သျှမ်းပြည်မြောက်ပိုင်းတွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့ ပြင်းထန်နေသည့် စစ်ရေးရှိန်လျော့ ရေးအတွက်ကို တရုတ်နိုင်ငံက ဒုတိယအကြိမ် နွေးဆွေးပွဲကို ကြားဝင် ဆောင်ရွက်ပေးခဲ့ကြောင်း သိရသည်။
ဒုတိယအကြိမ်အစည်းအဝေးကို စစ်ကောင်စီဘက်က အမျိုးသားစည်းလုံးညီညွတ်ရေး နှင့် ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ – NSPNC က ဒုတိယဗိုလ်ချုပ်ကြီးမင်းနိုင် ဦးဆောင်တက်ရောက်ပြီး မြောက်ပိုင်းမဟာမိတ်တပ် ၃ ဖွဲ့ဘက်က ကိုးကန့်တပ် – MNDAA ၊ တအာင်း (ပလောင်)တပ် – TNLA နှင့် ရက္ခိုင့်တပ်တော် AA တို့တက်ရောက်ခဲ့သည်။
MNDAA မှ လောက်ကိုင်ထဲတွင်ပိတ်မိနေသူတို့၏ လုံခြုံစွာနှင့် အပြင်ထွက်နိုင်မယ့် (Humanitarian Passage – လူသားစာနာထွက်ခွာခွင့်ပြုရေးလမ်းကြောင်း) ကို ခွင့်ပြုပေးရန် အဓိကဆွေးနွေးခဲ့ပြီး စစ်တပ်ဘက်တွင်လည်း လောက်ကိုင်ကိုဝင်မတိုက်ရန်ဆိုသည့် အချက် ကိုဆွေးနွေးခဲ့သည်။
စစ်ကောင်စီ မှမြောက်ပိုင်း စစ်ရှိန်လျှော့ရေး( De-escalation)ကို အဓိကထားဆွေးနွေးခဲ့ပြီး နယ်စပ် ကုန်သွယ်ရေးလမ်းကြောင်းပြန်စနိုင်ရန်နှင့် မြောက်ပိုင်းမှ တခြားဒေသကို စစ်ဘောင်မကျယ်ရေး ဆိုသည့်အချက်ကိုဆွေးနွေးခဲ့သည်။
တရုတ်နိုင်ငံ ကူမင်းမြို့တွင် ဒီဇင်ဘာ ၂၂ ရက်နေ ၂၄ နေ့အထိ ၃ ရက်ကြာ ပြုလုပ်ခဲ့သည့် ဒုတိယအကြိမ် ဆွေးနွေးပွဲတွင် မည်သည့် အကြောင်းအရာကို ဆွေးခဲ့ကြောင်း “သတင်းကို မသိရသေပါဘူး’ဟု TNLA ပြန်ကြားရေး တာဝန်ရှိသူတစ်ဦး က သျှမ်းသံတော်ဆင့်ကို ပြောသည်။
သို့သော်လည်း TNLA ၏ ဗိုလ်မှူးချုပ် တားဘုန်းကျော် ကဘီဘီစီ သတင်းဌာနကို“တရုတ်ကတော့ သူရဲ့နစ်ကိုယ်ရပ်တည်ချက်အတိုင်းပဲ ရပ်တည်တယ်။ကျနော်တို့ကို ဒီနယ်စပ် တည်ငြိမ် အေးချမ်းဖို့ တိုက်ပွဲတွေမဖြစ်ဖို့ဆိုတော့ ခုတိုက်ပွဲတွေပြင်းထန်နေတော့ သူကို ရိုက်ခက်မှုတွေရှိတယ်။ ဒါကြောင့်မလို့ ကျနော်တို့ကို တိုက်ပွဲတွေရပ်ဖို့ ဖိအားပေးတာတွေရှိပါတယ်။အဲ့ကိုကျနော်တို့ ကျော်လွဲနိုင်မဲ့ နည်းလမ်းတွေ ကျနော်တို့ရဲ့ အခြေအနေ ကိုနားလည်အောင် ကျနော်တို့လည်း နည်းလမ်းတွေရှာပြီးတော့ တင်ပြဆွေး နွေးနေပါတယ်”ဟု ဖြေကြားခဲ့သည်။
အလားတူ ပြီးခဲ့သည့် ဒီဇင်ဘာလ (၁၁) ရက်မှ ဒီဇင်ဘာ (၁၃) ရက်ထိ တရုတ်နိုင်ငံရဲ့ ကြားဝင် ဆောင်ရွက်ပေးမှုနှင့် ပထမအကြိမ်ပြုလုပ်ခဲ့သည့် ဆွေးနွေးပွဲတွင် မြောက်ပိုင်းညီနောင်(၃) ဖွဲ့နဲ့ စစ်ကောင်စီအကြား ယာယီအပစ်ရပ်မည့် “ဟိုင်ဂင် သဘောတူညီချက်” ကို ရရှိခဲ့သည်။
၂၀၂၃ ခုနှစ် ဒီဇင်ဘာလ ၁၂ ရက်ညနေပိုင်းတွင်လည်း ဒီဇင်ဘာလအတွင်း အပစ်အခတ်ရပ်စဲရေး၊ စစ်သုံ့ပန်းတွေနဲ့ သက်ဆိုင်ရာအကျဉ်းသားတွေကို အမြန်ဆုံး လဲလှယ်ဖို့၊ ထိန်းချုပ်နယ်မြေများအတွင်း အွန်လိုင်းငွေလိမ်ဂိုဏ်း( ကျားဖြန့်) လုံးဝတားမြစ်ပပျောက်ဖို့နှင့် အရေးပါသော ခေါင်းဆောင်တွေကို အမြန်ဆုံးဖမ်းဆီး လွှဲပြောင်းပေးအပ်ဖို့ ကို လည်းဆွေးနွေးကြတယ်လို့ သိရသည်။
“၁၀၂၇ စစ်ဆင်ရေး” တိုက်ပွဲများကြောင့် သီပေါမြို့နယ်ရှိ စဉ့်အင်းတံတားနှင့်ကျင်သီတံတား၊ သိန္နီမြို့ဝင်တံတား ၊ကွမ်းလုံနှင့် ဟိုပန်ကြားရှိ ဖောင်ဆိပ် နိမ့်တိန်ချောင်း တံတားများ၊လမ်းများ ဖျက်ဆီးခံခဲ့ရပြီး မြန်မာ-တရုတ်နယစ်ပ ကုန်သွယ်ရေး၊ လက်ပန်းဆက်သွယ်ရေး များအခက်အခဲဖြစ်ခဲ့ရသည်။
