Thursday, April 18, 2024

ပင်လောင်းစစ်ရှောင်များအတွက် အလှူရှင်မရှိ စားနပ်ရိက္ခာ အရေးပေါ်လိုအပ်

Must read

သျှမ်းပြည် ပင်လောင်းမြို့နယ်ရှိ စစ်ရှောင်များအတွက် အလှူရှင်များမရှိသဖြင့် စားဝတ်နေရေးအတွက် အခက်အခဲများကြုံတွေ့နေရကြောင်းသိရသည်။

ပင်လောင်းစစ်ရှောင်

သျှမ်းပြည် ပင်လောင်းမြို့နယ်သို့ရောက်ရှိနေသော ကရင်နီစစ်ဘေးရှာင်များအတွက် အလှူရှင်များမရှိသည့် အတွက်ကြောင့် စားဝတ်နေ‌ရေး၊စောင့်နှင့် ဆေးဝါများ အရေးပေါ်လိုအပ်နေကြောင်းစစ်ဘေးရှောင် ကူညီသူတစ်ဦးက သျှမ်းသံတောင်ဆင့်ကိုပြောသည်။

“ခုကနောက်ပိုင်း အလှူရှင်တွေက မရှိသလောက်ရှားတယ်ဆိုတာထပ်လုံးဝ ရှိကိုမရှိတော့တာ။ တော်တော်လေး လည်း ဖျားနေကြတာ။သူတို့အတွက်ကလည်း ဘာမှမရှိတော့ဘူး။ ဆေးဝါးတွေလည်း သယ်ရတာ ရမ်းအန္တရယ် များတယ်။ကျနော်သယ်တုန်းက ဖမ်းခံရ တော့မလို့ပဲ။ အကူညီ တောင်းလာတာတွေတော့ရှိတယ် အမိုး၊ အကားတွေ၊ စောင်တွေ အရေးပေါ်လိုအပ်နေတယ်။ ကျနော်လည်း ပေးဖို့မရှိတော့ ဘယ်လိုမှလုပ်လို့မရတဲ့ အနေအထားဖြစ်နေတယ်။”ဟု စစ်ရှောင်ကူညီနေသူ အမျိုးသားတစ်ဦးက ပြောသည်။

ဆွေမျိုးအိမ်များသို့လာရောက် ခိုလှုံနေသော စစ်ဘေးရှောင်များလည်း စားဝတ်နေရေးအတွက် ရုန်းကန်နေရပြီး အကူညီများလိုအပ်နေကြောင်းနှင့် စစ်ဘေးရှောင် ကူညီသူများထံမှ အကူအညီများလိုအပ်နေကြကြောင်း စစ်ဘေးရှောင်များက သျှမ်းသံတောင့်ကို ပြောသည်။

ပင်လောင်း စစ်ရှောင်

“နေ့စားအလုပ်လေးပဲလုပ်နေရတာ အလှူရှင်တွေက လာကိုမလာတာဗျာ။အလုပ်ကလည်းရှားတော့ ရှိလေးနဲ့ စားသောက်နေရတာ။ငရုတ်သီးခူးတာကလည်းပြီးသွားပြီ။လူဦးရေများပြီး အလုပ်ကရှားတာပေါ့။ ငရုတ်သီး ခူတုန်းက နို့ဆီဘူးတစ်လုံးမှ ၂၅၀ကျပ်ပဲရတာလေ။ ပင်လောင်းကလည်း ဘာမဆိုဈေးကြီးနေတာကော။ ရေတွေ ကလည်းရှား၊နေရတာလည်းအေးတယ်။ဘာမှလည်းရှာစားလို့ မတက်ဘူး။ရေတွေလည်း ဝယ်သုံးနေရတာပေါ့။ ထင်းတွေလည်း ရှားတယ်။”ဟု ကရင်နီစစ်ဘေးရှောင်အမျိုးသားတစ်ဦးက ပြောသည်။

ပင်လောင်းမြို့နယ် စစ်ရှောင်စခန်းများတွင် စစ်ရှောင်ဦးရေ ၃ သောင်းခန့်ရှိပြီး အများစုသည် သက်ကြီးရွယ်အို နှင့် ကလေးငယ် အများဆုံးဖြစ်သည်။

အလားတူ အောင်ပန်းဂိတ်၊ နောင်တရားဂိတ် ၊ပင်လောင်းမြို့အဝင်၊အထွက်ဂိတ်၊ရင်းမှီးရွာအနီးနှင့် ဆောင်း ပြောင်းဂိတ်‌ တို့တွင်လည်း စစ်ကောင်စီ နှင့် PNO ပြည်သူ့စစ် များက စားသောက်ကုန်များ၊ အဝတ်အစားများ၊ မိုးကာများ နှင့် ဆေးဝါးများကို သယ်ယူဖြတ်သန်းရန် မပြုသဖြင့် စစ်ရှောင်များအတွက် အခက်အခဲများစွာ ကြုံနေရကြောင်း သိရသည်။

သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် နိုဝင်ဘာလ ၁၅ ရက်မှထွက်ပြေးလာပြီး၊ လက်ရှိတွင် သျှမ်းပြည် တောင်ပိုင်း ပင်လောင်း၊ ညောင်ရွှေ၊ အင်းလေးနှင့် ဆီဆိုင် ဒေသများတွင် ကရင်နီပြည်မှ အရေးပေါ် တိမ်းရှောင်လာပြီး ဘုန်းကြီးကျောင်းများနှင့် ဆွေမျိုးအိမ်များသို့ လာရောက် စစ်ဘေးရှောင်နေကြပြီး စားဝတ်နေရေး နှင့် အနွေးထည်များ လိုအပ်နေကြောင်း သိရသည်။

Leave a Comments

- Advertisement -spot_img

Latest article