တရုတ်နိုင်ငံ ကြားဝင်ညှိနှိုင်းမှုကြောင့် ညီနောင်မဟာမိတ်သုံးဖွဲ့နှင့် စစ်ကောင်စီတို့သည် တွေ့ဆုံခဲ့ပြီး သျှမ်းပြည်မြောက်ပိုင်းဒေသ တိုက်ပွဲတွင် နှစ်ဖွဲ့အကြားယာယီအပစ်ခတ်ရပ်စဲမည်ဟု သဘောတူကြသော်လည်း လက်ရှိအချိန်ထိ မြေပြင်၌ တိုက်ပွဲကြောင့် ဒေသခံများထွက်ပြေးတိမ်းရှောင်ရဆဲဖြစ်ကြောင်း သိရသည်။

ညီနောင်မဟာမိတ်သုံးဖွဲ့နှင့် စစ်ကောင်စီတို့အကြား ယာယီအပစ်ခတ်ရပ်စဲရေး ကြေညာပြီး (၅) ရက်အတွင်း နောင်ချို၊ ကျောက်မဲ၊ နမ့်ဆန်၊ နမ္မတူ၊ ကွတ်ခိုင်၊ လားရှိုး နှင့် မူဆယ်မြို့နယ်တို့မှာ စစ်ကောင်စီက လေကြောင်းဖြင့် သော်လည်းကောင်း၊ လက်နက်ကြီးဖြင့်သော်လည်းကောင်း တိုက်ခိုက်မှုပြု လုပ်နေဆဲကြောင်း TNLAမှ ထုတ်ပြန်ထားသည်။

အလားတူ ကျောက်မဲမြို့နယ်တွင်လည်း ယာယီအပစ်ရပ်ကြောညာအပြီး (ဇန်နဝါရီလ ၁၃ ရက်)မှာ စစ်ကောင်စီတပ်နှင့် TNLAတို့အကြား ထိတွေ့တိုက်ပွဲဖြစ်ပွားခဲ့သေးသည်။
လက်ရှိအချိန်ထိ ကျောက်မဲမြို့နယ်တွင် နှစ်ဖက်တပ်ဖွဲ့အကြား စစ်ရေးတင်းမာနေလျက်ပြီး တိုက်ပွဲပြင်းထန်လာမည်ကို ဒေသခံများက စိုးရိမ်နေသလို စစ်ဘေးရှောင်များလည်း နေရပ်မပြန်ရဲ သေးကြောင်း ကျောက်မဲမြို့ စစ်ရှောင်ကော်မတီတစ်ဦးကပြောသည်။

“လက်နက်ကြီးပစ်ခတ်သံတွေတော့ တစ်ချက်ချက်ကြားရသေးတယ်။ ဘယ်ချိန်တိုက်ပွဲထဖြစ်လာမှာတော့ မသိဘူး။ ပြီးခဲ့ရက်တုန်းကလည်း ငြိမ်းချက်းရေးကုန်းမှာ ဖြစ်သေးတယ်။ ဒါတောင် သူတို့ယာယီအပစ်ခတ် ရပ်စဲရေးလို့ပြောတာ။ ကျနော်တို့ကတော့ တိုက်ပွဲထပ်ဖြစ်မှာကိုပဲစိုးရိမ်တယ်။ကြောက်တယ်။ စစ်ရှောင်လာတဲ့ သူတွေလည်း အိမ်မှာလက်နက်ကြီးတွေကျနေလို့ နေရပ်မပြန်ရဲကြသေးဘူး” ဟု ၎င်းက ပြောသည်။

ကျောက်မဲမြို့နယ်တွင် စစ်ဘေးရှောင်ဦးရေ စုစုပေါင်း ၅၀၀ ကျော်ရှိရာ ထိုထဲမှ ၂၀၀ ကျော်သည် နောင်ပိန်ကျေးရွာရှိ စစ်ဘေးရှောင်များ ဖြစ်သည်။

ထို့အပြင် မြန်မာ-တရုတ်နယ်စပ်ဒေသဖြစ်သည့် မူဆယ်မြို့တွင်လည်း စစ်ကောင်စီဘက်က ထောက်ပို့ယာဉ်ဖြင့် လက်နက်ခဲယမ်းများ၊ လူအင်အားများဖြင့် (ဇန်နဝါရီလ ၁၄ ရက်)တွင် စစ်အင်အား ဖြည့်တင်းနေကြောင်း သိရသည်။

မူဆယ်မြို့ ဒေသခံတစ်ဦးက “မနေ့ညကလည်း ပစ်ခတ်သံတွေ ထပ်ကြားရသေးတယ်။ မြေတောင်တုန်တယ်” ဟု ပြောသည်။

ညီနောင်မဟာမိတ်သုံးဖွဲ့နှင့် စစ်ကောင်စီတို့ အပစ်ရပ်စဲရေးကာလအတွင်း ကချင်လွတ်လပ်ရေး တပ်မတော် (KIA)သည် ကွတ်ခိုင်မြို့နယ် နမ့်ဖတ်ကာမှ စစ်ကောင်စီ၏ တပ်စခန်းကို ဝင်ရောက်တိုက်ခိုက်၍ ယမန်နေ့ (ဇန်နဝါရီလ ၁၅ ရက်)တွင် သိမ်းပိုက်နိုင်ခဲ့သည်။

စစ်ကောင်စီအနေဖြင့် ညီနောင်မဟာမိတ်သုံးဖွဲ့တို့နှင့် တရုတ်နိုင်ငံ ကူမင်းမြို့မှာ အပစ်ရပ်မည်ဟု သဘောမတူခင် (ဇန်နဝါရီလ ဒုတိယအပတ်အတွင်း)က စစ်ကောင်စီဘက်မှ လက်လွှတ်ပေးလိုက်ရသည့် မိုးကိုး၊ ချင်းရွှေဟော်တို့ နေရာများကို ပြန်လည်လုံခြုံမှု တည်ဆောင်နိုင်ဖို့အတွက် ဆောက်ရွက်နေကြောင်း ဗိုလ်ချုပ်ဇော်မင်းထွန်းက စစ်ကောင်စီထုတ်သတင်းစာမှာ ပြောဆိုခဲ့ဖူးသည်။

ထို့ကြောင့် ညီနောင်မဟာမိတ်သုံးဖွဲ့နှင့် စစ်ကောင်စီတို့ သဘောတူကြီခဲ့ကြသည့် ယာယီအပစ်ခတ် ရပ်စဲရေးသည်မှာလည်း မြေပြင်တွင် အသက်မဝင်သကဲ့သို့ တရုတ်အစိုးရ၏ ဖိအားကြောင့်သာ သဘောတူညီခဲ့သည့် ဟန်ပြရပ်စဲရေးတစ်ရပ်ဖြစ်ကြောင်း ဒေသခံများက ပြောသည်။