သျှမ်းပြည် နမ့်ဆန်မြို့သိမ်းတိုက်ပွဲအတွင်း ဖမ်းဆီးရမိခဲ့သည့် တပ်မ-၁၀၁ တပ်မမှူးက လက်နက်ကြီးနှင့် လေကြောင်းဗုံးကြဲမှုများမှာ ပစ်မှတ်တိကျမှုမရှိခြင်းကြောင့် ပြည်သူထိခိုက်ဒဏ်ရာရရှိကြောင်း ထုတ်ဖော်ဝန်ခံသည်။
ပြီးခဲ့သည့် ဒီဇင်ဘာလ ၁၅ ရက်တွင် နမ့်ဆန်မြို့သိမ်းတိုက်ပွဲအတွင်း ထွက်ပြေးရန် ကြိုးစားခဲ့သည့် စစ်ကောင်စီလက်အောက်ခံ တပ်မ-၁၀၁ ၏ တပ်မမှူးဖြစ်သူ ဗိုလ်မှူးချုပ် မင်းမင်းထွန်းကို TNLA တပ်ဖွဲ့က ဖမ်းဆီးရမိခဲ့ပြီး ၎င်း၏ရုပ်သံဖိုင်ကို တအာင်းအမျိုးသား လွတ်မြောက်ရေးတပ်မတော် (TNLA) က ယမန်နေ့ (ဇန်နဝါရီ ၁၀ ရက်)တွင် ထုတ်ပြန်လာသည်။
“လက်နက်ကြီးတွေနဲ့ ပစ်ခတ်မှု၊ လေယာဉ်ဗုံးကြဲမှုတွေဟာ တချို့ဟာတွေမှာ ပစ်မှတ်တိကျမှုမရှိခြင်းကြောင့် ဒါပျက်စီးတယ်၊ ထိခိုက်ဒဏ်ရာရတယ်လို့ ရိုးသားစွာ ဝန်ခံပါတယ်။ ဘယ်လိုပဲဖြစ်ဖြစ် ဒီဒေသအတွင်းမှာ ဖြစ်စဉ်တွေဟာ ကျနော်မှာ တာဝန်အရှိဆုံး ဖြစ်ပါတယ်။ ဒီဒေသမှာ နေထိုင်တဲ့ တအာင်းပြည်သူတွေ၊ ပြည်သူလူထုအားလုံးကို ကျနော်အနေနဲ့ ဝန်ချတောင်းပန်လိုကြောင်း ပြောလိုပါတယ်”ဟု ၎င်းတပ်မမှူးက ရုပ်သံတွင် ဝန်ခံပြောကြားထားသည်။
နမ့်ဆန်မြို့နယ်တွင် ဖြစ်ပွားခဲ့သည့် TNLA တပ်ဖွဲ့နှင့် စစ်ကောင်စီတပ်တို့၏ နှစ်ဘက်တိုက်ပွဲအတွင်း စစ်ကောင်စီတပ်က လက်နက်ကြီး ပစ်ခတ်မှု၊ လေကြောင်းဖြင့် ဗုံးကြဲတိုက်ခိုက်မှုများကြောင့် ဒေသခံပြည်သူ ၁၂ ဦး သေဆုံးပြီး ၁၆ ဦး ဒဏ်ရာရကာ အိမ် ၁၃၁ လုံး ပျက်စီးဆုံးရှုံးခဲ့ရသည်ဟု ဗိုလ်မှူးချုပ် မင်းမင်းထွန်း၏ ပြောကြားချက်အရ သိရသည်။
နမ့်ဆန်မြို့နယ်တွင် စစ်ကောင်စီတပ်၏ အဓိကတာဝန်ရှိသည့် တပ်မ-၁၀၁ တပ်မမှူးသည် ဒီဇင်ဘာလ ဖြစ်ပွားခဲ့သည့် စစ်ကောင်စီတပ်နှင့် TNLA တပ်ဖွဲ့တို့၏ နှစ်ဘက်တိုက်ပွဲအတွင်း ဖမ်းဆီးခံခဲ့ရသည့် အခြေအနေနှင့် စစ်ဆင်ရေးတလျောက် ဒေသခံ ပြည်သူလူထုအပေါ် ကျူးလွန်ခဲ့သည်များအတွက် ဝန်ချတောင်းပန်ကြောင်းကို ရုပ်သံတွင် ပြောဆိုထားသည်။
