သျှမ်းပြည် မိုးမိတ်မြို့နယ် ကျန်ကန်တပ်စခန်းကို တအာင်း(ပလောင်)အမျိုးသားလွတ်မြောက်ရေး တပ်မတော် TNLA မှ ယနေ့ (ဇန်နဝါရီလ ၅ ရက်) နံနက်အစောပိုင်းတွင် တိုက်ခိုက်သိမ်းပိုက်နိုင်ခဲ့ကြောင်း ထုတ်ပြန်ထားသည်။
စစ်ကောင်စီလက်အောက်ခံ စကခ-၂၁ နှင့် ခလရ-၂၂၃ တို့အခြေချတပ်စွဲထားသော အဆိုပါစခန်းအား ပြီးခဲ့သည့် (ဇန်နဝါရီလ ၃ ရက်)တွင် တအာင်းတပ်ဖွဲ့ TNLA မှစတင်ထိုးစစ်ဆင် တိုက်ခိုက်ခဲ့ရာ သုံးရက်ကြာယနေ့ နံနက်အစောပိုင်း၌ သိမ်းပိုက်နိုင်ခဲ့ကြောင်း ဆိုသည်။
ထိုစခန်းသိမ်းတိုက်ပွဲအတွင်း စစ်ကောင်စီ၏ လက်နက်ခဲယမ်းများနှင့် စစ်သုံးဆောင် ပစ္စည်းများလည်း ရှင်းလင်းသိမ်းရမိကြောင်း ရေးသားဖော်ပြထားသည်။
သို့သော် တိုက်ပွဲအတွင်း နှစ်ဖက်လက်နက်ကိုင်တပ်ဖွဲ့၏ ထိခိုက်သေဆုံးမှုကိုတော့ ရေးသားဖော်ပြခြင်းမရှိပေ။
ယင်းတပ်စခန်းကို TNLA မှ တိုက်ခိုက်နေစဉ်အတောအတွင်း မိုးမိတ်မြို့ရှိ စစ်ကောင်စီ တပ်စခန်းမှ လက်နက်ကြီးဖြင့် ပစ်ကူခဲ့သလို လေကြောင်းဖြင့်လည်း ပစ်ကူတိုက်ခိုက်ခဲ့ကြောင်း ထုတ်ပြန်ချက်အရ သိရသည်။
“၁၀၂၇ စစ်ဆင်ရေး” နှစ်လကျော်ကာလအတွင်း သျှမ်းမြောက်ဒေသရှိ မြို့ပေါင်း ၆ ခုကို TNLA မှ ထိန်းချုပ်ထားလျက်ရှိသည်။
Leave a Comments