သျှမ်းပြည် ကျောက်မဲခရိုင်၊ နမ္မတူမြို့ကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) က တိုက်ခိုက်ထိန်းချုပ်ပြီးနောက်ပိုင်းတွင် လျှပ်စစ်မီး မီတာခများကို စတင်ကောက်ယူ နေကြောင်း စုံစမ်း သိရသည်။
ပြီးခဲ့သည့် ဇန်နဝါရီလ ၁၁ ရက်တွင် နမ္မတူမြို့နယ်အတွင်း ထိန်းချုပ်နေရာယူထားသည့် တအာင်းတပ် ( TNLA) က ဒေသခံများကို အစည်းအဝေးခေါ်ယူပြီး မီတာခများကို ၎င်းတို့မှ စတင်ကောက်ယူသွားတော့မည်ဟု ပြောဆိုခဲ့ ကြောင်း လုံခြုံရေး အရ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အဓိကကတော့ ရပ်ကျေး ဥက္ကဌတွေ၊ ရွာလူကြီးနဲ့ ရပ်မိရပ်ဖတွေအားလုံးကို စုခေါ်ပြီး အစည်းအဝေး လုပ်တာ ။ သူတို့ ပြောတာ မီတာခကို ဒီလ ကစ သူတို့က စကောက်သွားတော့မယ်တဲ့ ၊ (၂) လပိုင်းကုန်တဲ့ အထိ တစ်အိမ် ကို မြန်မာငွေကျပ် (၅၀၀၀) ကောက်မယ်၊ အဲ့ဒီနောက်မှာတော့ ယူနစ်ပေါ် မူတည်ပြီး ကောက်ယူ သွားမှာလို့ ပြောတယ်” ဟု လုံခြုံရေး အရ အမည်မဖော်လိုသူ ဒေသခံအမျိုးသားတစ်ဦးက သျှမ်းသံတော်ဆင့် ကို ပြောသည်။
မီတာခများကို တအာင်းတပ် (TNLA) မှ တစ်လလျှင် တစ်အိမ် (၅၀၀၀) ကျပ်ဖြင့် ကောက်ယူသွားမည်ဖြစ်ပြီး လက်ရှိ၌ လျှပ်စစ်ရုံးဝန်ထမ်းများ၊ ဌာနဆိုင်ရာများမှ ဝန်ထမ်းများကိုလည်း ၎င်းတို့၏ လူဖြင့် အစားထိုးခန့်အပ်မှု ရှိနေကြောင်းလည်း ဒေသခံများက ပြောသည်။
ထို့အပြင် အစည်းအဝေး၌ TNLA မှ နမ္မတူမြို့အတွင်းရှိ ကျေးရွာများကို တစ်ရွာလျှင် အိမ်ခြေ အနည်းဆုံး (၁၀၀) ရှိအောင် ပြန်လည်ဖွဲ့စည်း တည်ဆောင်သွားမည့် အကြောင်းလည်း ပြောဆိုခဲ့ကြောင်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
“တစ်ရွာကို အိမ်ခြေ (၁၀၀) ရှိအောင် လုပ်ရမယ်တဲ့၊ နီးစပ်တဲ့ ကျေးရွာ ၂/၃ ရွာ ဖြစ်ဖြစ်၊ ၃/၄ ရွာဖြစ်ဖြစ် စုပေါင်းပြီး တစ်ရွာကို အိမ်ခြေ (၁၀၀) ရှိအောင် လုပ်ရမယ်တဲ့၊ အဲ့မှာ ဒေသခံတွေကတော့ ကန့်ကွက်ပါတယ်။ မိမိတို့ရွာကို ဖျက်သိမ်း ပြောင်းရွှေ့ပြီးဖို့က မလွယ်တဲ့ ကိစ္စဖြစ်တယ်လေ” ဟု အစည်းအဝေး သွားတက်သည့် အသက် ၄၀ကျော် အမျိုးသားတစ်ဦး ကထပ်လောင်းပြောသည်။
နမ္မတူမြို့အတွင်းရှိ ကျေးရွာ/ အုပ်စု အများစုသည် အိမ်ခြေ ၃၀ မှ ၇၀ ဝန်းကျင်အထိသာ ရှိကြသည့်အတွက် အိမ်ခြေ (၁၀၀) ပြည့်ရန် ကျေးရွာများ စုပေါင်းနိုင်ရေးအတွက် ကျေးရွာအကွာအဝေး၊ တည်ရှိမှု အခြေအနေများတို့ကြောင့် မလွယ်ကူကြောင်း ဒေသခံများက ဆက်ပြောသည်။
တအာင်းတပ် (TNLA) သည် ပြီးခဲ့သည့် ၂၀၂၃ ခုနှစ် ဒီဇင်ဘာလ ၁၅ ရက်နေ့တွင် နမ္မတူမြို့ရှိ စစ်ကောင်စီ တပ်စခန်းကို တိုက်ခိုက်သိမ်းယူပြီး နမ္မတူမြို့တွင်း နေရာယူ ထိန်းချုပ်ခဲ့ခြင်း ဖြစ်သည်။
အထက်ပါ အကြောင်းအရာများ နှင့် ပတ်သက်ပြီး အသေးစိတ် မေးမြန်း သိရှိနိုင်ရန် အတွက် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၏ ပြောရေးဆိုခွင့်ထံသို့ ဆက်သွယ်ခဲ့သော်လည်း အဆက်အသွယ်မရခဲ့ပေ။
