သျှမ်းမြောက်ဒေသတွင် စစ်ရေးပြင်းထန်နေကြသည့် စစ်ကောင်စီနှင့် ညီနောင်မဟာမိတ်တို့သည့် တရုတ်နိုင်ငံ ကူမင်းမြို့မှာ တတိယအကြိမ် ထပ်မံတွေ့ဆုံဆွေးနွေးခဲ့ပြီး ရလဒ်မကောင်းကြောင်း သတင်းထွက်ပေါ်လာသည် ။

ပြီးခဲ့သည့် ရက်ပိုင်း (ဇန်နဝါရီလ ၇ ရက်) မှ (ဇန်နဝါရီလ ၉ ရက်)အထိ တရုတ်၏ ကြားဝင်ညှိနှိုင်းပေးမှုနှင့် စစ်ကောင်စီ နှင့် ညီနောင်မဟာမိတ်တို့ ထပ်မံတွေ့ဆုံဆွေးနွေးခဲ့ကြရာ ရလဒ်ကောင်းမထွက်လာသည့်အပြင် ကိုးကန့်တပ်ဖွဲ့ MNDAA ဘက်မှ တင်းမာမှုများရှိနေသည့်အတွက်ကြောင့် ဆွေးနွေးမှုပျက်ပြဲသွားခဲ့ကြောင်း စစ်တပ်အသိုင်းအဝိုင်း တစ်ဦးက ပြောသည်။

“ပုံမှန်အားဖြင့်တော့ သူတို့တွေ့ဆုံပြီတိုင်း ဘယ်လိုလဲဆိုတာ ညတွင်းချင်းသတင်းထုတ်ပြန်လာတာရှိတယ်။ အခုကျနော်တို့ကြားရတာတော့ ဆွေးနွေးမှုက ပျက်သွားပြီတဲ့။ စစ်ကောင်စီက ကိုးကန်ဒေသ အထူး ၁ ပေးမယ်လို့ပြောတယ်။ ဒါမဲ့ ကိုးကန်တပ်ဖွဲ့တွေကို လက်နက်ချခိုင်းတာပေါ့။ ပြီးတော့ စစ်တပ်အောက်မှာပဲ နေခိုင်းတာပေါ့။ အဲကြောင့် ဆွေးနွေးမှုက ပျက်သွားတာ။ ဒါကိုလည်း MNDAA အနေနဲ့ တင်းမာထားတာပေါ့” ဟု ၎င်းကပြောသည်။

စစ်ကောင်စီ နဲ့ ညီနောင်မဟာမိတ်တို့သည့် ပြီးခဲ့တဲ့ (ဒီဇင်ဘာ ၁၁ ရက်မှ ၁၃ ရက်)ထိ တရုတ်နိုင်ငံတွင် ပထမဆုံး တွေ့ဆုံဆွေးနွေးခဲ့ပြီး ယာယီအပစ်ခတ်ရပ်စဲရန် သဘောတူညီခဲ့သကဲ့သို့ စစ်ကောင်စီက နမ့်ခမ်းမြို့နယ် စခန်းသစ်ကုန်းကိုလည်း TNLA ကို လက်လွှတ်ခဲ့ရသည်။

အလားတူ (ဒီဇင်ဘာ ၂၂ ရက်မှ ဒီဇင်ဘာ ၂၄ ရက်)ထိ ဒုတိယအကြိမ်ထပ်မံတွေ့ဆုံခဲ့ပြီး စစ်ကောင်စီဘက်မှ သျှမ်းမြောက်စစ်ရှိန်လျော့ရေးနှင့် ညီနောင်မဟာမိတ်ဘက်က လူသားချင်းစာနာထောက်ထားမှုတို့ဖြင့် ညှိနှိုင်းဆွေးနွေးခဲ့ကြသည်။

သို့သော် လက်ရှိတတိယအကြိမ်ဆွေးနွေးမှုအပြီးမှာ သျှမ်းပြည်မြောက်ပိုင်းအတွင်း တိုက်ပွဲတွေ ပိုပြင်းထန်လာနိုင်သကဲ့သို့ စစ်ဘေးရှောင် ( ၃၀၀၀) နီးပါးရှိသည့် လားရှိုးမြို့ နှင့် မန္တလေးအထိ တိုက်ပွဲတွေ ပြန့်ကြဲသွားနိုင်ကြောင်း ဒေသခံများကလည်း သုံးသပ်ပြောဆိုနေကြသည်။

လက်ရှိတွင် လားရှိုးမြို့နယ်၏ ဘေးပတ်လည်တွင် တိုက်ပွဲပြင်းထန်နေလျက်ရှိပြီး လားရှိုးမြို့တွင်း တိုက်ပွဲဖြစ်လာမည်ကို ဒေသခံများက စိုးရိမ်မှုမြင့်တက်ရာ ထွက်ပြေးတိမ်းရှောင်နေကြသည်။

