သျှမ်းပြည် ကျောက်မဲမြို့နယ်တွင် စစ်ကောင်စီတပ်နှင့် တအာင်း(ပလောင်)တပ်ဖွဲ့ TNLA တို့ နှစ်ဖက်ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။

ယနေ့ (ဇန်နဝါရီ ၁၃ ရက်) နံနက် ၉ နာရီခန့်မှ ၁၁ နာရီကျော်အထိ ကျောက်မဲမြို့ ငြိမ်းချမ်းရေးကုန်းတွင် စစ်ကောင်စီတပ် ခမရ-၅၀၁/၅၀၂ နှင့် တအာင်း(ပလောင်)တပ်ဖွဲ့တို့ နှစ်ဘက်ထိတွေ့တိုက်ပွဲ ဖြစ်ပွားခဲ့ကြောင်း ကျောက်မဲဒေသခံများက ပြောသည်။

“ဒီမနက် ကျောက်မဲမှာ တိုက်ပွဲဖြစ်တာ ဟုတ်တယ်၊ စစ်ကောင်စီတပ်က နတ်တောင်ဘက်က သူတို့စခန်းထဲကနေ ကားတွေနဲ့ ငြိမ်းချမ်းကုန်းဘက်ကို တက်လာတာ။ ခနကြာတော့ သေနတ်သံထွက်တာပဲ။ ၉ နာရီလောက်က စဖြစ်တာ ၁၁ နာရီကျော်လောက် အသံတိတ်သွားတယ်”ဟု ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

တအာင်း (ပလောင်)တပ်ဖွဲ့ TNLA ကလည်း ကျောက်မဲစစ်ကောင်စီတပ်နှင့် ၂ နာရီကြာ ထိတွေ့တိုက်ပွဲ ဖြစ်ပွားခဲ့ကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာနက ထုတ်ပြန်လာသည်။

၎င်းထုတ်ပြန်ချက်ထဲတွင် ကျောက်မဲမြို့ ငြိမ်းချမ်းရေးကုန်းရှိ TNLA တပ်ဖွဲ့ စခန်းချတပ်စွဲထားသည့်နေရာကို စစ်ကောင်စီတပ်က ထိုးစစ်ဆင် တိုက်ခိုက်လာပြီး ၂ နာရီကြာ ထိတွေ့ တိုက်ပွဲဖြစ်ပွားပြီးနောက် ပြည်သူများ စစ်ဘေးဒဏ်သင့်ပြီး ဆုံးရှုံးမှုများမည် စိုးသောကြောင့် ယာယီနောက်ဆုတ်ပေးလိုက်ကြောင်း ဖော်ပြထားသည်။

ထို့အပြင် ဇန်နဝါရီ ၁၁ ရက်တွင် သဘောတူထားခဲ့သော အပစ်အခတ်ရပ်စဲရေး လက်မှတ်ကို စစ်ကောင်စီတပ်မှ ပေါ်ပေါ်တင်တင် ချိုးဖောက်ပြီး ထိုးစစ်ဆင်လာခြင်းဖြစ်ကြောင်း ဆိုထားသည်။

ညီနောင်မဟာမိတ်နှင့် စစ်ကောင်စီတို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ဇန်နဝါရီလ ၁၀/၁၁ ရက်တို့တွင် ကူမင်းမြို့၌ တတိယအကြိမ် တွေ့ဆုံဆွေးနွေးခဲ့ပြီး သျှမ်းမြောက်တွင် ယာယီအပစ်အခတ် ရပ်စဲရန် “ဟိုင်ဂင် သဘောတူညီမှု”ကို ရရှိခဲ့သည်ဟု ဆိုသော်လည်း မြေပြင်တွင် တိုက်ပွဲများ ရပ်တန့်ခြင်း မရှိကြောင်း ဒေသခံများက ပြောသည်။

အဆိုပါ “ဟိုင်ဂင် သဘောတူညီမှု”တွင် နှစ်ဖက်တပ်ဖွဲ့ဝင် အချင်းချင်းကြား ပစ်ခတ်တိုက်ခိုက်မှုနှင့် ထိတွေ့မှုမရှိစေရေး၊ အငြင်းပွားဖွယ်ရာများနှင့် ပစ်ခတ်မှုများ ဖြစ်ပေါ်လာပါက တွေ့ဆုံဆွေးနွေးမှု လမ်းစဉ်ဖြင့် ဖြေရှင်းရေး စသည့် အချက်များအပေါ် သဘောတူညီမှု ရရှိခဲ့သည်ဟု ညီနောင်မဟာမိတ် ၃ ဖွဲ့က ယမန်နေ့ (ဇန်နဝါရီ ၁၂ ရက်)တွင် ထုတ်ပြန်ထားသည်။

လက်ရှိတွင် မိုးကုတ်၊ ကျောက်မဲနှင့် လားရှိုးမြို့နယ်အတွင်း TNLA တပ်ဖွဲ့ တည်ရှိရာသို့ စစ်ကောင်စီတပ်ဘက်မှ လက်နက်ကြီးများဖြင့် ပစ်ခတ်တိုက်ခိုက်မှုများမှာ ဆက်လက်ရှိနေကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာနက ထုတ်ပြန်ထားသည်။