သျှမ်းပြည် လားရှိုးမြို့တွင် ထွက်ပြေးတိမ်းရှောင်နေရပြီး နေရပ်မပြန်နိုင်သေးသည့် စစ်ဘေးရှောင် ဦးရေ ၁၀၀၀ ကျော်အတွက် စားနပ်ရိက္ခာများ အရေးပေါ်လိုအပ်နေကြောင်း စုံစမ်းသိရသည်။

လားရှိုးမြို့နယ်တွင် “၁၀၂၇ စစ်ဆင်ရေး”စတင်စဉ်ကတည်းက မန်ဆူသျှမ်းကျောင်းသို့ ထွက်ပြေးတိမ်းရှောင်လာပြီး နေရပ်မပြန်နိုင်သေးသည့် စစ်ဘေးရှောင်များနှင့် သိန္နီမြို့မှ လားရှိုးမြို့သို့ ထပ်မံတိမ်းရှောင်လာသည့် စစ်ဘေးရှောင်ဦးရေ ၁၀၀၀ ကျော်အတွက် စားနပ်ရိက္ခာ အရေးပေါ် လိုအပ်နေကြောင်း လားရှိုးမြို့မှ စစ်ဘေးရှောင်ကူညီနေသူများက ပြောသည်။

“အခုက မန်ဆူသျှမ်းကျောင်းမှာ စစ်ဘေးရှောင်က လူဦးရေအားဖြင့် ၁၀၀၀ ကျော် ကျန်သေးတယ်။ ရေရှည်ဖြစ်လာတယ်ဆိုတော့ ဆန်က ခက်ခဲလာတယ် ။ အစပိုင်းတုန်းကတော့ လာလှူတဲ့လူများတယ်၊ အခုက ကူညီတဲ့လူ နည်းသွားပြီ။ ရိက္ခာကတော့ တဖြည်းဖြည်းနဲ့ နည်းလာပြီ၊ အဓိက လိုအပ်နေတာကတော့ ဆန်ပေါ့”ဟု လားရှိုးမြို့မှ စစ်ဘေးရှောင်များကို ကူညီနေသူတစ်ဦးက သျှမ်းသံတော်ဆင့်ကို ပြောသည်။

လားရှိုးမြို့ရှိ သီရိမင်္ဂလာ မန်ဆူသျှမ်းကျောင်းတွင် “၁၀၂၇ စစ်ဆင်ရေး” စတင်သည့် အောက်တိုဘာလ ၂၇/၂၈ ရက်ကတည်းက စစ်ဘေးရှောင်ဦးရေ ၃၀၀၀ ကျော် ရောက်ရှိလာပြီး လားရှိုးမြို့နယ်အတွင်း နှစ်ဘက်တိုက်ပွဲ ပြင်းထန်ခဲ့သည့် နိုဝင်ဘာလအတွင်း စစ်ဘေးရှောင်ဦးရေ ၅၀၀၀ ကျော်အထိ လာရောက်ခိုလှုံခဲ့ရကြောင်း လားရှိုးမြို့ဒေသခံများထံမှ သိရသည်။

“တိုက်ပွဲစဖြစ်ကတည်းက အခုထိဆိုရင် ၃ လ နီးပါးရှိပြီပေါ့။ အခုလက်ရှိကတော့ စစ်ဘေးရှောင် ၁၀၀၀ ကျော်ပဲ ကျန်တော့တယ်။ အိမ်ထောင်စုအားဖြင့် ၂၃၅ စု ရှိတယ်။ ကန်မိန်း၊ တာပုံ၊ ဟိုပိတ်၊ ရိပ်သာကျောင်း ဒီမှာရှောင်နေကြတာ မပါသေးဘူး။ သိန္နီကျောင်းခမ်းက စစ်ဘေးရှောင်တွေလဲ အကုန်လုံး မန်ဆူကျောင်းကို ရောက်နေတယ်၊ သူတို့က အိမ်လဲ မပြန်နိုင်ကြတော့ဘူးလေ”ဟု လားရှိုးမြို့ စစ်ဘေးရှောင် ကူညီနေသူတစ်ဦးက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဒီဇင်ဘာလအတွင်းက ညီနောင်မဟာမိတ်နှင့် စစ်ကောင်စီတို့သည် တရုတ်နိုင်ငံ ကူမင်းမြို့၌ ပထမအကြိမ် တွေ့ဆုံခဲ့ပြီးနောက် စစ်အာဏာသိမ်းခေါင်းဆောင် မင်းအောင်လှိုင် လားရှိုးမြို့သို့ ရောက်ရှိလာပြီး မြို့ပေါ်ရှိ စစ်ဘေးရှောင်စခန်းများကို ဘုန်းကြီးကျောင်းတစ်ကျောင်းနှင့် ခရစ်ယာန် ဘုရားကျောင်းတစ်ကျောင်းတို့တွင်သာ စုစည်းထားရှိရန် ညွှန်ကြားခဲ့ခြင်းကြောင့် စစ်ဘေးရှောင်များမှာ တိုက်ပွဲကြားနေရပ်ပြန်သူနှင့် ဘေးလွတ်ကင်းရာသို့ ထပ်မံတိမ်းရှောင်သွားကြသည်ဟု လားရှိုးမြို့ဒေသခံများက ပြောသည်။

“တချို့စစ်ရှောင်တွေလည်း ကုန်းသာ၊ ဟိုနား၊ ပန်စုံ ဒီဘက်ရွာတွေက ပြန်သွားကြပေမယ့် အိမ်မှာ မနေရဲကြဘူး။ နှစ်ဘက်လုံးက ယာယီအပစ်ရပ်တယ် ပြောပြီး မြေပြင်မှာက နှစ်ဘက်တပ်တွေက နီးနီးကပ်ကပ် ရှိနေကြတာ။ တိုက်ပွဲထပ်ဖြစ်မှာ စိတ်ပူနေရတာပေါ့။ တချို့ကြတော့ ဘေးလွတ်မယ်ထင်တဲ့ နေရာကို ဆက်သွားကြတာလဲရှိတယ်”ဟု လားရှိုးမြို့မှ အသက် ၄၀ နှစ်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

ဇန်နဝါရီ ပထမပတ်ကလည်း ညီနောင်မဟာမိတ်တပ်များက လောက်ကိုင်မြို့ကို သိမ်းပိုက်နိုင်ခဲ့ပြီးနောက် လားရှိုးမြို့ဒေသခံ အများအပြားလည်း မြို့ဆက်လက်သိမ်းပိုက်ခံရမည်ကို စိုးရိမ်ထိတ်လန့်သောကြောင့် လားရှိုး-မိုင်းရယ်လမ်းမှတဆင့် ဘေးလွတ်ရာသို့ ထပ်မံတိမ်းရှောင်သွားကြောင်း သိရသည်။