သျှမ်းပြည် လားရှိုးမြို့ရှိ စစ်ကောင်စီတပ်ကို ညီနောင်မဟာမိတ်နှင့် PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့ကြောင်း စုံစမ်းသိရသည်။
ယနေ့ (ဇန်နဝါရီလ ၅ ရက်) နံနက်ပိုင်းမှစ၍ လားရှိုးမြို့ရှိ စစ်ကောင်စီတပ်စခန်းကို ညီနောင်မဟာမိတ်နှင့် PDF ပူးပေါင်းတပ်ဖွဲ့တို့က ဝင်ရောက်တိုက်ခိုက်ခဲ့ခြင်းကြောင်း စစ်ကောင်စီတပ်ဘက်မှ လက်နက်ကြီးဖြင့် ရမ်းသမ်းပစ်ခတ်နေကြောင်း လားရှိုးဒေသခံများက ပြောသည်။
“နှစ်ဘက်ထိတွေ့မှုဖြစ်တာပေါ့။ ကိုးကန့်တပ်နဲ့ PDF တပ်တွေက ဖိုင်တောင်း၊ မက်ချိနု ဒီရွာတွေဘက်မှာရှိတဲ့ စစ်ကောင်စီတပ်ကို သေနတ်နဲ့ လာပစ်သွားတာမျိုးပေါ့။ စစ်ကောင်စီတပ်ကလည်း ကြောက်တော့ မြို့ထဲကနေကော မြို့ပြင်ကကော လက်နက်ကြီးနဲ့ ပြန်ပစ်နေတာ၊ ပြည်သူတွေကတော့ တိုက်ပွဲကြီးဖြစ်တယ်လို့ ထင်ပြီးထိတ်လန့်တာပေါ့”ဟု လားရှိုးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့အခြေစိုက် စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်နေခြင်းကြောင့် မက်ချိနုနှင့် ဖိုင်တောင်းရွာဘက်မှ ဒေသခံများသည် ဟိုပိတ်၊ မန်ဆူဘုန်းကြီးကျောင်းနှင့် မြို့ပေါ်ရှိ နီးစပ်ရာ ဆွေမျိုးထံသို့ ထွက်ပြေးတိမ်းရှောင်နေရကြောင်း လားရှိုးဒေသခံများထံမှ သိရသည်။
“လားရှိုးနားက တိုက်ပွဲတွေကတော့ အရမ်းကြီး မပြင်းထန်သေးဘူး။ ဘာလို့လဲဆိုတော့ အခု ကိုးကန့်တပ်က သူ့အင်အားတွေကို သိန္နီဘက်မှာ တိုက်ဖို့ယူသွားတယ်။ သိန္နီဘက်မှာ တိုက်နိုင်ဖို့က လက်နက်နဲ့ ရိက္ခာပို့ဖို့ ထောက်ပို့လမ်းကြောင်းက လူအများကြီးလိုတယ်။ လားရှိုးကို အခုချက်ချင်းကြီး ဝင်တိုက်ဖို့ဟာက မဖြစ်နိုင်လောက်သေးဘူး”ဟု လားရှိုးမြို့မှ အသက် ၄၀ကျော် အမျိုးသားတစ်ဦး ကသုံးသပ်ပြောဆိုလိုက်သည်။
ပြီးခဲ့သည့် ဇန်နဝါရီလ ညပိုင်းကလည်း လားရှိုးမြို့အရှေ့ဘက် ၃ မိုင်ခန့်အကွာရှိ ဖိုင်တောင်းကျေးရွာ အနီးတဝိုက်တွင် စစ်ကောင်စီတပ်နှင့် ညီနောင်မဟာမိတ်တပ်တို့ ထိတွေ့တိုက်ပွဲ ဖြစ်ပွားခဲ့ကြောင်း လားရှိုးဒေသခံများထံမှ သိရသည်။
ထို့အပြင် လားရှိုးမြို့နယ်ရှိ အီနိုင်းတံတား ဗုံးဖောက်ခွဲ ဖျက်ဆီးခံရပြီးနောက် လားရှိုးမြို့ပေါ်ရှိ ဒေသခံများနှင့် စစ်ဘေးရှောင်များသည် စစ်ကောင်စီတပ်နှင့် ညီနောင်မဟာမိတ်တပ်များ၏ နှစ်ဘက်ထိတွေ့တိုက်ပွဲအကြား စိုးရိမ်ထိတ်လန့်ပြီး လားရှိုး-မိုင်းရယ် ကားလမ်းမှတဆင့် ဘေးလွတ်ကင်းရာသို့ ထပ်မံရွှေ့ပြောင်းနေကြကြောင်း လားရှိုးဒေသခံများက ပြောသည်။
Leave a Comments