သျှမ်းပြည် နမ့်ခမ်းမြို့နယ်တွင် တအာင်း(ပလောင်) အမျိုးသား လွတ်မြောက်ရေးတပ်မတော် (TNLA) က လူဦးရေစာရင်း သိရှိနိုင်ရန် သန်းခေါင်စာရင်း ကောက်ယူသွားမည်ဖြစ်ကြောင်း စုံစမ်းသိရသည်။
ဇန်နဝါရီလ ၁၅ ရက် နေ့လယ် ၁ နာရီဝန်းကျင်တွင် နမ့်ခမ်းမြို့ စည်ပင်သာယာရေးရုံးတွင် TNLA တပ်ဖွဲ့၏ အထွေထွေအုပ်ချုပ်ရေးဌာနက နမ့်ခမ်းမြို့နယ်အတွင်းရှိ ကျေးရွာဥက္ကဋ္ဌနှင့် အုပ်ချုပ်ရေးမှူးများကို ဒုတိယအကြိမ် အစည်းအဝေးခေါ်ယူခဲ့သည်။
ထိုကဲ့သို့ အစည်းအဝေး ခေါ်ယူစဉ် TNLA တပ်ဖွဲ့၏ နမ့်ခမ်းမြို့နယ်မှူး ဆိုသူ မိုင်းအိုက်ယီ(ခ) တာ့တောင်တန်း က နမ့်ခမ်းမြို့နယ်အတွင်းရှိ လူဦးရေစာရင်း သိရှိနိုင်ရန် မကြာခင်အချိန်အတွင်း ကျေးရွာတိုင်းကို သန်းခေါင်စာရင်း လိုက်လံကောက်ယူမည်ဟု ပြောကြားခဲ့ကြောင်း နမ့်ခမ်းမြို့ဒေသခံများက ပြောသည်။
“အဓိက အွန်လိုင်းပေါ်က သတင်းတွေကို မယုံကြဖို့၊ အတူနေတိုင်းရင်းသားတွေ စည်းလုံးညီညွတ်ကြဖို့၊ နမ့်ခမ်းမြို့ ဖွံ့ဖြိုးတိုးတက်ဖို့ ကူညီလုပ်ဆောင်ကြဖို့ ဒါတွေပြောတယ်။ မကြာခင်မှာ TNLA ကလူတွေ ရွာတိုင်းကို သန်းခေါင်စာရင်း လိုက်ကောက်မယ်၊ စစ်သားကောက်ဖို့မဟုတ်ဘူး၊ လူဦးရေ ဘယ်လောက်ရှိလဲဆိုတာ သိရဖို့ဆိုပြီးတော့ ပြောတာပေါ့”ဟု နမ့်ခမ်းမြို့မှ ၎င်းအစည်းအဝေးသို့ သွားတက်ရောက်ခဲ့သည့် ကျေးရွာဥက္ကဋ္ဌနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
ထို့အပြင် TNLA တပ်ဖွဲ့အနေဖြင့် အခြားလူမျိုးများအပေါ် တပ်သားသစ် စုဆောင်းခြင်း လုံးဝ မလုပ်ဆောင်ပါကြောင်း၊ လက်ရှိ ဥက္ကဋ္ဌနဲ့ အုပ်ချုပ်ရေးမှူးများလည်း နဂိုအတိုင်း တာဝန်ထမ်းဆောင်ခွင့်ရှိမည်ဖြစ်ကြောင်း စသည်တို့ကို နမ့်ခမ်းမြို့နယ်မှူးဆိုသူ မိုင်းအိုက်ယီ(ခ) တာ့တောင်တန်းက ရှင်းလင်းပြောကြားခဲ့ပြီး နမ့်ခမ်းရဲမှူးဆိုသူ တာ့နော်လိန်းကလည်း ဥပဒေ လိုက်နာကြရန် တိုက်တွန်းပြောဆိုခဲ့သည်ဟု အစည်းအဝေး တက်ရောက်သူများနှင့် နီးစပ်သည့် ၎င်းနမ့်ခမ်းဒေသခံက ဆက်ပြောသည်။
ယခုကဲ့သို့ TNLA တပ်ဖွဲ့က နမ့်ခမ်းမြို့နယ်အတွင်း ရပ်ကွက်/ကျေးရွာ အုပ်ချုပ်ရေးမှူးများကို ဒုတိယအကြိမ် အစည်းအဝေး ခေါ်ယူခဲ့ခြင်းနှင့် ပတ်သက်ပြီး သျှမ်းသံတော်ဆင့်က TNLA တပ်ဖွဲ့၏ ပြောရေးဆိုခွင့်ရှိသူရုံးသို့ ဆက်သွယ်မေးမြန်းသော်လည်း လက်ရှိအချိန်ထိ ပြန်လည်ဖြေကြားခြင်း မရှိသေးပေ။
အလားတူ ဇန်နဝါရီလ ဒုတိယပတ်အတွင်းကလည်း နမ့်ခမ်းမြို့ရှိ ရွှေလီမြစ်အတွင်း လှေဆိပ်များတွင် လေလံဆွဲသူများ၊ သားငါးနှင့် ကုန်စည်ဒိုင်များမှ လေလံဆွဲသူများအပြင် စီးပွားရေးလုပ်ငန်းရှင်များကိုလည်း TNLA တပ်ဖွဲ့က ဆင့်ခေါ်ပြီး အခွန်ကိစ္စများ ဆွေးနွေးခဲ့သည်ဟု နမ့်ခမ်းမြို့မှ အမည်မဖော်လိုသည့် ကုန်သည်တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ၁၂ ရက်တွင် ကျရောက်သည့် ၆၁ နှစ်မြောက် တအာင်းတော်လှန်ရေးနေ့ ဂုဏ်ပြုမိန့်ခွန်းထဲတွင် TNLA တပ်ဖွဲ့ဉက္ကဋ္ဌ ဒုဗိုလ်ချုပ်ကြီး တားအိုက်ဘုန်းက ဒေသခံတိုင်းရင်းသားလူမျိုး မခွဲခြားဘဲ တရားမျှတမှုရှိသည့် ဉပဒေများ ရေးဆွဲပြဋ္ဌာန်းပြီး လုံခြုံရေးနှင့် အုပ်ချုပ်ရေး ယန္တရားအသစ် စတင်လည်ပတ်နိုင်အောင် လက်တွေ့ ဖော်ဆောင်သွားမည်ဖြစ်ကြောင်း ပြောကြားထားသည်။