နမ့်ဆန်မြို့သိမ်းတိုက်ပွဲတွင် TNLA တပ်ဖွဲ့က အင်အားအလုံးအရင်း အသုံးပြုပြီး နမ့်ဆန်တပ်စခန်းကုန်းကို ထိုးစစ်ဆင်တိုက်ခိုက်ခဲ့ရာ Drop Bomb များလည်း ပစ်ချခြင်းခံရပြီး အင်အားမမျှခြင်းကြောင့် ဆုတ်ခွာထွက်ပြေးစဉ် အခြားအရာရှိ စစ်သည်များနှင့်အတူ ဖမ်းဆီးခံခဲ့ရသည်ဟုလည်း ထုတ်ဖော်ဝန်ခံထားသည်။
ထို့အပြင် ဗိုလ်မှူးချုပ် မင်းမင်းထွန်းက စစ်အာဏာသိမ်းခေါင်းဆောင် မင်းအောင်လှိုင်နှင့် ကျန်စစ်ခေါင်းဆောင်များ အားလုံးကိုလည်း ယခုကျူးလွန်နေသည့် စစ်ရာဇဝတ်မှုများကို ရပ်တန့်ပေးရန်လည်း မြန်မာပြည်သူများကိုယ်စား တောင်းဆိုကြောင်း ပြောကြားထားသည်။
TNLA တပ်ဖွဲ့၏ စစ်သုံ့ပန်းအဖြစ် ဖမ်းဆီးခံထားရသည့် ဗိုလ်မှူးချုပ် မင်းမင်းထွန်းသည် အသက် ၄၈ နှစ် ရှိပြီဖြစ်ကာ ၁၉၉၅ ခုနှစ် စစ်တက္ကသိုလ် အမှတ်စဉ် ၄၀ ဗိုလ်လောင်းသင်တန်းကို တက်ရောက်ခဲ့ကြောင်း၊ ၁၉၉၉ ခုနှစ် ဒုဗိုလ် ရာထူးဖြင့် ခလရ-၂၄၀ သိန္နီတွင် စတင်ထမ်းဆောင်ခဲ့ကာ ၂၀၂၂ ခုနှစ် ၈ လပိုင်းမှစပြီး တပ်မ-၁၀၁ တပ်မမှူးအဖြစ် ပြောင်းရွှေ့ခဲ့ပြီး နမ့်ဆန်မြို့နယ်ကို ၉ လပိုင်းမှာ ရောက်ရှိတာဝန်ထမ်းဆောင်ခဲ့ကြောင်း ၎င်း၏ ပြောကြားချက်အရ သိရသည်။
ပြီးခဲ့သည့် ဇန်နဝါရီလ ၄ ရက်တွင်လည်း လောက်ကိုင်မြို့အခြေစိုက် ဒကစ ဌာနချုပ်မှ ဗိုလ်မှူးချုပ် ၆ ဦးက ဦးဆောင်၍ ကိုးကန့်တပ်ဖွဲ့ MNDAA ထံသို့ လက်နက်ချခဲ့ပြီး စစ်ကောင်စီတပ်သား ၂၁၀၀ ကျော်နှင့် မိသားစု၀င် ၁၆၀၀ ကျော်၊ စုစုပေါင်း လူ ၄၀၀၀ နီးပါးကို လားရှိုးနှင့် ကျိုင်းတုံ ပြန်ပို့ပေးခဲ့ရသည်။
“၁၀၂၇ စစ်ဆင်ရေး” နှစ်လခွဲအတွင်း သျှမ်းမြောက်ရှိ စစ်ကောင်စီတပ်စခန်း ၃၀၀ ကျော်ကို ညီနောင်မဟာမိတ်တပ်များက တိုက်ခိုက်သိမ်းပိုက်နိုင်ခဲ့ပြီး စစ်ကောင်စီတပ်သား ၄၀၀၀ ကျော် လက်နက်ချအညံ့ခံခဲ့ကြောင်း စစ်ရေးသတင်းရင်းမြစ်များထံမှ သိရသည်။
