သျှမ်းပြည် မူဆယ်ခရိုင်အတွင်းရှိ ဒေသခံများကို လူဝင်မှု ကြီးကြပ်ရေး (လဝက) အရာရှိ မြန်မာ-တရုတ်နယ်စပ် သွားလာခွင့်လက်မှတ် ပြုလုပ်ရန် ဈေးအဆမတန်တောင်းပြီး ခိုးကြောင်ခိုးဝှက် ပြုလုပ်ပေးနေကြောင်း စုံစမ်းသိရသည်။
ဇန်နဝါရီလ ၂ ရက်တွင် မူဆယ်မြို့ရှိ မြန်မာ-တရုတ်နယ်စပ် နန်းတော်ဂိတ်တွင် လဝက အရာရှိများက နယ်စပ်သွားလာခွင့်လက်မှတ် စာအုပ်များမကျန်ရှိတော့ဟု အကြောင်းပြကာ စာအုပ်မလုပ်ပေးတော့ကြောင်း ကြေငြာခဲ့သော်လည်း ပွဲစားအဆက်အသွယ်များမှတဆင့် ဈေးအဆမတန် တောင်းပြီး ခိုးကြောင်ခိုးဝှက် ပြုလုပ်ပေးနေသည်ဟု မူဆယ်ဒေသခံများက ပြောသည်။
“နှစ်သစ်ကူးပြီးတော့ စာအုပ်ကုန်သွားလို့ မလုပ်ပေးတော့ဘူးလို့ ကြေငြာပြီးတော့ အဲ့လိုမဟုတ်ပြန်ဘူး၊ လဝကနဲ့ နီးစပ်တဲ့ ပွဲစားတွေနဲ့ လုပ်စားနေကြတယ်။ ဘာလို့ဆိုရင် စစ်ဘေးရှောင်တဲ့လူရယ်၊ တချို့က နှစ်ကုန်လို့ စာအုပ်သက်တမ်းတိုးဖို့ လဲရမယ့်သူတွေရယ် မလုပ်ပေးတော့ဘူးလို့ ပြောတယ်။ တရုတ်ငွေ များများပေးနိုင်ရင်တော့ ပွဲစားကနေတဆင့် သူတို့ဆီ စာအုပ်လုပ်ပေးဖို့ ပြောလို့ရတယ်”ဟု မူဆယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
မြန်မာ-တရုတ်နယ်စပ် သွားလာခွင့်လက်မှတ်ကို မူဆယ်ခရိုင်အတွင်းရှိ မူဆယ်၊ နမ့်ခမ်း၊ မန်ဟျိုး(မန်ဟီးရိုး)နှင့် ပန်ဆိုင်း(ကြူကုတ်)မြို့တို့တွင် နေထိုင်သူများသာ သက်တမ်း(၁)နှစ်ရှိ အနီရောင်စာအုပ် ပြုလုပ်ခွင့်ရှိပြီး ယခုအခါ မူဆယ်မြို့ နန်းတော်ဂိတ်တွင် ပွဲစားများမှတဆင့် ဈေးအဆမတန် ပေးကာ ပြုလုပ်နေရကြောင်း ဒေသခံများထံမှ သိရသည်။
“အရင်က ဒေသခံ စာအုပ်လုပ်ရင် မြန်မာငွေ ၅၀၀၀/ ၁၀၀၀၀ အဲ့လောက်ပဲ ပေးရတဲ့ဟာ အခုက သိန်းချီ ပေးနေရတာဆိုတော့ ပက်စပို့လုပ်တာ ဗီဇာလုပ်တာနဲ့ ခပ်ဆင်ဆင်ဖြစ်လာပြီ။ ပွဲစားတချို့ လုပ်ပေးတာက တရုတ်ယွမ်ငွေ ၉၀၀ ကနေ ၁၃၀၀/၁၅၀၀ ယွမ်အထိ ရှိတယ်။ မြန်မာငွေဆိုရင်တော့ ၅ သိန်းကနေ ၇ သိန်း ၈ သိန်း အထိ ပေါက်ဈေးရှိတယ်”ဟု မူဆယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
ယခုကဲ့သို့ မူဆယ်မြို့မှ လဝကအရာရှိများက နယ်စပ်ဖြတ်သန်းခွင့်လက်မှတ် စာအုပ်ကို ဈေးအဆမတန် တောင်းပြီး ပြုလုပ်နေရခြင်းကြောင့် တရုတ်နိုင်ငံသို့ သွားရောက်ပြီး ကုန်ပစ္စည်းဝယ်ယူ တင်သွင်းနေသည့် ဒေသခံများမှာ အခက်အခဲဖြစ်ကာ ဒေသခံပြည်သူများလည်း ကုန်ဈေးနှုန်းမြင့်မားမှုကို ကြုံတွေ့နေရကြောင်း သိရသည်။
“နေ့စဉ်နဲ့အမျှ ရှာစားနေရတဲ့လူတွေက ရောင်းလဲခက် ဝယ်လဲခက် အဲ့လိုဖြစ်နေတာ။ မူဆယ်၊ နမ့်ခမ်း၊ ပန်ဆိုင်း ဒီဘက်လူတွေက တရုတ်ကိုပဲ မှီခိုနေရတာလေ။ အခုက လမ်းကြောတလျှောက်လုံးက တံတားတွေလဲ ကျိုးကုန်တော့ ကုန်ဈေးနှုန်းတွေလဲ တက်တယ်။ တရုတ်ဘက်က ကုန်တွေ မဝင်တော့ရင် ပိုခက်ခဲမှာ၊ ပြည်သူတွေ ဒုက္ခရောက်တာပေါ့”ဟု မူဆယ်မြို့မှ ကုန်သည်တစ်ဦးက သျှမ်းသံတော်ဆင့်ကို ပြောသည်။
ထို့အပြင် ဇန်နဝါရီ ၇ ရက်နေ့ကလည်း တရုတ်နိုင်ငံသို့ ဝင်ရောက်ခွင့်ရရန်အတွက် တစ်ခါသုံး နယ်စပ်ဖြတ်ကျော်ခွင့်လက်မှတ်ကို တုံကင်စောင့်ဆိုင်းနေသူ ၈၀၀၀ နီးပါးအထဲမှ ၁၀ ဦးထက်မနည်း မူးလဲခဲ့ပြီး ဆေးရုံတင်လိုက်ရကြောင်း ကူညီပေးခဲ့ရသည့် မူဆယ်မြို့ရှိ ပရဟိတအသင်းများထံမှ သိရသည်။
