သျှမ်းပြည် ကွတ်ခိုင်မြို့ရှိ စစ်ကောင်စီ၏ တပ်စခန်းများအား ညီနောင်မဟာမိတ်တပ်ဖွဲ့ (၃)ဖွဲ့က ထိုးစစ်ဆင်တိုက်ခိုက်နေစဉ် စစ်ကောင်စီဘက်မှ လေယာဉ်ဖြင့် ခုခံတိုက်ခိုက်နေသဖြင့် တိုက်ပွဲပြင်းထန်နေကြောင်း စုံစမ်းသိရသည်။
ယနေ့ (ဇန်နဝါရီလ ၂ ရက်) နံနက်အစောပိုင်းအချိန်တွင် ကွတ်ခိုင်မြို့ရှိ စစ်ကောင်စီ တပ်စခန်း တစ်ခုတွင် ညီနောင်မဟာမိတ်တပ်ဖွဲ့များနှင့် စစ်ကောင်စီတပ်တို့ တိုက်ပွဲဆက်လက် ဖြစ်ပွားနေပြီး စစ်ကောင်စီဘက်မှ လေယာဉ်ဖြင့် ပျံဝဲနေလျက်ရှိကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ဒီနေ့တော့ We love Kut Ki ပေါ်က စစ်ကောင်စီ တပ်စခန်းကုန်းမှာ ပစ်နေကြတယ်။ လေယာဉ်လည်း ဝဲနေတယ်” ဟု ၎င်းက ပြောသည်။
ထိုကဲ့သို့ စစ်ကောင်စီဘက်မှ လေယာဉ်ဖြင့် ပျံဝဲနေလျက်ရှိသောကြောင့် တိုက်ပွဲနှင့်နီးစပ်ရာ လူနေအိမ်နှင့် ရပ်ကွက်များပေါ်သို့ ဗုံးကြဲချမည်ကို ဒေသခံများက စိုးရိမ်နေကြသည်။
ယမန်နေ့ (ဇန်နဝါရီလ ၁ ရက်)တွင် ကွတ်ခိုင်မြို့အနီး ဟွေခုတ်ကျေးရွာကို စစ်ကောင်စီဘက်မှ လေယာဉ်ဖြင့် ဗုံးကြဲတိုက်ခိုက်ခဲ့သဖြင့် အမျိုးသား ၁ ဦးသေဆုံးပြီး ၄ ဦးထိခိုက်ဒဏ်ရာ ရရှိသည်။
အလားတူ ကွတ်ခိုင်မြို့ရပ်ကွက် (၄)၊ ရပ်ကွက် (၅)၊ ရပ်ကွက် (၈) အပြင် မြို့နှင့်အနီးတဝိုက်ရှိ မန်ဂျတ်ရွာ၊ ခိုတင်ရွာ၊ မန်ကန်ရွာ စသည့် ကျေးရွာများတွင်လည်း ထိတွေ့တိုက်ပွဲဖြစ်ပွားခဲ့ပြီး အဆိုပါ တိုက်ပွဲအတွင်း ပစ်ခတ်လိုက်သော လက်နက်ကြီးများအား လူနေအိမ်ခြံဝန်းအတွင်းသို့ ကျရောက်ပေါက်ကွဲ၍ လူထိမှန်ကာ ဒဏ်ရာရရှိခဲ့ကြောင်း သိရသည်။
ယင်းတိုက်ပွဲကြောင့် လူထိခိုက်သေဆုံးမှုနှင့် ပတ်သက်ပြီး အသေးစိတ်သိရှိရန် သျှမ်းသံတော်ဆင့် မှ ဒေသအတွင်းလူမှုကူညီရေးအသင်းထံသို့ ဖုန်းဆက်သွယ်ခဲ့သော်လည်း ဖုန်းလိုင်းပြတ်မှုကြောင့် ဆက်သွယ်၍မရပေ။
ကွတ်ခိုင်မြို့ ဒေသခံတစ်ဦးက “အခုချိန်မှာ ကွက်ခိုင်မြို့ထဲမှာရှိတဲ့ ပြည်သူတွေ တိုက်ပွဲကြောင့် ထွက်ပြေးနေကြရတယ်။ တချို့ကလားရှိုးဘက်ကို သွားကြတယ်။ တချို့ကျတော့ တာမိုးညဲဘက်ကို ပြေးတယ်။ တာမိုးညဲဘက်က ပြန်လို့ရပြီလို့ ပြောကြတာ တကယ်ပြန်လို့ရ၊ မရ လည်း သေချာမသိဘူး” ဟု ၎င်းက ထပ်လောင်းပြောသည်။
ထို့အပြင် တိုက်ပွဲအခြေအနေနှင့် ပတ်သက်ပြီး သျှမ်းသံတော်ဆင့်မှ တအာင်း(ပလောင်) အမျိုးသားလွတ်မြောက်ရေးတပ်မတော် TNLA၏ ပြန်ကြားရေးထံ Signal မှတစ်ဆင့် ဆက်သွယ်မေးမြန်ခဲ့ရာ ဖြေကြားရှင်းမရှိသေးပေ။
လက်ရှိတွင် ကွတ်ခိုင်မြို့သည် ညီနောင်မဟာမိတ်သုံးဖွဲ့တို့ ဝိုင်းရံထားလျက်ရှိပြီး စစ်ကောင်စီဘက်မှ လက်နက်ကြီးသော်လည်းကောင်း၊ လေကြောင်းဖြင့် သော်လည်းကောင်း ခုခံတိုက်ခိုက်နေလျက်ရှိသည်။
