သျှမ်းပြည် ကိုးကန့်ဒေသ လောက်ကိုင်မြို့ကို စစ်ကောင်စီတပ်မှ စွန့်လွှတ်လိုက်ရသည့်အပေါ် တပ်မိသားစုဝင်များ၏ လုံခြုံရေးကိုဦးစားပေး စဉ်းစားခဲ့၍ လက်နက်ချခဲ့ရခြင်းဖြစ်ကြောင်း စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပေါ်ပြူလာနယူးစ်ကို ဖြေကြားထားသည်။
ပြီးခဲ့သည့် ဇန်နဝါရီလ ၄ ရက်တွင် လောက်ကိုင်မြို့တွင်နောက်ဆုံးတစ်ခုတည်းသော ကျန်ရှိနေသည့် ဒေသကွပ်ကဲမှု စစ်ဌာနချုပ် (ဒကစ) မှ ကိုးကန့်တပ်ဖွဲ့ MNDAA ထံသို့ လက်နက်ချအညံ့ခံမှုသည် ဒေသခံတပ်မှူးများ၏ အကောင်းဆုံးစဉ်းစားဆုံးဖြတ်ခဲ့ခြင်းသာ ဖြစ်ကြောင်း ၎င်းကဆိုသည်။
“တပ်မတော်အနေနဲ့ လောက်ကိုင်ဒေသ အခြေအနေနဲ့ ပတ်သက်ပြီး အဖက်ဖက်က စဉ်းစားခဲ့ပါတယ်။ စဉ်းစားခဲ့တဲ့နေရာမှာ နံပါတ် (၁) အနေနဲ့ မိသားစုဝင်များရဲ့ လုံခြုံရေးကို စဉ်းစားပါတယ်။ လောက်ကိုင်ဒေသမှာက တပ်မတော်သားအပြင် တပ်မတော်သားတွေရဲ့ မိသားစုဝင်တွေ နေထိုင်တာဖြစ်တယ်။ မိသားစုဝင်တွေရဲ့ လုံခြုံရေးကို ဦးစားပေး စဉ်းစားခဲ့ပါတယ်”ဟု ဗိုလ်ချုပ်ဇော်မင်းထွန်းက ဖြေကြားထားသည်။
ကိုးကန့်တပ်ဖွဲ့ MNDAA အနေဖြင့် လောက်ကိုင်မြို့ကို ပြန်လည်ထိန်းချုပ်နိုင်ရန် အဆိုပါမြို့ရှိ စစ်ကောင်စီ တပ်စခန်းများကို နှစ်လကျော်အတွင်း ထိုးစစ်ဆင်တိုက်ခိုက်လာစဉ် လောက်ကိုင်(ဒကစ)မှ လက်နက်ချဖြစ်ဉ်အပြီး MNDAA ကမြို့ကိုပြန်လည်ထိန်းချုပ်နိုင်ခဲ့ကြောင်း ကြေညာလိုက်သည်။
ထိုလက်နက်ချအညံ့ခဲထဲတွင် ဗိုလ်မှူးချုပ်အဆင့် (၆) ဦး ပါဝင်ပြီး တပ်သား (၂,၁၀၀)ကျော်နှင့် တပ်မိသားစုဝင် (၁၆၀၀) ကျော်ပါရှိကြောင်း ထုတ်ပြန်ချက်၌ ရေးသားဖော်ပြထားသည်။
