သျှမ်းပြည် မူဆယ်မြို့နယ်တွင် ဇန်နဝါရီ လဝက်အတွင်း အမျိုးသားသုံးဦး မြေမြုပ်မိုင်းနင်းမိခဲ့ကြောင်း စုံစမ်းသိရသည်။
သျှမ်းပြည် မူဆယ်မြို့နယ် မန့်မိုင်ကျေးရွာအုပ်စု တွင် အမျိုးသားတစ်ဦး နှင့် စွမ်စော်ရပ်ကွက်တွင် အမျိုးသားနှစ်ဦး ဇန်နဝါရီလ လဝက်အတွင်းတွင် မြေမြုပ်မိုင်းနင်းမိ၍ခြေထောက် ပြတ်သည်အထိ အပြင်းထန်ဒဏ်ရာရှိခဲ့ကြောင်း ပြည်သူဒေသခံများက သျှမ်းသံတော်ဆင့်ကို ပြောသည်။
“မနေ့ (ဇန်နဝါရီလ ၁၄ ရက်)တစ်ရက်ထဲ ကို နှစ်ယောက်တောင် နင်းမိတာ။ အမျိုးသားတစ်ယောက်ကတော့ မူးယစ်ဆေးသွားဝယ်တာပေါ့၊နောက်တစ်ယောက်ကတော့ ထင်သွားရှာရင်းနဲ့ နင်းမိတာ။” ဟု မူဆယ်မြို့ ဒေသခံအမျိုးသားတစ်ဦးက ပြောသည်။
ယမန်နေ့ ဇန်နဝါရီလ ၁၄ ရက် မူဆယ်မြို့နယ် မန့်မိုင်ကျေးရွာအုပ်စု နံနက် ၉ နာရီခွဲကျော်ခန့်တွင် အမျိုးသား တစ်ဦးထပ်မံ မိုင်းနင်းမိပြီး၊စွမ်စော်ရပ်ကွက်တွင် ၂ နာရီခွဲကျော်ခန့်တွင်လည်း အမျိုးသားတစ်ဦး မြေမြုပ် မိုင်းနင်းမိ၍ ခြေထောက်ပြတ်သွားကြောင်း ပြည်သူဒေသခံများက ပြောသည်။
ပြီးခဲ့သည့် ( ဇန်နဝါရီလ ၁၁) ရက် မူဆယ်မြို့နယ် ခူးဝိန်းနယ်မြေ၊ စွမ်စော်ရပ်ကွက်တွင် အမျိုးသားတစ်ဦး ထင်းသွားရှာနေ့စဉ် မြေမြုပ်မိုင်းနင်းမိ၍ ခြေထောက် ပြတ်သွားကြောင်း သိရသည်။
လက်ရှိမြေမြုပ်မိုင်းသည် စစ်ကောင်စီဘက်မှ လာရောက်မြုပ်နှံခဲ့သည့် မိုင်းဖြစ်နိုင်ကြောင်းလည်း ဒေသခံများက သုံးသပ်ပြောသည်။
သျှမ်းသံတော်ဆင့်မှ သီးခြားကောက်ယူထားသည့် စာရင်းအရ သျှမ်းမြောက်ဒေသတွင် “၁၀၂၇ စစ်ဆင်ရေး” ဖော်ဆောင်နေစဉ် နှစ်လကျော်ကာလအတွင်း စစ်ကောင်စီ လေကြောင်းတိုက်ခိုက်မှု အပါအဝင် လက်နက်ကြီး နှင့် မြေမြုပ်မိုင်းများကြောင့် အရပ်သား ၁၅၈ ဦးသေဆုံးသွားခဲ့ပြီ ဖြစ်သည်။
