သျှမ်းပြည် သိန္နီမြို့နယ်တွင် စစ်ကောင်စီတပ်က လေကြောင်းဖြင့် အပြင်းအထန် ထပ်မံဗုံးကြဲတိုက်ခိုက်လာကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၅ ရက်) ခရစ္စမတ်နေ့ညအချိန်တွင် စစ်ကောင်စီတပ်မှ သိန္နီမြို့အနီးသို့ လေကြောင်းဖြင့် အပြင်းအထန် ထပ်မံဗုံးကြဲတိုက်ခိုက်လာကြောင်း သိန္နီဒေသခံများက ပြောသည်။
“မနေ့က ညနေပိုင်းရော၊ ညအချိန်ရော လေယာဉ်နဲ့ ဗုံးလာကြဲသွားတာ။ မြို့နဲ့ မနီးမဝေးမှာပါ။ ပန်လော့တိုးဂိတ်၊ ဝိန်းလျှန်၊ မိုင်းယမ်း၊ လုံမောက်ရွာတွေမှာ ချသွားတာ။ ကြောက်နေရလို့ အိမ်ပြင်မထွက်ရဲတော့ ဘယ်သူအိမ်ထိမှန်း မသိရဘူး။ ဖုန်းလိုင်းကလည်း အမြင့်တက်မှ လိုင်းမိတယ်”ဟု သိန္နီမြို့မှ လားရှိုးမြို့သို့ စစ်ဘေးရှောင်လာသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဒီဇင်ဘာလ ၂၃ ရက်တွင်လည်း သိန္နီမြို့ပေါ်သို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် သိန္နီပြည်သူ့ဆေးရုံ၊ ရေအားလျှပ်စစ်ကုန်းနှင့် ကွန်ကောက်ကျေးရွာအုပ်စု ပိန်းဟုန်းရွာတို့တွင် ကျရောက်ပေါက်ကွဲခဲ့ပြီး အမျိုးသမီး ၁ ဦး အပါအဝင် ၃ ဦးထက်မနည်း သေဆုံးခဲ့ပြီး ၁၀ ဦးခန့် ထိခိုက်ဒဏ်ရာရရှိခဲ့ကာ နေအိမ် ၂၀ လုံးထက်မနည်း ထိခိုက်ပျက်စီးခဲ့ရသည်ဟု သိန္နီမြို့ ဒေသခံများထံမှ သိရသည်။
သိန္နီမြို့နယ်ကို ညီနောင်မဟာမိတ်တပ်များက နိုဝင်ဘာလမှ စတင်ထိန်းချုပ်ခဲ့ပြီး ကိုးကန့်တပ်ဖွဲ့ MNDAA ၏ အုပ်ချုပ်ရေးယန္တရား လည်ပတ်နိုင်ရန် ကျေးရွာသူကြီးများကို အစည်းအဝေး ခေါ်ယူ၍ အရေးကြီး အချက် ၆ ချက်ကို ပြီးခဲ့သည့် ဒီဇင်ဘာလ ၁၆ ရက်နေ့က အမိန့်ပေးညွှန်ကြားခဲ့ကြောင်း သိန္နီမြို့ ဒေသခံများက ပြောသည်။
ညီနောင်မဟာမိတ် ၃ ဖွဲ့နှင့် စစ်ကောင်စီတို့သည် တရုတ်နိုင်ငံ၏ ကြားဝင်စေ့စပ်မှုဖြင့် ဒုတိယအကြိမ်မြောက် တွေ့ဆုံဆွေးနွေးမှုကို ဒီဇင်ဘာလ ၂၂ ရက်မှ ၂၄ ရက်အထိ ကူမင်းမြို့တွင် ပြုလုပ်ခဲ့ပြီး တပ်နေရာချထားရေးနှင့် ကုန်သွယ်ရေးလမ်းကြောင်း ပြန်လည်ဖွင့်လှစ်ရေးကိစ္စများကို အချေအတင် ဆွေးနွေးခဲ့ကာ သဘောတူညီချက် တစုံတရာ မရရှိဘဲ ပျက်ပြယ်သွားခဲ့ကြောင်း ဗွီအိုအေ မြန်မာပိုင်းက ဒီဇင်ဘာလ ၂၅ ရက်တွင် သတင်းဖော်ပြထားသည်။
“၁၀၂၇ စစ်ဆင်ရေး” နှစ်လနီးပါးကာလအတွင်း သိန္နီမြို့နယ်တွင် စစ်ကောင်စီ၏ လက်နက်ကြီး နှင့် လေကြောင်းဗုံးကြဲမှုကြောင့် အမျိုးသမီး ၇ ဦး အပါအဝင် စုစုပေါင်း ၁၈ ဦး သေဆုံးပြီး ၃၀ ဦးထက်မနည်း ထိခိုက်ဒဏ်ရာရရှိ၍ ပြည်သူနေအိမ် ၂၀၀ နီးပါး ထိခိုက်ပျက်စီးခဲ့ကြောင်း သိန္နီမြို့နယ်ဒေသခံများထံမှ သိရသည်။
Leave a Comments