သျှမ်းပြည် နောင်ချိုမြို့နယ်တွင် စစ်ကောင်စီတပ်က လေကြောင်းဗုံးကြဲမှုကြောင့် အမျိုးသမီး ၁ ဦးနှင့် ကလေး ၁ ဦး အပါအဝင် ၃ ဦး သေဆုံးခဲ့ကြောင်း စုံစမ်းသိရသည်။

ယမန်နေ့ (ဇန်နဝါရီ ၁၁ ရက်) နေ့လည် ၁၁ နာရီခွဲအချိန်ခန့်က နောင်ချိုမြို့နယ် သုံးဆယ်ကျေးရွာတွင် တိုက်ပွဲတစုံတရာ ဖြစ်ပွားခြင်းမရှိဘဲ စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် အမျိုးသမီး ၁ ဦးနှင့် အသက် ၁၀ နှစ်ကျော် ကလေး ၁ ဦး အပါအဝင် စုစုပေါင်း ၃ ဦး သေဆုံးသွားခဲ့ကြောင်း နောင်ချိုဒေသခံများက ပြောသည်။

“မနေ့တုန်းက သုံးဆယ်ရွာမှာ အရပ်သား ၃ ယောက် လေယာဉ်ဗုံးမှန်ပြီး သေတာ။ နေ့လယ် ၁၁ နာရီခွဲလောက်က ဖြစ်တာ။ တစ်အိမ်တည်းက သုံးယောက်ဆုံးတာ၊ လေယာဉ်လာတဲ့အချိန် မထွက်ပြေးနိုင်ဘဲ ဗုံးမှန်တာ။ ဘေးအိမ်တွေကလည်း အများကြီးပျက်စီးတယ်။ အုမ္မသီးလမ်းခွဲကနေလဲ လက်နက်ကြီးနဲ့ သုံးဆယ်ဘက်ကို နေ့တိုင်းပစ်နေတာရှိတယ်”ဟု နောင်ချိုမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် နောင်ချိုမြို့နယ် အုမ္မသီးလမ်းခွဲနှင့် ရွှေညောင်ပင်ကျေးရွာအနီးရှိ လမ်းမကြီးတလျှောက် စခန်းချတပ်စွဲထားသည့် စစ်ကောင်စီတပ်သည် ဇန်နဝါရီ လဆန်းပိုင်းမှ စတင်၍ ဒေသခံပြည်သူများကို အကြောင်းပြချက်မရှိဘဲ ဖမ်းဆီးခေါ်ဆောင်သွားခြင်းများလည်း ရှိနေကြောင်း ဒေသခံများထံမှ သိရသည်။

“၁ ရက်နေ့ ညနေပိုင်းမှာ ဆမ္မဆယ်က ရွာသားတစ်ယောက် ကားဝပ်ရှော့သွားပြီး အပြန်မှာ သူငယ်ချင်းနဲ့အတူ ဖမ်းခံရတာ၊ မြင်တဲ့သူတွေ ပြောတာကတော့ ကြိုးချည်ပြီး လမ်းဘေးမှာ ဝမ်းလျားမှောက် အိပ်ခိုင်းထားတယ်ပြောတယ်။ နောက်ရက် ဖောကားက စကစနေတဲ့နား ရပ်ထားတာ၊ သူတို့သွားမေးတော့ မဖမ်းထားဘူးဆိုပြီး လိမ်တာပေါ့”ဟု နောင်ချိုမြို့မှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် နိုဝင်ဘာလဆန်းပိုင်းကတည်းက ပြင်ဦးလွင်မြို့မှ သျှမ်းမြောက်သို့ ထိုးစစ်ဆင်ရန် အင်အားဖြည့်တင်းလာသည့် စစ်ကောင်စီစစ်ကြောင်းသည် နောင်ချိုမြို့နယ် အုမ္မသီးကျေးရွာ လမ်းခွဲတွင် စခန်းချတပ်စွဲထားပြီး အနီးအနားရှိ ကျေးရွာများမှ လူငယ်များကိုလည်း အတင်းအဓမ္မ ဖမ်းဆီးနှိပ်စက်ခြင်းများ ပြုလုပ်နေကြောင်း နောင်ချိုဒေသခံများက ပြောသည်။

“ဒီဘက်က ခဏခဏ အဖမ်းခံရတာ၊ အရင်က ဖမ်းခံရတဲ့သူတွေ တစ်လလောက် အဆက်အသွယ်ပြတ်ပြီး ပြန်လွတ်ပေးတာရှိတယ်။ အုမ္မသီး လမ်းကြောတစ်လျှောက်မှာပဲ ဖမ်းခံရတာ။ ပြန်လွတ်ပေးတဲ့သူတွေတော့ လွတ်ပေးမှ ဘယ်ရောက်မှန်း သိကြတာ၊ ပြင်ဦးလွင်မှာ ဖမ်းထားတာ များတယ်”ဟု နောင်ချိုမြို့နယ်မှ ဖြစ်စဉ်သိရှိသူ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

လက်ရှိတွင် သျှမ်း-မန္တလေးနယ်စပ်ရှိ နောင်ချိုမြို့နယ် ကျောက်မဲလေးကျေးရွာတွင် စစ်ကောင်စီတပ်နှင့် ညီနောင်မဟာမိတ်တို့ တိုက်ပွဲဖြစ်ပွားလျက်ရှိပြီး ဇန်နဝါရီလဆန်းပိုင်းက ညီနောင်မဟာမိတ်များ တိုက်ခိုက်ရရှိခဲ့သည့် သံဘိုတပ်စခန်းကို စစ်ကောင်စီတပ်က ပြန်လည်သိမ်းပိုက်နိုင်ခဲ့ကြောင်း စစ်ရေးသတင်းရင်းမြစ်များမှ သိရသည်။