သျှမ်းပြည် တန့်ယန်းမြို့နယ်အတွင်း အာဏာသိမ်း စစ်ကောင်စီ တပ်ဖွဲ့မှ သေနတ်နှင့်လက်နက်ကြီးများကို တစ်ဖက်သတ် ရမ်းသမ်းပစ်ခတ်မှု ပြုလုပ်သည့်အတွက် ဒေသခံများက စိုးရိမ်ထိတ်လန့်နေကြောင်း စုံစမ်းသိရသည်။

ဇန်နဝါရီလ ၇ ရက်နေ့ ညနေပိုင်း ၆ နာရီဝန်းကျင်တွင် တန့်ယန်းမြို့ အခြေစိုက် အာဏာသိမ်း စစ်ကောင်စီ တပ်အမှတ် (၃၃)(အမြောက်တပ်)မှ လက်နက်ကြီး နှင့် သေနတ်ပစ်ဖောက်ခဲ့သည့် အတွက် ဒေသခံများက တုန်လှုပ်ခြောက်ခြားမှု ဖြစ်ခဲ့ကြောင်း အသက် (၃၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

“အသံလည်း တော်တော်ကြီးကျယ်တော့ တမြို့လုံးနီးနီးကြားကြရတယ်။ လက်နက်ကြီးအသံက တစ်ချက်ပဲ။ ပြီးတော့ နောက်ကနေ သေနတ်သံ ၃/၄ ချက် ထပ်ကြားရတယ်။ သူတို့ တစ်ဖက်သတ် ပစ်တဲ့ အသံပဲ၊ ခြောက် တာလား၊ လက်နက်စမ်းတာလားတော့မသိဘူး။ ကျနော်တို့က ကြောက်လို့ ကောင်းကောင်းတောင် မအိပ်ခဲ့ရဘူး” ဟု တန့်ယန်းမြို့ ဒေသခံ အမည်မဖော်လိုသူ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ လက်နက်ကြီး အသံ နှင့် သေနတ်ပစ်ခတ်မှု အသံ ကြားကြရသည့် တန့်ယန်းမြို့ ဒေသခံများမှ တချို့သည် ကတုတ်ကျင်း၊ ဗုံးခိုကျင်းများသို့ ညတွင်းချင်း ဝင်ရောက်ခိုလှုံခဲ့ရကြောင်းလည်း အထက်ပါ အမျိုးသား က သျှမ်းသံတော်ဆင့်ကို ဆက်လက်ပြောဆိုသည်။

ထို့အပြင် လက်ရှိ အချိန်၌ တန့်ယန်းမြို့နယ်အတွင်း အခြေစိုက် စစ်ကောင်စီတပ်များ အပြင် လောက်ကိုင်မြို့ နှင့် ကွန်လုံမြို့တို့မှ စစ်ကောင်စီတပ်သား၊ တပ်ဖွဲ့တချို့လည်း ရောက်ရှိနေမှုကြောင့် ဒေသခံများက တန့်ယန်းမြို့နယ် အတွင်း စစ်ရေးလေ့လာသုံးသပ်နေသူ အသက် (၅၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

“အတွင်းသတင်းတွေ သိရသလောက်တော့ ခုဆို တန့်ယန်းတပ်ထဲမှာလည်း လောက်ကိုင်တို့၊ ကွန်လုံတို့ဘက်က လာတဲ့စစ်သားတွေ ရောက်နေတာ အများကြီးပဲတဲ့၊ စစ်ကားတွေဆိုလည်း အဝင်အထွက်နေ့တိုင်းလိုလိုရှိနေတာ။ အဲ့ကြောင့် ကျနော်တို့မြို့မှာလည်း တိုက်ပွဲတွေ ဖြစ်လာမှာကြောက်နေတာ။ တချို့ကတောင် စစ်ပြေးဖို့ ပြင်ဆင်ရ မလား ဖြစ်နေပြီ” ဟု တန့်ယန်းမြို့ခံ စစ်ရေးလေ့လာသုံးသပ်နေသူ အသက် (၅၀) ဝန်းကျင် အမျိုးသား တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဒီဇင်ဘာလလ နှောင်းပိုင်းမှ စတင်ပြီး စစ်ကောင်စီ တပ်ဖွဲ့မှ တန့်ယန်းမြို့နယ် အတွင်း လက်နက်ကြီးဖြင့် တစ်ဖက်သတ် ရမ်းသမ်းပစ်ခတ်မှု မကြာခဏ ပြုလုပ်လေ့ရှိကြောင်းလည်း ဒေသခံများ ထံမှ သိရသည်။

လက်ရှိ အချိန်သည် အာဏာသိမ်း စစ်ကောင်စီ တပ်နှင့် မဟာမိတ် ပူးပေါင်း တပ်ဖွဲ့တို့၏ စစ်ဆင်ရေး တိုက်ပွဲများလည်း သျှမ်းမြောက်ဒေသ အတွင်း ပြင်းထန်နေလျက်ရှိသည့် အတွက် တန့်ယန်းမြို့ခံများက မြို့နယ်အတွင်း တိုက်ပွဲ ကူးစက် ဖြစ်ပွားလာမှာကို စိုးရိမ်ကြောက်လန့်နေရကြောင်း သိရသည်။