သျှမ်းပြည် လားရှိုးမြို့နယ်အတွင်း လားရှိုး-နမ္မတူ ကားလမ်းမပေါ်ရှိ အီနိုင်းတံတားသည် ဗုံးဖောက်ခွဲခံရပြီး ထက်ပိုင်းကျိုးကျသွားကြောင်း စုံစမ်းသိရသည်။
ယမန်နေ့ (ဒီဇင်ဘာလ ၃၁ ရက်) နှစ်သစ်ကူး ညသန်းခေါင်တွင် လားရှိုးမြို့နှင့် ၇ မိုင်ခန့်သာ ကွာဝေးသည့် လားရှိုး-နမ္မတူ ကားလမ်းမကြီးပေါ်ရှိ အီနိုင်းတံတားသည် ဗုံးဖောက်ခွဲဖျက်ဆီးခံရပြီး ထက်ပိုင်းကျိုးကျသွားသဖြင့် သွားလာ၍မရတော့ကြောင်း လားရှိုးဒေသခံများက ပြောသည်။
“အီနိုင်းတံတား ဗုံးဖောက်ခွဲခံရတာ မနေ့ည သန်းခေါင်လောက်က ဖြစ်မယ်။ ဘယ်သူဖောက်ခွဲလဲတော့ မသိရသေးဘူး။ ညတုန်းကတော့ ဒရုန်းနဲ့ ဗုံးသီးချတဲ့အသံကော မြို့ထဲကနေ လက်နက်ကြီး ပစ်လွှတ်တဲ့အသံကော ကြားရတယ်။ အခုတံတားက ထက်ပိုင်းကျိုးသွားတော့ ကားကော ဆိုင်ကယ်ကော ဘယ်လိုမှ သွားလို့မရတော့ဘူး”ဟု လားရှိုးမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် လားရှိုးမြို့မှ အခြားမြို့များသို့ ဆက်သွယ်နိုင်ရန် လားရှိုး-နမ့်ပေါင်-မိုင်းရယ် ကားလမ်းတစ်လမ်းတည်းသာ ကျန်ရှိတော့ပြီး လားရှိုးမြို့သို့ ဝင်ရောက်နိုင်သည့် လမ်းကြောင်းအားလုံးနီးပါး ဖြတ်တောက်ခံရခြင်းကြောင့် ဒေသခံများမှာ စားနပ်ရိက္ခာ ပြတ်တောက်ပြီး မြို့တွင်းတိုက်ပွဲများ ပြင်းထန်လာမည်ကို စိုးရိမ်နေကြောင်း လားရှိုးဒေသခံများထံမှ သိရသည်။
“လားရှိုးကို ဆက်သွယ်တဲ့တံတားက မိုင်းရယ်ဘက်ကိုသွားတဲ့ နမ့်ပေါင်တံတားဘက်ပဲ ကျန်တာ။ ထွက်ပေါက်က တစ်ပေါက်ပဲကျန်တော့လို့ တချို့တော့ လားရှိုးကနေ တခြားဒေသကို ရှောင်နေကြတယ်။ လမ်းကြောင်းတွေလဲ ပိတ်ကုန်တော့ ရိက္ခာပြတ်မှာရယ်၊ ပြီးတော့ ဗုံးကြဲခံရမှာကိုလည်း ကြောက်ကြတာ ပါတာပေါ့။ မြို့သိမ်းတိုက်ပွဲက လားရှိုးထိ ရောက်လာတော့မှာကို စိုးရိမ်ကြတာ”ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ဒီဇင်ဘာလ ၂၉ ရက်တွင် လားရှိုးမြို့နယ် ဟန်နားကျေးရွာမှ လားရှိုးမြို့သို့ ဈေးဝယ်ရန် အီနိုင်းကျေးရွာအရောက်တွင် မိသားစု ၃ ဦး မောင်းနှင်လာသည့် ဆိုင်ကယ်အနီးသို့ လက်နက်ကြီးကျရောက်ပေါက်ကွဲခဲ့ရာ အသက် ၃၀ နှစ်အရွယ်ရှိ နန်းကြိမ်ခမ်းဆိုသူ ကျောင်းဆရာမတစ်ဦး ထိခိုက်ဒဏ်ရာရရှိခဲ့ပြီး ဘယ်ဘက်ခြေထောက်တစ်ဘက် ဖြတ်လိုက်ရကြောင်း လားရှိုးဒေသခံများထံမှ သိရသည်။
လားရှိုး-သီပေါအကြားရှိ စဉ့်အင်တံတားမှာလည်း ၂၀၂၃ ဒီဇင်ဘာလ ၁ ရက်တွင် TNLA တပ်ဖွဲ့နှင့် စစ်ကောင်စီတပ်တို့၏ နှစ်ဘက်တိုက်ပွဲကြား ဖျက်ဆီးခံလိုက်ရပြီး လားရှိုး-သိန္နီအကြားရှိ နမ္မတူတံတားလည်း ပြီးခဲ့သည့် နိုဝင်ဘာလကတည်းက ပျက်စီးသွားခဲ့သည်။
အလားတူ ဒီဇင်ဘာလ ၂၈ ရက်တွင် သီပေါနှင့် နမ္မတူမြို့အကြား အဓိကဆက်သွယ်ထားသည့် မိုးတေချောင်းတံတားအား သီပေါမြို့အခြေစိုက် စစ်ကောင်စီတပ် ခလရ-၅၀၃/၅၀၄ တပ်ရင်းမှ မိုင်းခွဲဖျက်ဆီးခဲ့ကြောင်း TNLA တပ်ဖွဲ့က သတင်းထုတ်ပြန်သည်။
ဒီဇင်ဘာလအတွင်း တရုတ်နိုင်ငံ၏ ကြားဝင်စေ့စပ်မှုဖြင့် ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်နိုင်ငံ ကူမင်းမြို့၌ နှစ်ကြိမ်တိုင်တိုင် တွေ့ဆုံဆွေးနွေးခဲ့သော်လည်း သဘောတူညီမှု တစုံတရာ မရရှိဘဲ နှစ်ဘက်တိုက်ပွဲ ပိုမိုပြင်းထန်လျက်ရှိပြီး သီပေါ၊ လားရှိုး၊ ကွတ်ခိုင်၊ မူဆယ်နှင့် လောက်ကိုင်မြို့တို့သည် ညီနောင်မဟာမိတ်တပ်တို့၏ ဝိုင်းရံပိတ်ဆို့ထားခြင်းကို ခံနေရသည်။
Leave a Comments