သျှမ်းပြည် မူဆယ်မြို့နယ် အတွင်း၌ အာဏာသိမ်း စစ်ကောင်စီ တပ်ဖွဲ့ဝင် အချင်းချင်း ပစ်ခတ်မှု ဖြစ်ပွား ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၁၁) ရက်တွင် မူဆယ်မြို့နယ်၊ မန့်ဝိန်းရပ်ကွက်အတွင်း၌ အာဏာသိမ်း စစ်ကောင်စီ တပ်ဖွဲ့ ဝင်အချင်းချင်း အထင်လွဲ စကားများကြပြီး သေနတ်ဖြင့် အပြန်အလှန် ပစ်ခတ်မှု အထိ ဖြစ်ခဲ့ကြကြောင်း ဖြစ်စဥ်ကို သိရှိသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ပြဿနာ အစက ကားတွေ မရှောင်ပေးလို့ စကားများကြတာနဲ့ တူတယ်၊ သေချာတော့ မသိဘူး။ အဲ့ဒီနောက်မှာ အပြန်အလှန် ဆဲဆိုကြပြေး သေနတ်နဲ့ပါ ပစ်ချကြတာ။ ၁၀ မိနစ်ကျော် ကြာပြီးမှ ပစ်ခတ်မှုအသံတွေ ငြိမ်သွား တယ်။ နှစ်ဖက်စလုံးလည်း ထိခိုက်မှုတွေ ရှိသွားကြတယ်လို့ သိရတယ်” ဟု ဖြစ်စဥ်ကို သိရှိသည့် အမည်မဖော် လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းပစ်ခတ်မှုကြောင့် လမ်းကြားအတွင်းရှိ အရပ်သား နေအိမ် အုတ်တံတိုင်းလည်း ကျည်ဆန်ထိမှန်မှု ရှိသည့် အပြင် လူသူ ထိခိုက်မှုများလည်း ရှိနေကြောင်း သိရသည်။
အဆိုပါ ပစ်ခတ်မှု ဖြစ်ပွားသည့် စစ်ကောင်စီ တပ်ဖွဲ့သည် တပ်မ ၉၉ လက်အောက်ခံ တပ်သားများနှင့် ခလရ ၂၉၀ လက်အောက်ခံ တပ်သားများ ဖြစ်ကြပြီး ပစ်ခတ်မှုဖြစ်ပြီးနောက် လူစုခွဲသွားကြကြောင်းလည်း သိရသည်။
“ခလရ ၂၉၀ ဆိုတာက ဒီမူဆယ်မြို့ထဲ လောင်းကစားဝိုင်းတွေ၊ KTV တွေ ၊ Bar တွေမှာ လှည့်ပြီး လုံခြုံရေးယူပေးတာ အရင်ကတည်းက သွားလာလှုပ်ရှားမှု ရှိခဲ့တယ်။ တပ်မ ၉၉ ကတော့ စယ်လန့်ဘက် တိုက်ပွဲ ဖြစ်နေတဲ့ အချိန်တုန်းက ရောက်လာတဲ့အဖွဲ့ပေါ့။ အဲ့မှာ သူတို့ တပ်အချင်းချင်းပဲ ပစ်ခတ်ကြပြီး လူစုခွဲသွားတာပဲ” ဟု အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။
မူဆယ်မြို့နယ်သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့် အပြင် လက်နက်ကိုင် အဖွဲ့အစည်းများ စုံလင် ပေါများသည့် နယ်မြေဒေသလည်း ဖြစ်ရာ မကြာခဏ ဆိုသလို ပစ်ခတ်မှုများ၊ ခိုးဆိုးလုယက်၊ ဓါးပြတိုက်မှုများလည်း ဖြစ်ပွားလေ့ရှိသည်။
ထို့အပြင် လက်ရှိ အချိန်၌ မူဆယ်မြို့နယ် နှင့် အနီးတဝှိက်တွင် အာဏာသိမ်း စစ်ကောင်စီ နှင့် မဟာမိတ် ပူးပေါင်း တပ်ဖွဲ့တို့၏ စစ်ရေး တင်းမာမှု အခြေအနေများလည်း ရှိနေသည့် အတွက် ဒေသခံ ပြည်သူများ အနေဖြင့် လုံခြုံရေးအတွက် စိုးရိမ်ကြောက်လန့်နေရသည့် ကာလလည်း ဖြစ်နေကြောင်း သိရသည်။
Leave a Comments