်ကာဒေသခံများက ပြောသည်။
“၁၆ ရက်က လေယာဉ်ဗုံးကြဲလို့ ရပ်ကွက် ၃ ဘက် လမ်းလျှောက်လာတဲ့ အမျိုးသား နှစ်ယောက်ထိတယ်။ အိမ်တွေတော့ တော်တော်များများ ပျက်စီးကုန်ပြီ၊ လေယာဉ်ပျက်ကျတာ မနော်ယာန်ရွာမ ဘက်လို့ပြောတယ်။ လေယာဉ်ကျတာ မြင်တယ်”ဟု နမ့်ဖတ်ကာမှ ၎င်းဒေသခံအမျိုးသမီးက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ဇန်နဝါရီလ ဒုတိယပတ်မှ စတင်ပြီး နမ့်ဖတ်ကာကျေးရွာမှ ဒေသခံပြည်သူများသည် စစ်ကောင်စီတပ်နှင့် KIA တပ်ဖွဲ့တို့၏ နှစ်ဘက်တိုက်ပွဲများကြောင့် နီးစပ်ရာကျေးရွာများသို့ ထွက်ပြေးတိမ်းရှောင်နေရပြီး စားနပ်ရိက္ခာနှင့် ဆေးဝါး အခက်အခဲများ ကြုံတွေ့နေရကြောင်း ဒေသခံများထံမှ သိရသည်။
ထို့ကြောင့် စစ်ရှောင်များသည် မိုင်းယု၊ နမ့်အွန်၊ မော်ဆောင်း၊ မန်နိမ်း၊ ဟိုမော၊ နားငင်းကျေးရွာဘက်သို့ ထွက်ပြေးတိမ်းရှောင်နေရပြီး နမ့်ဖတ်ကာကျေးရွာရှိ ဒေသခံ ၉၀ ရာခိုင်နှုန်း ထွက်ပြေးတိမ်းရှောင်နေရကြောင်း နမ့်ဖတ်ကာမှ စစ်ရှောင်အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“စစ်ရှောင်တွေကတော့ တောထဲတောင်ထဲမှာဆိုတော့ အစားအစာ အခက်အခဲတွေ့တယ်။ ဆောင်းတွင်းဆိုတော့ အေးမယ်၊ စားစရာပြတ်တော့ ရွာထဲလည်း ပြန်ယူမရဘူး”ဟု ၎င်းဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
“၁၀၂၇ စစ်ဆင်ရေး” သုံးလနီးပါးကာလအတွင်း ကွတ်ခိုင်မြို့နယ်တွင် စစ်ကောင်စီ၏ လက်နက်ကြီး နှင့် လေကြောင်းဗုံးကြဲမှုကြောင့် အမျိုးသမီး ၁၀ ဦးနှင့် ကလေး ၆ ဦး အပါအဝင် စုစုပေါင်း ၃၄ ဦး သေဆုံးပြီး ၅၀ ဦးထက်မနည်း ထိခိုက်ဒဏ်ရာရရှိခဲ့ကြောင်း ကွတ်ခိုင်ဒေသခံများထံမှ သိရသည်။
