သျှမ်းပြည် မိုးမိတ်ခရိုင်၊ မိုးမိတ်မြို့နယ် အတွင်းတွင် အာဏာသိမ်း စစ်ကောင်စီ တပ်ဖွဲ့ နှင့် ကချင်လွတ်လပ်ရေး တပ်မတော် KIA ပူးပေါင်းတပ်ဖွဲ့၊ ပြည်သူ့ကာကွယ်ရေးတပ်ဖွဲ့ PDF တို့က တိုက်ပွဲ ပြင်းထန်ခဲ့ကြောင်း စုံစမ်းသိရသည်။

ယမန်နေ့ ( ဇန်နဝါရီလ ၁) ရက်န နံနက်ပိုင်း ၆ နာရီခွဲ ဝန်းကျင် အချိန်တွင် မိုးမိတ်မြို့နယ်၊ မန်ပတ်ကျေးရွာအနီးရှိ စစ်ကောင်စီ တပ်စခန်းကို KIA တပ်နှင့် ပူးပေါင်းတပ်ဖွဲ့ PDF တို့က ဝင်ရောက်တိုက်ခိုက် သိမ်းပိုက်လိုက်ကြောင်း ဒေသခံများက သျှမ်းသံတော်ဆင့်ကို ပြောသည်။

“မနက် ၆ နာရီခွဲဝန်းကျင်လောက်မှာ လက်နက်ကြီး အသံတွေ စတင်ထွက်ပေါ်ခဲ့တယ်။ ပြီးတော့ သေနတ် နဲ့ အချင်းချင်းပစ်ခတ်သံတွေပေါ့၊ အဲ့ဒီတပ်စခန်းက လူလည်း သိပ်မရှိတော့ တိုက်ပွဲလည်း မကြာဘူး။ ၁၁ နာရီဝန်းကျင်လောက်မှာ တိုက်ပွဲအသံငြိမ်သွားပြီး အဲ့တပ်စခန်းကိုလည်း KIA/PDF က သိမ်းနိုင်ခဲ့တယ်” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ မန်ပတ် စစ်ကောင်စီ တပ်စခန်း သိမ်းတိုက်ပွဲကြောင့် လူသေထိခိုက်မှုများ ရှိသည့်အပြင် အသက်ရှင် ကျန်ရစ်သည့် စစ်ကောင်စီ တပ်သားများကိုလည်း KIA / PDF ပူးပေါင်းတပ်ဖွဲ့က ဖမ်းဆီးထိန်းသိမ်း ထားကြောင်းလည်း သိရသည်။

မန်ပတ်ကျေးရွာအနီးရှိ စစ်ကောင်စီ တပ်စခန်း သိမ်းပိုက်ခံရပြီးနောက် ယနေ့ ဇန်နဝါရီလ ၂ ရက်နေ့ မနက်ပိုင်း ၉ နာရီဝန်းကျင်တွင် စစ်ကောင်စီ မှ စစ်ရဟတ်ယာဥ်ဖြင့် မန်ပတ်ကျေးရွာ အနီးတစ်ဝိုက် ဗုံးကြဲ တိုက်ခိုက်မှု ထပ်မံ ပြုလုပ်လာကြောင်းလည်း ၎င်းက ဆက်လက်ပြောသည်။

“လေယာဥ်နဲ့ ၅ လုံးလောက် ဗုံးတွေ ကြဲချသွားတယ်။ မြေပြင်တိုက်ပွဲတော့ မရှိဘူး။ အခုဆို မိုးမိတ်မြို့တွင်းက ဆိုင်တွေ ပိတ်ထားကြကုန်ပြီ။ တချို့လည်း စစ်ရှောင်ထွက်ပြေးကြတာပေါ့။ တော်တော်များများက အိမ်တံခါးပိတ်ပြီး အခြေအနေကို စောင့်ကြည့်နေတာ၊ မြို့ထဲ တိုက်ပွဲဖြစ်လာရင် စစ်ရှောင်ရမှာပဲ” ဟု အထက်ပါ ပုဂ္ဂိုလ်က သျှမ်းသံတော်ဆင့်ကို ပြောသည်။
လက်ရှိ အချိန်တွင် မိုးမိတ်မြို့ ဒေသခံများ အနေဖြင့် တိုက်ပွဲ ပိုမိုပြင်းထန်လာပါက စစ်ရှောင်ထွက်ပြေးရန် အတွက် နေရာထိုင်ခင်း နှင့် စားသောက်ရေး အတွက် စိုးရိမ်ပူပန်ရသည့်အပြင် ထွက်ပြေးရမည့် လမ်းကြောင်းများအတွက်လည်း အခက်အခဲရှိနေကြောင်း ဒေသခံများက ပြောသည်။

ပြီးခဲ့သည့် ၂၀၂၃ ခုနှစ် နိုဝင်ဘာလနှောင်းပိုင်းတွင်လည်း မိုးမိတ်မြို့ နယ် နမ့်ရှီးရွာ နှင့် နမ့်ပုတ်ရွာ အနီးဖြစ်ပွားသည့် အာဏာသိမ်း စစ်ကောင်စီ နှင့် ကချင်လွတ်မြောက်ရေး တပ်မတော် KIA ပူးပေါင်းတပ်ဖွဲ့ PDF တို့ တိုက်ပွဲကြောင့် စစ်ရှောင်ထွက်ပြေးရသည့် မိုးမိတ်မြို့ ဒေသခံ ၃၀၀ ကျော်အနက် အချို့ကလည်း နေရပ်မပြန်နိုင်သေးကြောင်း သိရသည်။