“ လားရှိုးမြို့မှာတော့ အခုတော့ အကုန်ထွက်ပြေးသွားနေကြပြီ။ တစ်ရက်ကို ကားအစီ၁၀၀ ကျော်လောက်က ထွက်ပြေးတိမ်းရှောင်နေကြပြီ။ ပြောချင်တာကတော့ အသက်ကြီးတဲ့သူတွေ ၊ ကျန်းမာရေးမကောင်းတဲ့သူတွေလည်း ထွက်ပြေးတိမ်းရှောင်ထားသင့်နေပြီပေါ့။ သတင်းတွေကိုလည်း နားစွန့်နားထောင်နေရတယ်။ အခုဆွေးနွေးမှုရလဒ်နဲ့တော့ လားရှိုးအထိတိုက်ပွဲရောက်လာနိုင်တယ်” ဟု လားရှိုးမြို့ဒေသခံတစ်ဦးက ပြောသည်။

ယင်းကိစ္စနှင့် ပတ်သက်၍ လားရှိုးမြို့ရှိ မန်ဆူဆရာတော်က မြို့အတွင်းသို့ တိုက်ပွဲဖြစ်ပွားမည် မဟုတ်ကြောင်း ဗီဒီယိုရုပ်ပုံ နှင့်အတူ ယမန်နေ့ ( ဇန်နဝါရီလ ၉ ရက်)မှာ လူမှုကွန်ရက်စာပေါ်မှာပေါ်၌ ပျံ့နှံ့လာသည်။

စစ်ကောင်စီ၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကလည်း စစ်ကောင်စီဘက်မှ လက်လွှတ်ပေးလိုက်ရသည့် မုံးကိုး ၊ ချင်းရွှေဟော်တို့ နေရားများကို ပြန်လည်လုံခြုံမှုတည်ဆောင်နိုင်ဖို့အတွက် ဆောင်ရွက်နေကြောင်း စစ်ကောင်စီ ထုတ် သတင်းစာမှာ ပြောဆိုထားသည်။

“ကွမ်လုံဗျူဟာနဲ့ ကွပ်ကဲမှုအောက် တပ်တွေအနေနဲ့ကတော့ ရက်သတ္တပတ် တစ်ပတ်ခန့်ရှိပြီ၊ ရန်သူကို ရွပ်ရွပ်ချွံချွံ ခုခံတိုက်ခိုက်နေတာမျိုး ဖြစ်ပါတယ်။ ပြီးရင်တော့ TNLA ဝင်ရောက်သွားတဲ့ သိန္နီမြို့ အခြေအနေမှာတော့ သိန္နီမှာရှိတဲ့ တပ်တွေအနေနဲ့ ပြန်လည်လွှမ်းမိုးမှုရရှိပြီး ဖြစ်ပါတယ်။ ပြီးရင် လားရှိုးမြို့အနီးတဝိုက်၊ ကွတ်ခိုင်တဝိုက်မှာရှိတဲ့ သောင်းကျန်းသူ ပူးပေါင်းအဖွဲ့တွေကိုတော့ ရှင်းလင်းဆောင်ရွက်ပြီးဖြစ်ပါတယ်။ ထို့အတူ မုံးကိုးတို့၊ ချင်းရွှေဟော်တို့၊ လက်လွှတ်ခဲ့ရတဲ့ နေရာလေးတွေ ရှိတယ်။ ဒီလက်လွှတ်ခဲ့ရတဲ့ နေရာလေးတွေမှာလည်း ပြန်လည်ပြီးတော့ လုံခြုံမှုတည်ဆောက်နိုင်ရေး ဆောင်ရွက်လျက်ရှိပါတယ်” ဟု ပြောသည်။

တစ်ဖက်တွင်လည်း စစ်ကောင်စီ၏ အမျိုးသားစည်းလုံးညီညွတ်ရေး နှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီနှင့် NCA လက်မှတ်ရေးထားသော တိုင်းရင်းသားလက်နက်ကိုင်တပ်ဖွဲ့တို့ နေပြည်တော်တွင် ယမန်နေ့ ဇန်နဝါရီ ၉ ရက်နေ့စ၍ တွေ့ဆုံဆွေးနွေးခဲ့သည်။

အဆိုပါ ဆွေးနွေးပွဲကို ၂ ရက်အတွင်း ပြုလုပ်မည်ဖြစ်ပြီး ယနေ့ (ဇန်နဝါရီ ၁၀)ရက် ဒုတိယနေ့ နွေးဆွေးပွဲတွင် အာဆီယံ အထူးကိုယ်စားလှယ် လာအိုနိုင်ငံ မစ္စတာ ခစ်တီခွန်နှင့် တွေဆုံရန်ရှိကြောင်း သိရသည်။

မြန်မာနိုင်ငံတစ်ဝှမ်း တိုက်ပွဲတွေဖြစ်ပွားနေချိန်တွင် စစ်ကောင်စီဘက်က လက်နက်ကိုင်တပ်ဖွဲ့များနှင့် ငြိမ်းချမ်းရေး ဆွေးနွေးဖို့အတွက် အပြင်းထန်လှုပ်ရှားနေလျက်ရှိသည်။