သျှမ်းပြည် မြောက်ပိုင်း၊ မြို့တော် လားရှိုးနေ ဒေသခံ ပြည်သူ အများအပြား မြို့ကို စွန့်ခွာနေကြောင်း မြို့ခံ တစ်ဦးက ယနေ့ (ဇန်နဝါရီ ၉ ရက်)တွင် ပြောသည်။
ပြီးခဲ့သည့် ဇန်နဝါရီ ၇ ရက်တွင် သိန္နီကို ညီနောင်မဟာမိတ်တပ်များ တိုက်ခိုက် သိမ်းပိုက်ပြီးနောက် လားရှိုးမြို့ အနီး တိုက်ပွားများ ဖြစ်ပွားလာရာက မြို့ကို တိုက်ခိုက် သိမ်းပိုက်မည် ဆိုသည့် သတင်းများ ကျယ်ကျယ်ပြန့်ပြန့် ထွက်ပေါ်လာပြီးနောက် ယခုလို မြို့ကို စွန့်ခွာနေခြင်းဖြစ်ကြောင်း ၄င်းကဆိုသည်။
“မနေ့က ကျနော်တို့ ထွက်လာတာ။ မြို့က ထွက်လာတဲ့သူတွေ အများကြီးပဲ။ နည်းနည်းနောနော မဟုတ်ဘူး။ ကျနော်ကတော့ မိသားစုကို သျှမ်းတောင်မှာ ထားခဲ့ပြီး ပြန်သွားမယ်။ အိမ်ပြန်စောင့်ရမယ်။ အိမ်ဖောက်ဖို့ ချောင်းနေတဲ့သူတွေကလည်း အများကြီးပဲ” ဟု ၄င်းကရှင်းပြသည်။
လက်ရှိ လားရှိုး-မန္တလေးလမ်း ပြတ်တောက်နေသည်ဖြစ်ရာ မြို့စွန့်ခွာသူများ အနေဖြင့် လာရှိုးမှ ထွက်လာပါက တန့်ယန်း လမ်းခွဲ၊ တန့်ယန်း လမ်းခွဲမှ ပြင်ရွာရောက်ပါက ညာကွေ့ပြီး တောလမ်းမောင်းကာ စဥ့်အင်တံတား အပေါ်နားက ကုန်းပုံရွာ ရောက်ရှိမည်ဖြစ်ပြီး ကုန်းပုံရွာမှ ၉ မိုင်လမ်းခွဲ၊ ယင်းမှ နမ့်လန်သို့သွားကာ နမ့်လန်မှ ကျောက်ဂူ၊ ကျောက်ဂူမှ ရပ်စောက်သို့ သွားရောက်နိုင်သည်ဟု ၄င်းက ရှင်းပြသည်။
လားရှိုး-မိုင်းရယ် လမ်းမှတစ်ဆင့် သျှမ်းတောင်ဘက် သွားပါက မိုင် ၁၀၀ ခန့် ပိုဝေးသည်ဟု ၄င်းက မှတ်ချက်ပြုသည်။
၂၀၁၄ ခုနှစ် သန်းခေါင်စာရင်းအရ လားရှိုးမြို့တွင် လူဦးရေ ၆ သောင်းကျော်သာ ရှိသော်လည်း NLD အစိုးရ လက်ထက် ရွှေ့ပြောင်း အခြေချသူ များပြားလာကာ ဒေသတွင်း စစ်ဘေးရှောင်များပါ လာရောက် ခိုလှုံနေသဖြင့် လက်ရှိ လူဦးရေ တစ်သိန်းကျောရှိမည်ဟု လားရှိုးမြို့ အခြေစိုက် လူမှုကူညီရေးအသင်း တာ၀န်ရှိသူ တစ်ဦးက ပြောသည်။
“လောက်ကိုင်နဲ့ တခြားက စစ်ရှောင်တွေလည်း အများကြီး ရှိနေတယ်။ အခုက တတ်နိုင်တဲ့သူတွေကတော့ ကိုယ့်ကားနဲ့ကိုယ် မြို့က ထွက်နေကြတာ။ မန္တလေးကို တောလမ်းက ဆွဲပေးနေတဲ့ လိုင်းကားတွေလည်းရှိတယ်။ ကားခကတော့ စျေးကြီးတယ်။ ကျနော်တို့ ထွက်မသွားပါဘူး။ မြို့ပေါ် တိုက်ပွဲဖြစ်ရင် ဘယ်လို ကူညီမလဲ ဆိုတာ ပြင်ဆင်နေပါတယ်” ဟု ၄င်းက ရှင်းပြသည်။
မြို့ပေါ် ရပ်ကွက် ၁၂ ခုဖြင့် ဖွဲ့စည်းထားသော လားရှိုးမြို့တွင် အရှေ့မြောက်တိုင်းစစ်ဌာနချုပ် အခြေစိုက်ထား သဖြင့် ညီနောင်မဟာမိတ်များ အနေဖြင့် လားရှိုးမြို့ကို တိုက်ခိုက် သိမ်းပိုက်မည် ဆိုသည့် သတင်းများ ကျယ်ကျယ်ပြန့်ပြန့် ထွက်ပေါ်နေကြောင်း ၄င်းကဆိုသည်။
ပြီးခဲ့သည့် ဇန်နဝါရီလ ၅ ရက်နေ့က လားရှိုးမြို့ အနီးရှိ ဖိုင်တောင်းနှင့် မက်ချိနုရွာဘက်တွင် စစ်ကောင်စီတပ်နှင့် ညီနောင်မဟာမိတ်တပ်များ တိုက်ပွဲဖြစ်ပွားခဲ့ရာ စစ်ကောင်စီတပ်က လက်နက်ကြီးများ ပစ်ခတ်သဖြင့် မြို့တွင်း တိုက်ပွဲများ ဖြစ်ပွားလာမည်ကို မြို့နေလူထု စိုးရိမ်ခဲ့ကြသည်ဟု ဒေသခံ တစ်ဦးက ဆိုသည်။
“အဲတုန်းကတည်းက စိုးရိမ်တာပေါ့။ နောက်ရက်ပိုင်း သိန္နီနဲ့ ကွတ်ခိုင်မြို့ သိမ်းလိုက်ပြီး လားရှိုးသိမ်းမယ် ကြားလို့ အခုလို ရှောင်ကြတာ” ဟု ၄င်းကဆိုသည်။
ပြီးခဲ့သည့်နှစ် ဇွန်လ ၅ ရက်နေ့က လားရှိုးမြို့ အားကစားကွင်း အရှေ့၊ အမှတ် (၁၂) ရပ်ကွက်ရှိ ရဲစခန်း၊ အမှတ် (၅) ရပ်ကွက်ရှိ (၅၀၇) စစ်တပ်စခန်း၊ မြို့အနီး ပန်ဟုန်းရွာရှိ စစ်တပ်စခန်းများကို MNDAA က တိုက်ခိုက်ခဲ့သေးသည်။
Leave a Comments