ကရင်နီပြည် လွိုင်ကော်မြို့တွင် စစ်ကောင်စီ အဖွဲ့၀င်များမှ ဒေသခံနေအိမ်များ နှင့် ဆိုင်ခန်းများသို ဖောက်ထွင်း၀င်ရောက်ပြီး ပစ္စည်းများကို ခိုးထုတ်သယ်ယူသည့်အပြင် နေအိမ်များကို အရပ်၀တ်များဖြင့် လိုက်လံ မီးရှို့ ဖျက်ဆီးနေကြောင်း JOBS For Kayahနှင့် Kayah Assistant Teamမှ ဖော်ပြချက်များအရ သိရှိရသည်။
“၁၁.၁၁ စစ်ဆင်ရေး” ဖြစ်ပွားပြီးနောက် လွိုင်ကော်မြိုအတွင်း စစ်ကောင်စီဘက်မှ လက်နက်ကြီး၊ လေကြောင်းလမ်းများဖြင့် ပြင်းထန်စွာ တိုက်ခိုက်မှုကြောင့် ဒေသခံများ မြို့လုံးကျွတ်နီးပါး တိမ်းရှောင် ထွက်ပြေးနေရသည်။
ထို့နောက်ပိုင်းတွင် မြို့ထဲရှိ လူနေအိမ်မှ ကျန်ရှိပစ္စည်းများကို ခိုးယူခံရမှုများ ဆက်တိုက်ရှိနေပြီး ခိုးထုတ်သူများထဲတွင် ရဲများနှင့် စစ်ကောင်စီတပ်ဖွဲ့၀င်များ ပါ၀င်နေကြောင်း သိရှိရသည်။
“ကျနော်တို့မရှိတဲ့ ရပ်ကွက်တွေဘက်မှာ စကစကနေ ပြည်သူ့နေအိမ်၊ ဆိုင်ခန်းတွေကို ကားနဲ့ တင်ဖောက်ပြီး ခိုးနေတာရှိတယ်။ အမှတ် ၉၄၂ စခဗိုလ်ကြီး ရှိုင်းထက်အောင်နဲ့ မြို့မရဲစခန်းက ရဲတွေ ဦးစီးပြီး ဒကစထဲကို သူခိုးတွေနဲ့ပေါင်း သယ်ထုတ်နေတယ်။ လက်နက်ကြီး၊ လေယာဥ်ဗုံးတွေကြောင့် ပြည်သူ့ပစ္စည်းတွေ ပျက်စီးတာထက် သူခိုးကြောင့်က အဆိုးဆုံးပဲ” ဟု ၎င်းမှ ပြောထားသည်။
ဖောက်ထွင်းခိုးယူခံထားရသော အိမ်အချို့တွင် စစ်ကောင်စီမှ တော်လှန်ရေး ရဲဘော်များ ပြုလုပ်ထားသယောင် စာများ ရေးခဲ့ပြီး ပြည်သူများ အမြင်မှားအောင် စွပ်စွဲထားမှုများလည်း ရှိနေသည်ဟု ဆိုသည်။
ဆက်လက်ပြီး လွိုင်ကော်မြို့တွင်း တော်လှန်ရေးတပ်ဖွဲ့များ ၀င်ရောက် တပ်စွဲ နေထိုင်နေရချိန်အတွင်း လိုအပ်သည့် ပစ္စည်းများကို ဒေသခံများမှ ယူသုံးခွင့်ပေးသော်လည်း တော်လှန်ရေး ရဲဘော်များမှာ စားစရာမှလွဲ၍ အခြားပစ္စည်းများ ယူဆောင်ခြင်း မရှိပါဟုလည်း ဖော်ပြထားသည်။
“ကျနော်တို့ မြိုထဲဝင်တာ စခတွေကို မောင်းထုတ်ဖို့ဝင်လာတာ။ ပစ္စည်းယူဖို့ မဟုတ်ဘူး။ စိတ်ဝမ်းမကွဲစေချင်ဘူး။ တော်လှန်ရေးတပ်ဖွဲတွေကိုလည်း စစ်ကောင်စီရဲ့ ရုံးဌာန ပစ္စည်းတွေကလွဲရင် မယူဖို့၊ ပြည်သူပိုင် ပစ္စည်းတွေ မထိကြဖို့ တင်းကြပ်ထားပြီး တပ်ရင်း တပ်ဖွဲတာဝန်ရှိသူတွေက အတတ်နိုင်ဆုံး ကြပ်မတ် ထိန်းသိမ်းနေကြပါတယ်” ဟု JOBS For Kayahက ဆက်ပြောထားသည်။
စစ်ကောင်စီမှ တပ်စွဲထားသော လွိုင်ကော် အကျဥ်းထောင်ကို တော်လှန်ရေးအင်အားစုများက ဒီဇင်ဘာ (၁၆)ရက်နေ့တွင် ဝင်ရောက်တိုက်ခိုက်၍ စစ်သား(၄၀)ခန့် သေဆုံးပြီးနောက်ပိုင်း လွိုင်ကော်မြို့ရှိ နေအိမ်များကို စစ်တပ်နှင့် ရဲများက အရပ်ဝတ်ဖြင့် မီးရှို့ဖျက်ဆီးခြင်း၊ မီးလောင်ဗုံးဖြင့် ပစ်ခတ်ခြင်းများ နေ့စဥ်လုပ်ဆောင်လျက် ရှိပြီး ဒေသကွပ်ကဲမှုစစ်ဠာနချုပ်အနီး ရပ်ကွက်ရှိ နေအိမ်နှင့် ဆိုင်ခန်းများကို တော်လှန်ရေးတပ်များ အကာကွယ်ယူမရစေရန် မီးရှို့၊ စက်ဖြင့် ထိုးကော်မှုများလည်း ပြုလုပ်ကြောင်း ဖော်ပြထားသည်။
ထို့အပြင် ခိုးယူပြီး နေအိမ်များကိုလည်း စစ်ကောင်စီမှ မီးရှို့ဖျက်ဆီးခဲ့ပြီး ထိုနေအိမ်များကြားတွင် နင်းမိုင်း၊ တိုက်မိုင်းများ ခင်းထားကြောင်းလည်း သိရှိရသည်။
လက်ရှိအချိန်အတွင်း လွိုင်ကော်တွင် စစ်ကောင်စီမှ နေ့စဥ်ရက်ဆက် လေကြောင်းဖြင့် တိုက်ခိုက်မှုများ ပြုလုပ်နေပြီး စစ်ကောင်စီမှ ပြုလုပ်ထားသော မိုင်း နင်းမိ၍ ပစ္စည်း ပြန်ဝင်သယ်သူ ပြည်သူများ ထိခိုက်ဒဏ်ရာ ရမှုများ ရှိနေကြောင်းလည်း ထပ်မံသိရှိရသည်။
