သျှမ်းပြည် လားရှိုးမြို့နယ် ပန်နားကျေးရွာအုပ်စု ဝိန်းစုံရွာနေ အမျိုးသားတစ်ဦးသည် မီးသွေးသွား ရောင်းပြီး ပြန်လာစဉ်လမ်းတွင် စစ်ကောင်စီဂိတ်ရှိ စစ်သားများ၏ ပစ်ခတ်ခြင်းခံလိုက်ရသဖြင့် ပွဲချင်းပြီးသေဆုံးသွားခဲ့ ကြောင်း စုံစမ်းသိရသည်။
ယမန်နေ့ (ဇန်နဝါရီလ ၁၆ ရက်) ည ၇ နာရီဝန်းကျင်တွင် လားရှိုးမြို့နယ် ပန်နားကျေးရွာ အုပ်စု ဝိန်းစုံရွာနေ အမျိုးသားတစ်ဦးသည် မီးသွေးသွားရောင်းပြီး အလောတကြီးအိမ်ပြန်လာစဉ် AD ဂိတ်တွင်ရှိသည့် စစ်ကောင်စီ တပ်သားက ၎င်းကိုသေနတ်ဖြင့် ပစ်ခတ်၍ ထိုနေရာ၌ပွဲချင်းပြီး သေဆုံးသွားခဲ့ကြောင်း ဒေသခံတစ်ဦး သျှမ်းသံတော်ဆင့်ကို ပြောသည်။
“သူကမီးသွေးသွားရောင်းတာ။ တစ်ခေါက်သွားရောင်းပြီး နှစ်ခေါက်မြောက်အိမ်ကိုအလောတကြီးနဲ့ ပြန်လာတဲ့အချိန် ADတံတားမှာရှိတဲ့ စစ်သားက သူတို့ရပ်ဖို့ပြောတာ။ သူကမကြားတာလားတော့ မသိဘူး။ အဲ့ဒါမရပ်လို့ဆိုပြီး တစ်ချက်ပစ်လိုက်တာ။ အဲ့တုန်းကမထိသေးဘူး။ သူကမိုင်းယော်လမ်းခွဲ-AD ဂိတ်ကို ရောက်လာတဲ့အချိန်မှာ စစ်သားတွေ ထပ်ပစ်ပြီးထိသွားတာ။ အဲ့မှာပဲ ပွဲချင်းပြီးသွားတယ်” ဟု ၎င်းဒေသခံတစ်ဦးက ပြောသည်။
ပစ်ခတ်ခံရပြီး သေဆုံးသွားသူသည် အသက် ၄၀ နှစ်ခန့် အမျိုးသားတစ်ဦးဖြစ်သည်။ ထိုကဲ့သို့ ပစ်ခတ်ခံရပြီး သေဆုံးသွားပြီးနောက် ၎င်း၏အလောင်းကိုလည်း စစ်ကောင်စီတပ်ဖွဲ့မှ ကားဖြင့်လာရောက် သယ်ယူသွားခဲ့သဖြင့် မိသားစုဝင်များက အလောင်းပြန်မရခဲ့ကြောင်း ဆိုသည်။
လားရှိုးမြို့ဒေသခံတစ်ဦးက “ဒီလိုဖြစ်သွားတာတော့ စိတ်မကောင်းဘူး။ အခုအခြေအနေ မကောင်းတာနဲ့ ကျနော်တို့မှာအသွားအလာဂရုစိုက်နေရတယ်။ တစ်ခါတစ်လ ခေါ်တာမကြားလို့ အခုလိုပစ်လိုက်တာ ကျနော်တို့အတွက် အရမ်းအန္တရာယ်များတယ်။ ကျနော်တို့လည်း ခေတ်ပျက်ကြားထဲမှာ အလုပ်ရှာရတာ အချိန်မေ့ကောင်းမေ့လိမ့်မယ်။ အဲ့လိုဖြစ်ရင်တော့ ကောင်းကောင်း မွန်မွန်ခေါ်ပြောဖို့ လိုတာပေါ့ဗျာ” ဟု ၎င်းကထပ်လောင်းပြောသည်။
အလားတူ ဒီဇင်ဘာလအတွင်းကလည်း ကွတ်ခိုင်မြို့မှ လူငယ် ၂ ဦးကို စစ်ကောင်စီမှ ပစ်ခတ်ခဲ့ပြီး ဆေးရုံအရောက်တွင် သေဆုံးသွားခဲ့သည်။
ထို့အပြင် ဇန်နဝါရီလ ၁၅ ရက်တွင် လားရှိုးမြို့ ရပ်ကွက် (၇) အတွင်းရှိ ရွှေလဝင်း စားသောက်ဆိုင်အနီးရှိ ရေမြောင်းထဲ၌ အမျိုးသားတစ်ဦး သေဆုံးခဲ့သည်။
Leave a Comments