သျှမ်းပြည် မိုးမိတ်မြို့နယ်တွင် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် ( TNLA )တပ်ဖွဲ့တို့ နှစ်ဘက်ထိတွေ့တိုက်ပွဲ ပြင်းထန်ခဲ့ကြောင်း စုံစမ်းသိရသည်။
ယမန်နေ့ (ဇန်နဝါရီလ ၉ ရက်) နံနက် ၉ နာရီခန့်မှ စတင်ကာ မိုးမိတ်မြို့နယ် မန်ဖွယ်(ဖိုင်ခမ်း)ရွာအနီး စခန်းချတပ်စွဲထားသည့် စစ်ကောင်စီတပ်ကို TNLA က ထိုးစစ်ဆင်တိုက်ခိုက်ခဲ့ပြီး စစ်ကောင်စီက လေကြောင်းဖြင့်ပစ်ကူ ပြန်လည်တိုက်ခိုက်ခဲ့ကြောင်း မိုးမိတ်ဒေသခံများက ပြောသည်။
“ဖိုင်ခမ်းရွာ အပေါ်ဘက်မှာ မနေ့က မနက် ၉ နာရီလောက်ကနေ တိုက်ပွဲစဖြစ်တာ နေ့လယ် ၂ နာရီလောက်ကျမှ သေနတ်သံ တိတ်သွားတယ်။ နေ့လယ် ၁ နာရီလောက်မှာ စစ်ကောင်စီတပ်က ဂျက်ဖိုက်တာ ၂ စီး၊ ရဟတ်ယာဉ် ၁ စီးနဲ့ ဗုံးကြဲတော့ ရွာထဲကျပြီး အိမ် ၂ လုံး ပျက်စီးသွားတယ်”ဟု မိုးမိတ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်က လေကြောင်းဖြင့် တိုက်ခိုက်မှုကြောင့် မန်ဖွယ်(ဖိုင်ခမ်း)ရွာ တောင်ဘက်ရှိ ပါရမီဆုတောင်းပြည့် မိုင်းဖုန်းစေတီကို ဗုံးစထိမှန်ပြီး လူထိခိုက်ဒဏ်ရာရရှိမှု မရှိကြောင်း မိုးမိတ်ဒေသခံများထံမှ သိရသည်။
“မိုင်းဖုန်းစေတီဘက်မှာ စစ်ကောင်စီတပ်က စခန်းလာချတာ ရက်တော်တော်ကြာပြီ၊ မနေ့က မဟာမိတ်တပ်တွေ ထိုးစစ်ဆင်တော့ အဲ့တပ်ကနေ စစ်ကောင်စီတပ်သားတွေ တပ်ပြန်ဆုတ်သွားတယ်။ အဲ့လိုမဆုတ်ခင်မှာ လေယာဉ်နဲ့လည်း လာပစ်သေးတယ်။ အခုတော့ အဲ့စေတီမှာ မဟာမိတ်တွေ နေရာယူထားတယ်”ဟု မိုးမိတ်မြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် ဇန်နဝါရီလ ၅ ရက်နေ့က TNLA တပ်ဖွဲ့ သိမ်းပိုက်ထားသည့် စင့်ကင်တပ်စခန်းဘက်ကို လည်း လေကြောင်းဖြင့် ဗုံး ၂ လုံး လာရောက်ကြဲချခဲ့ကြောင်း မိုးမိတ်ဒေသခံများက ပြောသည်။
ဇန်နဝါရီ လဆန်းပိုင်းမှစ၍ မိုးမိတ်မြို့နယ်အတွင်းရှိ စစ်ကောင်စီလက်အောက်ခံ မန်ပတ်တပ်စခန်း၊ စင့်ကင်တပ်စခန်းနှင့် နမ့်ခွယ်တပ်စခန်း ၃ ခုကို TNLA တပ်ဖွဲ့၊ KIA နှင့် PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်နိုင်ခဲ့သည်။
မိုးမိတ်မြို့အခြေစိုက် စစ်ကောင်စီတပ်များက လက်နက်ကြီးနှင့်လေကြောင်းဖြင့် ညီနောင်မဟာမိတ်တပ်များကို ပြန်လည်တိုက်ခိုက်ခဲ့ခြင်းကြောင့် မိုးမိတ်မြို့ဒေသခံများမှာ လုံခြုံရေးစိုးရိမ်ထိတ်လန့်ပြီး မန္တလေး၊ ပြင်ဦးလွင်မြို့များသို့ တိမ်းရှောင်ထွက်ပြေးနေကြောင်း ဒေသခံများက ပြောသည်။
Leave a Comments