သျှမ်းပြည် ဟိုပန်မြို့နယ်အတွင်း အာဏာသိမ်းစစ်ကောင်စီတပ်ဖွဲ့ နှင့် ညီနောင် မဟာမိတ် (၃)ဖွဲ့ တပ်ဖွဲ့တို့၏ တိုက်ပွဲက ပြင်းထန်နေလျက်ရှိပြီး မဟာမိတ်တပ်က မြို့အတွင်း နေရာယူ တပ်စွဲထားကြောင်း စုံစမ်းသိရသည်။
ယနေ့( ဇန်နဝါရီလ ၅ ရက်) နံနက်ပိုင်း ၄ နာရီဝန်းကျင်မှ စတင်ကာ ညီနောင်မဟာမိတ် နှင့် ပူးပေါင်းတပ်ဖွဲ့တို့က ဟိုပန်မြို့အတွင်း ဝင်ရောက်လာပြီး ဟိုပန်ရဲစခန်း နှင့် စစ်ကောင်စီ လက်အောက်ခံ ကင်းတပ် စခန်းနေရာများကို တိုက်ခိုက်သိမ်းပိုက်ခဲ့ကြောင်း သိရသည်။
“ပစ်ခတ်သံကတော့ မနက်မိုးမလင်းခင် ၄ နာရီလောက်ကတည်း စပြီး ကြားရတယ်။ ဟိုပန်ရဲစခန်းလည်း ကျပြီ။ မြို့ဝင်/ထွက် ကင်းတပ်စခန်းတွေလည်း အကုန်ကျပြီး အခုဆိုရင်မြို့ထဲမှာ MNDAA စစ်သား နဲ့ မဟာမိတ်တပ် တွေ နေရာယူထားတာ။ ဆေးရုံဝန်းထဲမှာလည်း သူတို့ စစ်သားတွေ နေရာယူထားတယ်” ဟု ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိ အချိန်တွင် စစ်ကောင်စီလက်အောက်ခံ ဟိုပန်မြို့ ရဲစခန်း အပြင် ၊ မြို့နယ် အထွေထွေအုပ်ချုရေး ဦးစီးဌာနရုံး နှင့် ဆေးရုံတို့ကိုလည်း မဟာမိတ် ပူးပေါင်း တပ်ဖွဲ့တို့က ထိန်းချုပ်နေရာယူထားလျက်ရှိပြီး လက်ရှိအချိန်၌ ဟိုပန်မြို့ အခြေစိုက် စစ်ကောင်စီ တပ်အမှတ် ခလရ (၁၄၅) ဘက် တိုက်ပွဲ ဆက်လက်ဖြစ်နေကြောင်းလည်း ၎င်း အမျိုးသားက ဆက်ပြောသည်။
“ဟိုပန်မြို့ကတော့ မဟာမိတ်တပ်တွေ အားလုံးနီးပါး ထိန်းချုပ်နိုင်ပြီလို့ ပြောနိုင်ပါတယ်။ ခုလည်း ခလရ (၁၄၅) ဘက် တိုက်ပွဲဖြစ်နေတာ၊ လားရှိုးကနေလည်း လက်နက်ကြီးနဲ့ လှမ်းပစ်ကူတာ ရှိနေတယ်။ တစ်မြို့လုံးလည်း ဘယ်သူမှ အပြင်မထွက်ရဲကြဘူး” ဟု အထက်ပါ အမျိုးသားက သျှမ်းသံတော်ဆင့်ကို ဆက်ဆိုသည်။
ဟိုပန်မြို့တွင်း တိုက်ပွဲ အခြေအနေများ နှင့် ပတ်သက်ပြီး လူနေအိမ် နှင့် နှစ်ဖက် တပ်သားတို့၏ ထိခိုက်ကျဆုံးမှုများ ရှိနေသည့် သတင်းထွက်ပေါ်သော်လည်း သျှမ်းသံတော်ဆင့်မှ ဆက်လက် အတည်ပြု စုံစမ်းနေဆဲ ဖြစ်သည်။
ဟိုပန်မြို့သည် ချင်းရွှေဟော်၊ကွမ်းလုံမြို့တို့နှင့် ထိစပ်နေပြီး မြန်မာ – တရုတ်နယ်စပ် ကုန်သွယ်ရေး အတွက် အဓိက အရေးပါသည့် ဆက်သွယ်ရေး လမ်းကြောင်း တစ်ခု ဖြစ်သည့် အပြင် စစ်ကောင်စီတပ်ဖွဲ့ဝင်များ၊ အရာရှိများ နှင့် ဌာနဆိုင်ရာဝန်ထမ်းများ လာရောက် ရှောင်တိမ်းနေသောနေရာဖြစ်ကြောင်းသိရသည်။
ယမန်နေ့ ဇန်နဝါရီလ ၄ ရက်နေ့မှာလည်း လောက်ကိုင်မြို့ အနီးရှိနေသည့် စစ်ကောင်စီ တပ်တစ်ခုဖြစ်သည့် ဒကစတပ်လည်း မဟာမိတ်ပူးပေါင်းတပ်ဖွဲ့တို့နှင့် ညှိနှိုင်း လက်နက်ချလိုက်ပြီဖြစ်ကြောင်း သိရသည်။
