သျှမ်းပြည် လွိုင်လင်မြို့နယ် ပင်လုံမြို့ စျေးအရှေ့ဘက်ရှိ လျှပ်စစ်ပစ္စည်း နှင့် ဖုန်းအပိုပစ္စည်းအရောင်းဆိုင် တစ်ဆိုင်မှာ အမည်မသိ လူတစ်စုက ဝင်ရောက်ပစ်ခတ်ပြီး ဆိုင်ရှင်အပါအဝင် (၄) ဦး ပွဲချင်းပြီး သေဆုံးသွားကြောင်း စုံစမ်းသိရှိရသည်။
ယနေ့ ဒီဇင်ဘာ (၂၇) ရက် ည (၇) နာရီဝန်းကျင်က ဖြစ်ပွားခဲ့ပြီး အမည်မသိ လူတစ်စုက သေနတ်ပစ်ဖောက်ခဲ့ရာ ဆိုင်ရှင် (၂) ဦး အပါအဝင် ဝန်ထမ်း (၂) ဦး ပွဲချင်းပြီး သေဆုံးသွားခဲ့ကြောင်း သိရှိရသည်။
“သေနတ်သံ အကျယ်ကြီးပဲ ကြားရတယ်။ ရဲတွေတော့ ရောက်လာကြတယ်။ ခုတော့ ပင်လုံမြို့ တစ်မြို့လုံး တိတ်ဆိတ်နေတာပဲ။ ကျနော်တို့ နေလာတဲ့ သက်တမ်းတစ်လျှောက် ဒီလို တစ်ခါမှ မကြားဖူးဘူး။ လုံခြုံမှု လုံးဝ မရှိတော့ဘူးလို့ ခံစားရတယ်။” ဟု ပင်လုံဒေသခံ တစ်ဦး ကပြောသည်။
ပင်လုံမြို့သည် စစ်ကောင်စီတပ် အပြင် တိုင်းရင်းသားလက်နက်ကိုင် တပ်ဖွဲ့ တစ်ချို့ ရှိထားခြင်း၊ စစ်တပ်အာဏာသိမ်းပြီးနောက် သျှမ်းပြည်အတွင်း စျေးရောင်းပွဲတော် အများအပြားရှိလာခြင်း၊ လောင်းကစားဝိုင်း ရှိလာခြင်း၊ မူးယစ်ဆေးဝါး ရောင်းဝယ်ဖောက်ကားမှု များပြားလာတဲ့အတွက် ဒုစရိုက်များလည်း များပြားလာခဲ့သည်။
“ဒီလို အာဏာသိမ်းပြီးနောက်မှာတော့ စားဝတ်နေရေးအတွက် ရှာစားရတာ အရမ်းခက်ခဲတယ်။ အလုပ်လုပ်နေတာကလည်း စားဝတ်နေရေးအတွက်ပဲ နေ့တိုင်း ဖြေရှင်းနေရတာ။ ဒီလိုခေတ်ပျက်နေတဲ့ ချိန်မှာ အလုပ်လုပ်ပြီး ငွေစုရဖို့ဆိုတာ မလွယ်ကူတော့ဘူး။” ဟု ပင်လုံဒေသခံ အိမ်ရှင်မ တစ်ဦး ကသျှမ်းသံတော်ဆင့် ကိုပြောသည်။
ပြီးခဲ့သည့် ၂၀၂၃ ဇူလိုင် (၂၄) ရက်တွင် ပင်လုံမြို့ နာနတ်သီး ရောင်းသူ အသက် (၃၀) အရွယ် အမျိုးသားသည် နာနတ်သီး သွားပို့စဥ် သတ်ဖြတ်ခံရပြီး ဇူလိုင် (၂၅) ရက်တွင် ရုပ်အလောင်းကို ပြန်လည်တွေ့ရှိခဲ့သည့် ဖြစ်စဥ်လည်း ဖြစ်ပွားခဲ့ဖူးသည်။
စစ်တပ်မှ အာဏာသိမ်းပြီး ၂ နှစ်ကျော်ကာလတွင် ပင်လုံမြို့အတွင်း နေထိုင်သည့် ပါညို ဆိုသူကို ပြီးခဲ့သည့် ၂၀၂၂ ခုနှစ်က အမည်မသိ လူတစ်စုက အိမ်ထိလာရောက်ခေါ်ဆောင်သွားပြီး သတ်ဖြတ်ခဲ့သည့် ဖြစ်စဥ်လည်း ရှိခဲ့ဖူးသည်။
Leave a Comments