သျှမ်းမြောက် လားရှိုး-နမ္မတူလမ်းကြားရှိ လားရှိုးမြို့နယ် နားကွမ်းလုံရွာမှ တံတားတစ်စင်း ထပ်မံဖောက်ခွဲခံလိုက်ရသဖြင့် ဒေသခံများ ဖြတ်သန်းသွားလာရန် ခက်ခဲသွားကြောင်း စုံစမ်းသိရသည်။
ယမန်နေ့ (ဇန်နဝါရီလ ၁၁ ရက်) ညပိုင်းတွင် လားရှိုး-နမ္မတူလမ်းကြားရှိ လားရှိုးမြို့နယ် နားကွမ်းလုံရွာမှ တံတားတစ်စင်းကို လက်နက်ကိုင်တစ်စုမှ လာရောက်မိုင်းခွဲ ဖျက်စီးသွားခဲ့ကြောင်း လားရှိုးမြို့လိုင်းကားမောင်းနှင်သူတစ်ဦးက သျှမ်းသံတော်ဆင့်ကို ပြောသည်။
“တံတားကကျိုးသွားတာ ဟုတ်တယ်။ ဒီဘက်က ဖြတ်လို့မရတော့ဘူး။ လားရှိုးမြို့က အဝင်လည်း မရတော့ဘူး။ အထွက်လည်း မရတော့ဘူး။ တခြားလမ်းတွေအသုံးပြုရတာပေါ့။ ဒါပေမယ့် လမ်းကောင်းတော့ သွားလာဖို့အဆင်မပြေဘူး” ဟု ၎င်းပြောသည်။
ယင်းတံတားသည် လားရှိုးမြို့နှင့် ၆ မိုင်ခန့် ကွာဝေးပြီး အီနိုင်းတံတား ဖျက်ဆီးခံလိုက်ပြီးနောက် ဒေသခံနှင့် စစ်ဘေးရှောင်များအတွက် လက်ကျန်တံတားတစ်စင်း အနေဖြင့် ဖြတ်သန်းသွားလာနေခြင်း ဖြစ်သည်။
ပြီးခဲ့သည့် ဒီဇင်ဘာလ ၁ ရက်တွင်လည်း သီပေါမြို့နှင့် လားရှိုးမြို့အကြား မန္တလေး-လားရှိုး ပြည်ထောင်စု ကားလမ်းကြီးပေါ်ရှိ စဉ့်အင်တံတားလည်း ဖျက်ဆီးခံရသည်။
အလားတူ သီပေါမြို့နှင့် နမ္မတူမြို့ကြားရှိ မိုးတံတား တစ်စင်းလည်း (ဒီဇင်ဘာလ ၂၈ ရက်) က ဖြိုခွဲဖျကဆီးခံလိုက်ရသည်။
သျှမ်းမြောက်ဒေသတွင် “၁၀၂၇ စစ်ဆင်ရေး” နှစ်လကျော်အတွင်း ကုန်းသွယ်ရေးအတွက် အရေးပါသည့် တံတားများ အပါအဝင် တံတားစင်းပေါင်း ၆ စင်းပျက်ဆီးသွားပြီ ဖြစ်ကြောင်း သိရသည်။
Leave a Comments