သျှမ်းပြည် လားရှိုးခရိုင်၊ သိန္နီမြို့နယ်ရှိ စစ်ဘေးရှောင် ခိုလှုံနေထိုင်ရာ ကျောင်းခမ်းပရိယတ္တိ စာသင်တိုက် ဒရုန်းဖြင့် တိုက်ခိုက်ခံရပြီး စစ်ရှောင် ကလေးအမျိုးသမီး တစ်ဦး သေဆုံးပြီး၊ ၉ ဦးထက်မနည်းက ထိခိုက် ဒဏ်ရာများ ရရှိ သွားကြောင်း စုံစမ်းသိရသည်။
ယမန်နေ့ (ဇန်နဝါရီလ ၃) ရက် မွန်းလွဲပိုင်း ၁ နာရီဝန်းကျင်တွင် စစ်ရှောင်များ ခိုလှုံနေထိုင်ရာ သိန္နီမြို့၊ ကျောင်းခမ်း ပရိယတ္တိစာသင်တိုက်သို့ ဒရုန်း တစ်စီးရောက်ရှိလာပြီး ဗုံး ၅ လုံးကြဲချ တိုက်ခိုက်သွားကြောင်း ဖြစ်စဥ်ကို သိရှိသူ လုံခြုံရေးအရ အမည်မဖော်လိုသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
“ဒရုန်းမရောက်ခင်မှာ ဘာပစ်ခတ်သံမှလည်း မကြားရဘူး။ ဒရုန်းအသံ ကြားတာနဲ့ ဗုံးတွေ ကြဲချတာ ကြုံရတယ်။ ၄/၅ လုံးလောက်တော့ ရှိတယ်။ အဲ့မှာ အသက် (၁၆) နှစ် ကလေးမ တစ်ယောက်က ပွဲချင်းပြီးသေတယ်။ နောက်ထပ် ကလေး (၆) ယောက်လည်း ဒဏ်ရာရတယ်။ ဒဏ်ရာရတဲ့အထဲမှာ လူကြီး နှစ်ယောက်လည်းပါတယ်” ဟု လုံခြုံရေးအရ အမည်မဖော်လိုသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
ဒရုန်းဖြင့်တိုက်ခိုက်မှုကြောင့် သေဆုံးသည့် ကလေးငယ်သည် အသက် (၁၆) နှစ်ဝန်းကျင် (၁၀) တန်းကျောင်းသူ မငြိမ်းသူဇာထွေး ဆိုသူဖြစ်ပြီး ထိခိုက်ဒဏ်ရာရသူများ အနက် ကလေးငယ် (၄) ဦး နှင့် အမျိုးသား လူကြီး (၁) ဦး တို့၏ ဒဏ်ရာအခြေအနေများက ပြင်းထန်ပြီး စိုးရိမ်ရသည့် အခြေအနေ ရှိနေကြောင်းလည်း သိရသည်။
ဒရုန်းဖြင့် တိုက်ခိုက်ခံရမှုကြောင့် စစ်ဘေးရှောင် အရပ်သားများ သေဆုံး/ဒဏ်ရာရသည့် အပြင် ကျောင်းခမ်း ပရိယတ္တိ စာသင်တိုက်ရှိ ဇရပ်တစ်ဆောင် ထိခိုက်ပျက်စီးရကြောင်း အထက်ပါ အမျိုးသားက ဆက်ပြောသည်။
“ဘယ်အဖွဲ့က ဒရုန်းလို့တော့ မသိဘူး။ ဒရုန်းက ကျောင်းခေါင်မိုးပေါ်တည့်တည့်လာပြီး ကြဲချသွားတာ ဆိုတော့ ထိခိုက်ပျက်စီးမှုလည်း များသွားတယ်။ ကျောင်းဆောင်တစ်ခုဆို ခေါင်မိုးတွေ၊ အုတ်နံရုံတွေ ကျိုးပေါက်ပြီး ပျက်စီးသွားပြီ၊ အခုလို စစ်ရှောင်နေရာကိုတောင် မချန်ဘဲ တိုက်ခိုက်နေကြတာ ဆိုတော့ ကျနော်တို့လည်း အရမ်းကို ကြောက်နေကြပြီ။” ဟု အထက်ပါ အမည်မဖော်လိုသူ အမျိုးသားက သျှမ်းသံတော်ဆင့်ကို ပြောသည်။
လက်ရှိ အချိန်တွင် စစ်ဘေးရှောင်များ နေရာပြောင်းရွှေ့ရန် အတွက် တာဝန်ရှိသူများက ဆွေးနွေးတိုင်ပင် နေလျက်ရှိပြီး အသေးစိတ် အခြေအနေများကို သျှမ်းသံတော်ဆင့်မှ ဆက်လက်စုံစမ်းနေဆဲ ဖြစ်သည်။
စစ်ရှောင်များ ခိုလှုံရာ သိန္နီမြို့မှ ကျောင်းခမ်း ပရိယတ္တိ စာသင်တိုက်သည် ပြီးခဲ့သည့် နိုဝင်ဘာ ပထမပတ် အတွင်း စစ်ကောင်စီတပ် လက်နက်ကြီး ကျရောက်ပေါက်ကွဲခဲ့ခြင်းကြောင့် အမျိုးသား ၃ ဦး သေဆုံးခဲ့ပြီး အမျိုးသမီးအပါအဝင် ၃ ဦး ထိခိုက်ဒဏ်ရာရရှိခဲ့သည်။
အလားတူပင် ပြီးခဲ့သည့် ဒီဇင်ဘာ ၄ ရက် နံနက်အချိန်က စစ်ကောင်စီတပ်မှ ပစ်ခတ်လာသည့် ရှော့တိုက်ဒုံး ကျရောက်ပေါက်ကွဲခဲ့ခြင်းကြောင့် အသက် ၆၀ ကျော်အရွယ်ရှိ အဘွားအို ၁ ဦး ထိတ်လန့်သေဆုံးခဲ့ပြီး၊ အမျိုးသမီး ၂ ဦး ထိခိုက်ဒဏ်ရာရရှိခဲ့သည်။
ယင်းကဲ့သို့ အရပ်သားများ နေထိုင်ရာ၊ စစ်ဘေးရှောင်စခန်းများ ရှိရာသို့ တိုက်ပွဲဖြစ်ပွားခြင်း၊ စစ်သားများ ဝင်ရောက်နေရာယူခြင်း နှင့် တိုက်ခိုက်မှု ပြုလုပ်ခြင်းတို့သည် စစ်ရာဇဝတ်မှု (war crimes) ပြစ်မှု မြှောက်သကဲ့သို့ မြန်မာနိုင်ငံမှ ပါဝင်လက်မှတ်ရေးထိုးထားသည့် ဂျီနီဗာ ကွန်ဗင်းရှင်း စာပိုဒ်ပါ စစ်ပွဲအတွင်း အရပ်သားများ ထိခိုက်ကာကွယ်မှုကို အကာအကွယ်ပေးရန် ဆိုသည့် စာချုပ်ကိုလည်း ကျူးလွန်ရာ ဖြစ်နေသည်။
