သျှမ်းပြည် မိုင်းဆတ်မြို့တွင် မြန်မာနိုင်ငံ ဗုဒ္ဓဘာသာဝင် တိုင်းရင်းသားများ ကိုးကွယ်နေသည့် ဘုရား၊ စေတီ၊ ပုထိုး ဖျက်ဆီးသူများကို ဆန့်ကျင်ရှုတ်ချပွဲကျင်းပခဲ့ကြောင်း သတင်းရရှိသည်။
ယနေ့ (ဇန်နဝါရီ ၁၃)ရက် နံနက် ၉နာရီတွင် MNDAA တပ်သားမှ ဘုးရား၊စေတီ ပုထိုးဖျက်ဆီးသည့်ကိစ္စကို ဆန့်ကျင်ရှုတ်ချကြောင်း မိုင်းဆတ်မြို့ သဗ္ဗညုဘုန်းတော်ကြီးကျောင်းရှေ့မှ စ၍ ကျဒယ်လမ်းဆုံ၊မြို့မဈေးလမ်းဆုံမှ အ.ထ.က(မိုင်းဆတ်) ကျောင်းရှေ့အထိ ကျင်းပခဲ့ကြောင်း ဒေသခံပြည်သူများက သျှမ်းသံတော်ဆင့်ကို ပြောသည်။
” ဒီရှုတ်ချပွဲက ဌာနဆိုင်ရာတွေက ဦးစီးပြီး လုပ်တာပါ။ လေယာဉ်ကွင်းဖက်တွေလည်း ပတ်တာပဲ။ဒါမဲ့ ကြည့်ရတာ မြို့ထဲကလူတွေတောင် သိပ်မပါဘူး။ ဘာမှ မသိနားမလည်တဲ့ ရွာဘက်ကလူတွေကို ခေါ်ပြီးလုပ်သွားတာပါ။” ဟု မိုင်းဆတ်ဒေသခံ အမျိုးသားတစ်ဦးက ပြောသည်။
ထိုဆန့်ကျင်ရှုတ်ချပွဲတွင် အမျိုးသားရေးထောက်ခံသူ ဓာတ်စွမ်းဟုန်ကျောင်းတိုက်မှ ဆရာတော် ဥူးခေမိန္ဒက သာသနာတော်နှင့် နိုင်ငံတော်အားစောင့်ရှောက်ရန် ဗုဒ္ဓဘာသာဝင် နိုင်ငံသားတိုင်း တာဝန်ရှိကြောင်း၊ မြန်မာနိုင်ငံသား ဗုဒ္ဓဘာသာဝင် တိုင်းရင်းသားများ ကိုးကွယ်နေသည့် ဘုရား၊ စေတီများကို ဖျက်ဆီးသူ အကြမ်းဖက် သမားများအား ဆန့်ကျင်သင့်ကြောင်း၊ လိုအပ်ပါက တပ်မတော်နှင့်အတူ နိုင်ငံတော်ကာကွယ်ရေး တာဝန်ထမ်းရွက်ဖို့ အဆင်သင့်ရှိနေမည်ဖြစ်ကြောင်း စသည့် တို့ဖြင့် ကြွေးကြော်ခဲ့သည်။
ယမန်နေ့ ( ဇန်နဝါရီ ၁၂)ရက်တွင် လည်း သျှမ်းပြည် မြို့တော် တောင်ကြီးမြို့တွင် စစ်ကောင်စီနှင့် PNO တို့ ဦးစီးပြီး MNDAA စေတီပုထိုးဖျက်ဆီးမှုနှင့်ပတ်သက်ပြီး ဆန့်ကျင်ရှုတ်ချပွဲပြုလုပ်ခဲ့သေးသည်။
ပြီးခဲ့သည့် (ဇန်နဝါရီလ ၄ ရက်)တွင် လောက်ကိုင်မြို့ကို ကိုးကန့်တပ်ဖွဲ့ MNDAA မှ ပြန်လည်ထိန်းချုပ် နိုင်ပြီဟု ကြေညာလိုက်ပြီးနောက် ယင်းမြို့၏မြောက်ဘက်အရပ်ရှိ ပွိုင့် ၂၂၀၂ တောင်းကုန်းပေါ်၌ တည်းထားကိုးကွယ်သည့် စေတီပုထိုးအား ကိုးကန့်တပ်ဖွဲ့ MNDAA မှ ဖျက်ဆီးသည့် ဗီဒီယိုဖိုင်ထွက်ပေါ်ခဲ့သည်။
ထိုစေတီပုထိုးသည် စစ်ကောင်စီတပ်ဖွဲ့ဝင် တပ်သားများမှ တည်ထားကိုးကွယ်သည့်စေတီဖြစ်ကြောင်း သိရသည်။ ထို့ကြောင့် ကိုးကန့်တပ်ဖွဲ့ MNDAA မှ ဖျက်ဆီးနေသည်ဟု လူမှုကွန်ရက်စာမျက်နှာပေါ်မှာ ရေးသားဖြန့်ချိနေကြသည်။
ထို့အပြင် သံတူဖြင့် ဘုရားစေတီတော်ရိုက်ထုခြင်းသည် MNDAA မှ အမိန့်ပေးခြင်းမဟုတ်ဘဲ ပုဂ္ဂိုလ်ရေးအရ လုပ်ရပ်ဖြစ်ကြောင်း၊ MNDAA အနေဖြင့် လက်အောက်ငယ်သားများ၏ တပ်စည်းမျဉ်းစည်းကမ်းး ညံ့ဖျင်းမှုနှင့် အရည်အချင်းမရှိသော လုပ်ဆောင်မှုအတွက် လွန်စွာတောင်းပန်ကြောင်း (ဇန်နဝါရီလ ၉ ရက်)တွင် MNDAA မှ ထုတ်ပြန်ထားသည်။
Leave a Comments