ကရင်နီ (ကယား)ပြည် ဒီးမော့ဆို အနောက်ဖက်ခြမ်းရှိ စစ်ဘေးရှောင်များသည် စောင်နှင့် စားနပ်ရိက္ခာများ အရေးပေါ်လိုအပ်နေကြောင်း စုံစမ်းသိရသည်။
ဒီးမော့ဆို အနောက်ဖက်ခြမ်းရှိ စစ်ဘေးရှောင်များသည် ရာသီဥတု အအေးလွန်လာမှုကြောင့် ခြုံစရာ စောင်များ လိုအပ်နေသည်။
ထို့အပြင် ရေရှာပါးမှုကြောင့် ဟင်းသီးဟင်းရွက်စိုက်မရသည့် အတွက် စားနပ်ရိက္ခာအတွက်ပါစိုးရိမ်နေပြီး လက်ရှိတွင် အလှူရှင်များကလာရောက်မှု နည်းပါးလာသောကြောင်း အနည်းငယ် ဝယ်ယူထားသည့်ခေါက်ဆွဲ ခြောက်များသာ အများဆုံး စားသုံးနေရကြောင်း စုံစမ်းသိရှိရပါသည်။
ထိုကဲ့သို့ ခြုံစရာစောင်များ မရှိသည့်အတွက် ချမ်းအေးလွန်းသောကြောင့် အိပ်မရသည့်အပြင် ကလေးသူငယ်နှင့် သက်ကြီးရွယ်အိုများသည်လည်း နာမကျန်းဖြစ်နေရကြောင်းကို ယခုလိုပြောထားသည်။
“အရမ်းအေးတော့ အိပ်မရဘူး။ ကလေးကလဲ အရမ်းအေးလို့ထင်တယ် နေသိပ်မကောင်းကြဘူး။ အသက်ကြီးတဲ့ သူတွေဆိုလဲ ပိုဆိုးတာပေါ့။ သူတို့က အနွေးဓာတ်လိုတယ်။ ကိုယ်ခံအားကလဲသိပ်မရှိတော့ ပိုဖျားကြတာပေါ့” ဟုစစ်ရှောင် အမျိုးသားတစ်ဦးကပြောသည်။
စားနပ်ရိက္ခာများမလုံလောက်သည့်အပြင် သန့်ရှင်းသော သောက်ရေး သုံးရေများ မရှိသောကြောင့် တကိုယ်ရေသန့်ရှင်းမှု နည်းပါးပြီး ကျန်းမာရေးချို့တဲ့ လာမှုကိုလည်း ယခုလို ဆိုထားသည်။
” အခုက မိုးကလည်း မရှိတော့ သီးပင်စားပင်တွေဆို စိုက်မရဘူး။ မိုးရာသီတုန်းကတော့ ကိုယ့်ဟာကို အပင်စိုက်ပြီး စားလို့ရသေးတယ်။ အခုက ရေလဲမရှိ။ အေးကလဲအေး ဘာမှကို လုပ်လို့မရဘူး။ အစားစာတွေက အဟာရမရှိလို့ထင်ပါရဲ့ ကျန်းမာရေးကလဲသိပ်မကောင်းကြဘူး” ဟု စစ်ရှောင် အမျိုးသမီးတစ်ဦးမှ သျှမ်းသံတော်ဆင့်ကို ပြောသည်။
လက်ရှိတွင် စစ်ရှောင် တစ်သိန်းနီးပါးမျှရှိပြီး (၂)နှစ်ကျော် (၃)နှစ်နီးပါးအထိ စစ်ရှောင်နေရတာဖြစ်ပြီး တခြားဒေသမှာ စစ်ရှောင်လာကြသည့် ဒေသခံများလည်း ပါသလို အများစုမှာ ကရင်နီပြည်နယ်မှ ဒေသခံများဖြစ်ကြောင်း သိရသည်။
