သျှမ်းပြည်နယ် မြောက်ပိုင်းနှင့် ဆက်စပ်နေသည့် ဟိုပန်မြို့တွင်း “၀” သွေးစည်းညီညွတ်ရေး တပ်မတော်-UWSA က ယနေ့ (ဒီဇင်ဘာ ၅)ရက် နေ့လယ်ပိုင်းတွင် ဝင်ရောက် နေရာယူပြီး မြို့လယ်တွင် “၀”တပ်ဖွဲ့ အလံလွှင့်တင် လိုက်သည်ဟု သတင်းသိရသည်။
ဟိုပန်မြို့နယ်တွင် စစ်ကောင်စီ ဗိုလ်မှူးချုပ် အဆင့် ဦးစီးသည့် စစ်တပ်များ ရှိနေပြီး ယနေ့ မနက် ၄ နာရီ ၀န်ကျင်းတွင် ညီနောင် မဟာမိတ်တပ်များ မြို့ကို ထိန်းချုပ်ပြီးနောက် နေ့လယ်ပိုင်းတွင် “၀” တပ်ဖွဲ့ ၀င်ရောက် လာခြင်း ဖြစ်သည်ဟု ဒေသခံ တစ်ဦးက အတည်ပြု ပြောသည်။
“မနက်က ကိုးကန့် မဟာမိတ်တပ်က ရဲစခန်းနဲ့ ဌာနဆိုင်ရာရုံးတွေ သိမ်းပြီးပြီ။ မြို့အပြင်နားက ခလရ (၁၄၅) တပ်ကို သွား၀ိုင်းထားတယ်လို့ သိရတယ်။ “၀” တပ်ကတော့ မြို့ထဲမှာ နေနေတယ်” ဟု ၄င်းကပြောသည်။
ဟိုပန်မြို့နယ်တွင် စစ်ကောင်စီတပ် စခက(၁) လက်အောက်ခံ တပ်ရင်းများရှိနေပြီး ယင်းတပ်များကို တိုက်ထုတ်နိုင်ပါက “၀” ဒေသတွင် စစ်ကောင်စီ တပ်စခန်း လုံး၀ မကျန်ရှိတော့ကြောင်း ၄င်းကဆိုသည်။
လက်ရှိ ဟိုပန်မြို့တွင်း “၀” တပ်ဖွဲ့များ တပ်ဖြန့် ကင်းလှည့်နေပြီး အခြေအနေ ငြိမ်သက်နေကြောင်း သိရသည်။
ဟိုပန်မြို့ကို ၀င်ရောက် ထိန်းချုပ်ရာတွင် ညီနောင်မဟာမိတ်တပ်များနှင့် အတူ ပါ၀င်နေကြောင်း BPLA စစ်ဦးစီးချုပ် မောင်ဆောင်းခက ၄င်း၏ လူမှုကွန်ရက်တွင် ရေးသားထားသည်။
ယမန်နေ့က သျှမ်းပြည်နယ် မြောက်ပိုင်း၊ ကိုးကန့်ဒေသ မြို့တော် လောက်ကိုင် အနီး ကျန်ရှိနေသည့် တစ်ခုတည်းသော စစ်တပ် စခန်း ဖြစ်သည့် စစ်ကောင်စီ၏ ဒစက တပ် ညီနောင်မဟာမိတ်တပ်နှင့် ညှိနှိုင်း လက်နက်ချပြီးနောက် ယနေ့ ညီနောင် မဟာမိတ်တပ်များ ဟိုပန်မြို့တွင်း ၀င်ရောက်လာခြင်း ဖြစ်သည်။
