သျှမ်းပြည် မူဆယ်မြို့နယ်တွင် အမျိုးသားတစ်ဦး မြေမြုပ်မိုင်းနင်းမိ၍ ခြေထောက်ပြတ်သွားကြောင်း စုံစမ်းသိရသည်။
သျှမ်းပြည် မူဆယ်မြို့နယ် ခူးဝိန်းနယ်မြေ၊ စွမ်စော်ရပ်ကွက်တွင် ယမန်နေ့ ( ဇန်နဝါရီလ ၁၁) ရက် နေ့လည် ၂ နာရီခွဲကျော်တွင် အမျိုးသားတစ်ဦး ထင်းသွားရှာနေ့စဉ် မြေမြုပ်မိုင်းနင်းမိ၍ ခြေထောက် ပြတ်သွားကြောင်း မူဆယ်ဒေသခံများက သျှမ်းသံတော်ဆင့်ကို ပြောသည်။
“စစ်ကောင်စီတွေက လာနေပြီး မိုင်းတွေလာထောင်ထား ၁ လ ၂ လလောက်ရှိပြီ။အဲ့ခြုံပုတ် အနီးတဝိုက်တွေကို မသွားဖို့လည်းပြောထားတယ်။သူက ၂ နာရီခွဲလောက်မှာ နင်းမိပြီး အဲ့နားမှာရှိတဲ့ စစ်သားတွေက ထုံဆေးတွေ ထိုးထားပေးပြီးမှ ၄ နာရီခွဲလောက်ကမှ သူ့အိမ်ကလူကိုလာခေါ်တာ။”ဟု မူဆယ်မြို့ဒေသခံ အမျိုးသားတစ်ဦးက ပြောသည်။
ထိုအမျိုးသားကို ပရဟိအသင်းမှ လာရောက်ခေါ်ဆောင်သွားပြီး မူဆယ်ပြည်သူဆေးရုံသို့ခေါ်သွားသော်လည်း ပစ္စည်းများနှင့် ဆရာဝန်လုံလောက်မှ မရှိသည့်အတွက် ပုဂ္ဂလိက ဆေးရုံဖြစ်သို့ ဆက်လက်ပို့ဆောင့်ခဲ့ပြီး ယနေ့ ( ဇန်နဝါရီ ၁၂) ရက် နံနက် ၉နာရီခွဲဝန်ကျင်တွင် ခွဲစိတ်ခန်းဝင်ရကြောင်း နီးစပ်ရာဆွေမျိုးတစ်ဦးက ပြောသည်။
ထိုမိုင်းနင်းမိသောအမျိုးသားတစ်သည် အသက် ၅၃ နှစ်အရွယ်ရှိ ၊စိုင်းစမ်ခေါင် ဖြစ်ကြောင်းသိရသည်။
လက်ရှိမြေမြုပ်မိုင်းသည် စစ်ကောင်စီဘက်မှ လာရောက်မြုပ်နှံခဲ့သည့် မိုင်းဖြစ်နိုင်ကြောင်းလည်း ဒေသခံများက သုံးသပ်ပြောသည်။
သျှမ်းသံတော်ဆင့်မှ သီးခြားကောက်ယူထားသည့် စာရင်းအရ သျှမ်းမြောက်ဒေသတွင် “၁၀၂၇ စစ်ဆင်ရေး” ဖော်ဆောင်နေစဉ် နှစ်လကျော်ကာလအတွင်း စစ်ကောင်စီ လေကြောင်းတိုက်ခိုက်မှု အပါအဝင် လက်နက်ကြီး နှင့် မြေမြုပ်မိုင်းများကြောင့် အရပ်သား ၁၅၈ ဦးသေဆုံးသွားခဲ့ပြီ ဖြစ်သည်။
Leave a Comments