သျှမ်းပြည် ကျောက်မဲခရိုင်၊ ကျောက်မဲမြို့နယ်မှ အမျိုးသား တစ်ဦးကို မဟာမိတ် ပူးပေါင်း တပ်ဖွဲ့များ အတွက် ရိက္ခာဝယ်ယူပေးသူဟု စွပ်စွဲကာ စစ်ကောင်စီ တပ်ဖွဲ့မှ ဖမ်းဆီးခေါ်ဆောင်သွားကြောင်း စုံစမ်းသိရသည်။
ပြီးခဲ့သည့် ဇန်နဝါရီလ ၁၃ ရက်နေ့ မွန်းလွဲပိုင်း ၂ နာရီဝန်းကျင်တွင် ကျောက်မဲမြို့နယ်မှ အသက် (၃၀) ဝန်းကျင် အမျိုးသား တစ်ဦးသည် ကားတစ်စီးဖြင့် မြို့တက်ပြီး စားသောက်ကုန်ခြောက် ပစ္စည်းများ ဆန်၊ ဆီ၊ ဆား နှင့် ခေါက်ဆွဲခြောက်များ ဝယ်ယူပြီး ပြန်လာစဥ် စစ်ကောင်စီ တပ်မှ ၎င်း၏ ကားကို တားပြီး စစ်ဆေးမေးမြန်းရန် ရှိသည်ဟု ဆိုကာ ဖမ်းဆီးခေါ်ဆောင်သွားကြောင်း သိရသည်။
“သူဝယ်လာတဲ့ ဆန်တွေ၊ ခေါက်ဆွဲခြောက်တွေ ဆိုတာကလည်း အိမ်မှာစားဖို့ပဲ၊ ရွာက သူတွေက အခြေ အနေ အရရော၊ ငွေကြေးအရရော မြို့တခါတက်ရင် အဲ့လိုတွေပဲ အများကြီးဝယ်ပြီး ပြန်သွားကြတာ။ အဲ့တာကို စစ်ကောင်စီက ဘယ်သူ့ အတွက်ဝယ်ပေးတာလဲ၊ မဟာမိတ်တပ်တွေအတွက်လား စစ်မေးတာ။ မဟုတ်ဘူး ဖြေလည်း နောက်ထပ် စစ်မေးဖို့ရှိတယ် ဆိုပြီး သူ့ကို ဖမ်းခေါ်သွားတာ” ဟု ဖြစ်စဥ်ကို သိရှိသည့် လုံခြုံရေး အရ အမည်မဖော်လိုသူ အသက် (၄၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိအချိန်တွင် အဆိုပါ အမျိုးသားကို စစ်ကောင်စီတပ်ဖွဲ့မှ မည်သည့်နေရာသို့ ဖမ်းဆီးခေါ်ဆောင်သွားသည် ကို မသိရသည့် အကြောင်း နှင့် မိသားစုဝင်များထံသို့လည်း ဆက်သွယ်အကြောင်းကြားမှု မရှိသေးပေ။
စစ်ကောင်စီ၏ စွပ်စွဲမှုဖြင့် ဖမ်းဆီးခံရသည့် အမျိုးသားသည် မိသားစုအတွက် ဝင်ငွေရှာဖွေနေသူ ဖြစ်သည့်အတွက် အမျိုးသမီး ဖြစ်သူ နှင့် ကလေးကျန်ရစ်နေပြီး မိသားစုဝင်နှင့် ဆွေမျိုးများက ၎င်းအတွက် စိုးရိမ်ပူပန်နေကြကြောင်းလည်း သိရသည်။
“စိတ်ပူတာကတော့ ပူတာပေါ့၊ ဒါပေမဲ့ ဘယ်ကနေ လိုက်ရမှန်း မသိဘူးဖြစ်နေလို့ သူ့မိသားစုဝင်တွေလည်း ဘာမှ မလုပ်နိုင်ကြသေးဘူး။ အခုလို အခြေအနေမျိုးက ဘာမှဆို ဖြစ်သွားနိုင်တာမို့ အားလုံးက စိတ်ပူနေကြတာ။ အနည်းဆုံးတော့ ဘယ်နေရာမှရှိလဲဆိုတာ မိသားစုဝင်တွေကို အသိပေးသင့်ပါတယ်” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
ကိုဗစ် နောက်ဆက်တွဲ နှင့် စစ်တပ်အာဏာသိမ်းမှု၊ ၁၀၂၇ စစ်ဆင်ရေးကြောင့် နိုင်ငံရေး ရှုပ်ထွေးမှု စသည့် ပြဿနာ များကြောင့် ကုန်ဈေးနှုန်းသည် တစ်စထက်တစ်ထက် မြင့်တက်လာသည့်အတွက် ဒေသခံပြည်သူ များသည် အခြေအနေ နှင့် ငွေကြေးပေါ် မူတည်ကာ ရိက္ခာခြောက်၊ ကုန်ပစ္စည်းခြောက်များကို ဝယ်ယူ စုဆောင်းလေ့ရှိ ကြောင်းလည်း သိရသည်။
အလားတူပင် ပြီးခဲ့သည့် ဇန်နဝါရီလ ၃ ရက်အတွင်း စစ်ကောင်စီတပ်ဖွဲ့မှ ဖမ်းဆီးထားသည့် နမ့်ဆန်မြို့ ဒေသခံ အမျိုးသား (၄) ဦးသည်လည်း ယနေ့အချိန်အထိ ပြန်လည် လွတ်မြောက်လာခြင်း မရှိသေးကြောင်း သိရသည်။
Leave a Comments