သျှမ်းပြည် မူဆယ်ခရိုင် ပန်ဆိုင်းမြို့ဒေသခံများက ကိုးကန့်အဖွဲ့ ( MNDAA) စစ်သားများအတွက် တစ်ရက် လျှင် လူဦးရေ ၂၀ဦး စားဖွယ်စရာသွားရောက် ချက်ပြုတ်ပေး နေရကြောင်း စုံစမ်းသိရသည်။
ပန်ဆိုင်းမြို့အတွင်းသို့ MNDAA မှ စတင်ထိန်းချုပ်သည့်အချိန် နိုဝင်ဘာ လကုန်မှစပြီး ဒေသခံ ၂၀ဦးသည် MNDAA စစ်သားများအတွက် နေ့စဥ်စားဖွယ်စရာ သွားရောက်ပြင်ဆင်ပေးရကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“အခုက ကိုးကန့်အဖွဲ့ရဲ့ အမိန့်ပါ။ ယောက်ျား ၁၀ယောက်၊ မိန်းကလေး ၁၀ယောက် သွားရတယ်။ မသွားရင်တော့ တစ်ယောက်ကို တစ်ယောက် တရုတ်ယွမ် ၁၂၀ (မြန်မာငွေ ၆သောင်းကျပ်)ပေးရတယ်” ဟု ၎င်းအမျိုးသားက ဆိုသည်။
ဆက်လက်ပြီး အဆိုပါ MNDAA အတွက် စားနပ်ရိက္ခာများသွားရောက်ပြင်ဆင်ပေးသူများသည် နေ့လည် ၁နာရီစတင်သွားပါက နောက်တစ်ရက် နေ့လည် ၁နာရီမှသာ အိမ်ပြန်ခွင့်ရကြောင်း၊ သွားရောက်အလုပ်လုပ်ရချိန် ၂၄နာရီရှိကြောင်းလည်း သိရသည်။
” ကျနော်တို့က ချက်ပြုတ်ပြီးရင် ထမင်းထုပ် ဟင်းထုပ် ပြန်လုပ်ရတယ်။ သူတို့က လာယူပြီး ရှေ့တန်းရောက်တဲ့ စစ်သားတွေဆီ ပြန်ပို့တာပေါ့။ သွားရင်တော့ အားလုံး အဲ့မှာ အိပ်ရတယ်” ဟု MNDAA အတွက် စားစရာသွားပြင်ဆင်ပေးသည့် အမျိုးသားက ဆက်လက်ပြောသည်။
လက်ရှိမှာ မူဆယ်ခရိုင်အတွင်း တိုက်ပွဲများငြိမ်နေသော်လည်း နေရပ်ပြန်နေရန် ခက်ခဲနေကြောင်း သိရသည်။
ထို့အပြင် ပန်ဆိုင်းမြို့တွင် ဒီဇင်ဘာလ လလယ်မှစ၍ လျှပ်စစ်မီးကို MNDAA က တရုတ်နိုင်ငံမှ တဆင့် သွယ်တန်းပေးပြီး တစ်ယူနစ်လျှင် တရုတ်ယွမ်ငွေ ၂ ယွမ် (မြန်မာငွေ ၈၀၀ ကျပ်) ဖြင့် MNDAA ထံပေးသွင်းပြီး ပန်ဆိုင်းမြို့၏ ၈၀ ရာခိုင်နှုန်းခန့်သော နေအိမ်များသည် တရုတ်နိုင်ငံမှ လာသော လျှပ်စစ်မီးများကို စတင်သုံးစွဲနေပြီဖြစ်ကြောင်း ဒေသခံများက ပြောသည်။
Leave a Comments